Ekambi w’Olimu Wekɔ lo Kamba Olimu wa Nɛmɔ
1 Lo kɛnɛ kendana l’ekambi w’olimu, dibuku Organisés pour bien remplir notre ministère mbutaka lo lɛkɛ 56 ɔnɛ: “Vɔ wakɛnya dia wakayakimɔ mɛtɛ le Nzambi. Vɔ wakɛnya mbetawɔ kawɔ nto oma l’olimu wa Diolelo wakambawɔ l’ohetoheto ndo woho wakimanyiyawɔ anto akina dia monga nge lo mbetawɔ.” Lo mɛtɛ, sunganaka sho mbokoya ɛnyɛlɔ ka lo nyuma katosha ekambi w’olimu. Kamba kâmɛ la wɔ ndo la dikumanyi ‘mbodiaka demba ndo dihikaka lo ngandji.’—Ef. 4:16.
2 Ekambi w’olimu wekɔ lo kamba olimu w’ohomba l’etshumanelo. Ohonyokanyiya elimu tshɛ wa nɛmɔ wakambawɔ, ɛnyɛlɔ oko: nama kɔntɛ, ekanda, periodikɛ, abɔnɛma, awui wendana la mbilo k’etshumanelo, nongola anto, nɔngɔsɔla loseke (micro) ndo Mbalasa ka Diolelo. Vɔ salaka asawo lo Kalasa k’Olimu wa Teokrasi ndo lo Losanganya l’Olimu. Amɔtshi l’atei awɔ mbishaka ndo alako wa lo sɛkɛ kana nɔmbɔlaka nsanganya mɔtshi ya l’etshumanelo. Oko tenyi dia demba, ekambi w’olimu wekɔ lo kamba elimu watokimanyiya mɛtɛ.—1 Kor. 12:12-26.
3 Lam’ɛna anto akina ekambi w’olimu wakamba kâmɛ la dikumanyi dimɛna oko demba ɔtɔi, walɛmiyana l’asawɔ ndo wôkana l’ɛtɛkɛta, vɔ keketshamaka dia ntsha woho akɔ wâmɛ. (Kol. 4:16) Lo kotshaka ɛkɛndɛ awɔ la kɔlamelo tshɛ lomingu la lomingu ndo lo ndjashaka vamɛ le anto akina, vɔ kimanyiyaka di’etshumanelo pama lo nyuma.
4 Ngande wakokaso mɛnya lowando laso l’ekambi w’olimu l’olimu wa wolo wakambawɔ na? Sho la dia mbekesanɛ l’ɛkɛndɛ awɔ wotshikitanyi ndo mɛnya ɔnɛ tekɔ suke dia kamba kâmɛ la wɔ naka ohomba wekɔ. Oma l’ɛtɛkɛta kana oma l’etsha, sho kokaka mbaɛnya dia sho ngɛnangɛnaka olimu awɔ. (Tuk. 15:23) Wanɛ wakamba wolo di’ɔlɔlɔ aso sunganaka nɛnyama l’otema ɔtɔi.—1 Tes. 5:12, 13.
5 Dui dia Nzambi mɛnyaka ɔkɛndɛ ndo waonga wahomba monga l’ekambi w’olimu. (1 Tim. 3:8-10, 12, 13) Olimu wa nɛmɔ w’ekila wakambawɔ wekɔ ohomba di’etshumanelo kɛndakɛnda dimɛna. Sunganaka sho keketshaka anto asɔ, oko wewɔ vɔ tshɛ ‘l’awui efula wa ntsha l’olimu wa Nkumadiɔndjɔ.’—1 Kor. 15:58.