Towaele
1 Leeta lɔmɔtshi leetawɔ anto ambeta ɛnɔnyi nkama latetemalakɔ ɛlɔ kɛnɛ lo wedja 233 la lo mbɛtshi dia nkɛtɛ dia l’andja w’otondo. Leeta lakɔ lɔ lɔnɛ: “Nyuyi tumbeli lu ukungu wa [Jehowa] . . . Ndi ayututetsha akambu andi. Ku shu tayokendakendaka lu mbuka kandi.” (Is. 2:3) Nɔmbɔla anto oya l’ɔlɔngɔswamelo wa Jehowa ekɔ yoho mɔtshi yoleki ɔlɔlɔ yakokaso kimanyiya onto dia nde pama lo nyuma ko ndjokondja lɔsɛnɔ la pondjo.
2 Apandjudi amɔtshi mbeyaka mengenga dia mbelɛ anto oya lo Mbalasa ka Diolelo l’ɔtɛ w’ɔnɛ vɔ watahame dimɛna lo wekelo awɔ wa Bible. Koko, mbala efula, anto amɔtshi tatɛka mbɔtɔ lo nsanganya ya l’etshumanelo kânga la ntondo ka sho mimɛ mbeka la wɔ Bible. Tatotshimbatshimbake dia mbelɛ anto la wangasanu tshɛ ndo mbakeketsha dia vɔ ndja lo nsanganya.
3 Woho wa Ntsha: Tokambe dimɛna l’akatshi wa leeta dia mbewoya anto kɛnɛ kendana la nsanganya yaso ya l’etshumanelo. Towate dia nsanganya shɔ yekɔ ofele ndo ndoko ɛkɔngɔ wasalema. Talembetshiya woho walɔmbwama nsanganya. Talembetshiya ɔnɛ: Bible keto mbekaso lɛkɔ ndo onto tshɛ ekɔ l’ekanda wakiekaso dia nde tayelaka. Towaewoya ɔnɛ anto w’oma lo bɛkɛ tshɛ ndo wakamba elimu wotshikitanyi lo lɔsɛnɔ ndjaka lo nsanganya yakɔ. Towate dia anto akɔ mbidjasɛ l’ɛtshi kaso ka nkɛtɛ ndo ɔnɛ sho nongolaka ana wa nɔnga tshɛ. Lomingu tshɛ, sho la dia mbelɛka wanɛ weka la so Bible ndo mbakimanyiyaka lo woho tshɛ wahombama di’aha vɔ pandja nsanganya.
4 L’atei w’avɛsa w’ekomelo wa lo Bible, dimɔtshi mbelɛka anto la wangasanu dia ndjɔsa diangɔ dia lɔsɛnɔ di’oma le Jehowa: ‘Nyuma l’otshukami wekɔ lo tetemala mbuta vate: ‘Yaka!’ . . . Ɔnɛ lele la mposa aye; ɔnɛ lalanga ayɔshi ashi wa lɔsɛnɔ wɔsɔsa.’ (Eny. 22:17) Ndoko kɛnɛ koleki mbelɛ anto lo nsanganya yaso.
5 Lo pɔlɔfɛsi k’Isaya 60:8, nkama ya nunu di’atɛmɔdi wɔtɔ ɛlɔ kɛnɛ lo tshumanelo di’ekambi waki Nzambi wekɔ oko benga ‘diayaye esadi oko wange ndo oko benga oya lo tokefu tawɔ.’ Sho kokaka mbelɛ eyoyo tshɛ oya lo nsanganya yaso ndo mbalongola dimɛna. Lo yoho shɔ mbayotokamba kâmɛ la Jehowa l’etena kɛnɛ kayande shadja tsho l’olimu wa tshumanya anto.—Is. 60:22.