Dimi Nangaka Mbetsha Onto Bible!
1 Efula l’atei aso mɛnyaka saki kɛsɔ k’ɔlɔlɔ ka mbetsha onto Bible. Mɛtɛ, lo woho ɔsɔ mbakotshaso oyango aso wa mbetɛ anto ambeki. (Mat. 28:19, 20) Koko, efula kaso mbetshaka ngɔndɔ ko ngɔndɔ, kânga ɛnɔnyi, aha la mboka ɔlɔ wa lânde waya oma lo ndakanya onto sɔlɔ. Okokiso ntsha lo Ngɔndɔ ka Dikumi l’Ɔtɔi kɛnɛ dia nɔngɔsɔla dikambo sɔ na? Lam’ele tayosha anto dibuku Ewo, katoyâtshutshuya dia tatɛ mbeka l’anto Bible lo dibuku diakɔ.
2 Omba Wikɛndɛ Ɔtɔi Kana Efula: Tambokeketsha onto tshɛ dia ndjaombɛ etena ngɔndɔ kɛnɛ dia nyanga onto la mbetsha Bible. Anɔmbɔdi wa Wekelo wa Dibuku wayɔsɔna wikɛndɛ ɔtɔi kana efula dia kamba olimu ɔsɔ, l’ɔkɔngɔ ko vɔ mbɔsa tɛdikɔ dia ase elui awɔ ndjasha l’olimu wa membola anto.
3 Ɛmba nɔtɛ yayɛ yendana la waembwelo lo nsanganya shɔ y’esambishelo. L’ɔkɔngɔ, tshɔka dia tembola anto tshɛ wakɛnya saki, wakalongola okanda ɔmɔtshi kana wakaye lo nsanganya. Embola onto tshɛ l’oyango wa tatɛ mbeka la nde Bible.
4 Wɛnyɛlɔ wa Woho wa Tatɛ Mbeka l’Onto Bible: Lo nsanganya y’otsha l’esambishelo yayosalemaka, kanyotshake wɛnyɛlɔ ɔmɔtshi wakalɔngɔsɔma dimɛna dia mɛnya woho wa tatɛ mbeka l’onto Bible lo diembwelo. Wɛ koka mbuta ɔnɛ: “Anto efula wekɔ la Bible, koko haweye ɔnɛ tɔ kadimulaka lo wembola w’ohomba efula wayambolaso lo lɔsɛnɔ. [Ɛnyande ɛtɛ w’awui wofundami wa lo dibuku Ewo ko wɛ mbadia ɔtɛ a dui wa tshapita 3, 5, 6, 8, la 9.] L’ekimanyielo ka dibuku nɛ dia wekelo, wɛ koka mbeya akambo w’ohomba efula wa lo Bible l’ɔkɔngɔ wa ngɔndɔ ngana ntsho, naka wɛ mbekaka oshidi ɔtɔi a tango lomingu tshɛ. Naka wɛ nangaka sɔna ɔtɛ a dui ɔmɔtshi lanɛ, kete layɔngɛnangɛna dia kɛ̂nya woho watshaso.” Naka onto ekɔ lo mengenga ɔnɛ nde bu l’etena, tɛnde ɔnɛ sho mbekaka l’anto ndo lo tshena pe. Ɛnyande biukubuku Katɔlɔmba ko wɛ mbotɛ dia nyu mbekaka wekelo ɔtɔi lo lomingu, l’edja ka taahe l’asa 15 la 30.
5 Naka sho mbidja weolo dia tatɛ mbeka l’anto Bible ndo nɔmba Jehowa dia nde tɔtshɔkɔla, kete mɛtɛ tayokondja anto wa mbeka lawɔ. (1 Joa. 5:14, 15) Naka wɛ nangaka mbetsha onto Bible, kete ɔnɛ ekɔ diaaso dia wɛ tatɛ mbeka l’ɔmɔtshi.