Woho Wakondjaso Wahɔ oma lo Kalasa k’Olimu wa Teokrasi
1 Ekambi waki Jehowa wekɔ la diɛsɛ dia nongola wetshelo wa teokrasi. (Is. 54:13; Joa. 6:45) Koko, wahɔ wakondjaso oma lɔkɔ nemanɛka mbala efula la welo wadjaso. Onde wɛ koka shihodia etombelo w’ɔlɔlɔ wamonga la Kalasa k’Olimu wa Teokrasi lo lonyuma layɛ?
2 Kɔmatɛrɛ ya Lowando: Emendji efula wa kalasa wambolembetɛ dia eokelo k’efula ka waonga w’ɔtɛkɛtshi ambokimanyiya tshumanelo diawɔ dia kondja etombelo w’ɔlɔlɔ efula l’olimu w’esambishelo. Lâdiko dia lâsɔ, omendji ɔmɔtshi wa kalasa akɛnyi dia woho wakalɔngɔswama dia ampokami mbishaka kɔmatɛrɛ lo wonya wɔmbwama awui w’ohomba w’oma lo wadielo wa Bible ambokimanyiya anto efula dia tetemala la ndjela ekongelo kawɔ ka wadielo wa Bible. Lo kɛnɛ kendana la Sawo No. 2, anangɛso efula wakasha kɔmatɛrɛ ya lowando lo wahɔ wowokondja lo mbidjaka yimba paka lo awui wahombawɔ mbadia aha la sala mbɔtwɛlɔ la ndjihelo. Wanɛ washawɔ etenyi kɛnɛ ndjashaka efula dia pamia akoka awɔ wa wadielo.—1 Tim. 4:13.
3 Anto Tshɛ Koka Kondja Wahɔ: Mbisha kɔmatɛrɛ lo nsanganya koka monga dui di’ɔngɛnɔngɛnɔ. (Tuk. 15:23) Monga la wembola w’ovuswelo la ntondo tokimanyiyaka dia nɔngɔsɔla ndo ndjonga suke dia mbisha ekadimwelo. Lâdiko dia lâsɔ, tatɛ oma lo Ngɔndɔ ka Ntondo 1, 2004, akambo w’ohomba w’oma l’abuku wa lo Bible wakatatɛ tomba lo Tshoto y’Etangelo wɔtɔnganɛ l’etenyi ka Bible kahomba mbadiema lo Kalasa k’Olimu wa Teokrasi. Asawo asɔ wambokimanyiya anto efula dia mbisha kɔmatɛrɛ yakeketsha l’awui w’ohomba w’oma lo Bible.
4 Anto tshɛ wambofundja nkombo lo kalasa wekɔ la diɛsɛ dia lânde dia nɔngɔsɔla ndo mbisha asawo. Onto tshɛ l’atei aso koka kondja wahɔ oma lo kɔmatɛrɛ y’ekeketshelo yasha omendji wa kalasa oma lo lɔyɛnga. Ambeki tshɛ kondjaka wahɔ wa lâdiko oma l’alako walongolawɔ lo woshamu oma le omendji wa kalasa. Ekambelo wele lo ekomelo ka tshapita tshɛ ya dibuku Kondja Wahɔ oma lo Kalasa k’Olimu wa Teokrasi wendana la waonga w’ɔtɛkɛtshi mbishaka ekimanyielo kekina.
5 Naka tokanyi tɔmɔtshi t’ɛlɔlɔ t’oma l’Afundelo tambokotola yambalo yayɛ wonya wa kalasa kana l’ɔkɔngɔ, kete ɔsa nɔtɛ y’awui akɔ lo dibuku diayɛ Kondja Wahɔ. Kana yimba lo kɛnɛ kekiyɛ, ndo sɛdingola woho wambokokimanyiya wetshelo w’oma le Nzambi ɔsɔ dia pamia lonyuma layɛ.