Dibuku Bible etshatɔ mbele ehomɔ koleki tshɛ kayotokimanyiyaka dia mbeka l’anto Bible
1 Taki mɛtɛ l’ɔngɛnɔngɛnɔ wa nongola dibuku Bible etshatɔ mɛtɛ? lo losanganya la distrikɛ laki l’ɔtɛ a dui ɔnɛ: “Okitanyiya le Nzambi!” Anto waki lo losanganya waki l’ɔngɛnɔngɛnɔ efula wa nongola onto l’onto kɔpi kande l’ekomelo ka ekongelo ka losanganya ka Lushi la samalo. Ngande wayotokamba la ehomɔ ka wetshelo k’oyoyo kɛnɛ? Dibuku sɔ diakasalema dia tokimanyiyaka dia mbeka l’anto Bible. Kânga mbele tayosha anto dibuku di’oyoyo nɛ lo Ngɔndɔ ka sato, apandjudi keketshamaka dia tatɛ kamba ladiɔ aha la tshimbatshimba dia tatɛ ndo nɔmbɔla wekelo wa Bible.
2 Anto weka laso Bible kakianɛ: Apandjudi walɔmbɔla wekelo wa Bible lo dibuku Ewo kana biukubuku Katɔlɔmba pombaka monga la shɛnɔdi dia mbeya woho akɔna ndo etena kakɔna ka tatɛ kamba la dibuku di’oyoyo nɛ lo wekelo. Naka nyeke ka tatɛ mbeka, kete nyu kokaka tsho nyomotatɛ nto l’etatelo ka dibuku di’oyoyo nɛ. Naka nyekɔ lo mbeka lo dibuku Ewo, kete nyu mbeyaka tetemala la wekelo lo tshapita yâmɛ la nyɛ yele lo dibuku Bible etshatɔ. Naka nyaya otsha l’ekomelo ka dibuku Ewo, kete ondo wɛ ayɛna dimɛna dia nyu tokoshidiya dibuku sɔ.
3 Aha la tâmu, sho tshɛ mbeyaka dia anto efula wayokoka kondja wahɔ oma lo wekelo wa dibuku Bible etshatɔ. Lande na kahayalɔmbɛ oseka onto tshɛ dia wɛ mbeka la nde Bible lo ekimanyielo ka ehomɔ kɛnɛ katɛnya akambo wa mɛtɛ wa lo Bible yema yema? Ɛnyɛlɔ wanɛ wakeke biukubuku Katɔlɔmba kana dibuku Ewo koko wahatahame polo lo ndjakimɔ ndo nongola batismu mbeyaka kombola nyomotatɛ wekelo awɔ l’ekimanyielo ka dibuku di’oyoyo nɛ. Ambutshi mbeyaka sɔna dia kamba l’okanda ɔnɛ dia kɔkɔmiya anawɔ ewo ka mɛtɛ ka lolango la Nzambi.—Kol. 1:9, 10.
4 Wekelo wa dibuku dia hende: Onde ekɔ ekongelo kɛmɔtshi k’ombeki wa Bible mbeka dibuku dia hende l’ɔkɔngɔ wa nde shidiya mbeka dibuku Bible etshatɔ mɛtɛ? Eelo. Naka mɛnamaka dia ombeki ekɔ lo tahame koko ɔkɔkɛ ɔkɔkɛ ndo nde mɛnyaka lowando lo kɛnɛ kende lo mbeka, kete wekelo wa Bible mbeyaka tetemala lo ekimanyielo ka dibuku Tɛmɔla Nzambi ɔtɔi ka mɛtɛ. Sho ndjashikikɛka dia dibuku Bible etshatɔ ayonga ehomɔ ka wolo efula lo anya aso dia kotsha ɔkɛndɛ wa mbetɛ anto ambeki.—Mat. 28:19, 20.