Toho Takokayɛ Fudia Olimu Ayɛ
1 Ambeta ɛnɔnyi ndekana 40, sawo dimɔtshi diele l’ɔtɛ a dui ɔnɛ: “Wɛ Ntshaka Tshɛ. Ko Onde Lâsɔ Ambokoka?” diakatombe lo Tshoto y’Etangelo ya Ngɔndɔ ka Samalo 1, 1955. Diɔ diakɛnya lo yoho y’ɔlɔlɔ nganɛ wakoka ekambi wa Jehowa nyomodja weolo efula l’olimu dia vɔ fudia olimu awɔ wendana la Diolelo. Dako sɔ di’oshika diekɔ ohomba le so wanɛ wayatshutshuya dia ndeka kamba dimɛna.
2 Olimu aso tshɛ la dia sɛngiyama l’ɔlɛmbɛ ɔnɛ woleki woke wata ɔnɛ: ‘Wɛ pombaka nanga Jehowa Nzambi kayɛ l’otema ayɛ tshɛ, l’anima ayɛ tshɛ, la yimba yayɛ tshɛ ndo la wolo ayɛ tshɛ.’ (Mako 12:30) Sho mɛnyaka ngandji tshɛ kokaso Jehowa lo kamba la waaso tshɛ wakondjaso dia tɔla olimu ande wa Diolelo tsha la ntondo. Enda toho tayela tɔnɛ takokayɛ fudia olimu ayɛ.
3 Tɛmbɛ Ɛkɛndɛ Aso: Anangɛso kokaka ntsha tshɛ dia kotsha kɛnɛ kalɔmbama dia koma ekambi w’olimu ko l’ɔkɔngɔ kɛnɛ kalɔmbama dia vɔ koma dikumanyi. Asawo anɛ wakatombe lo Tshoto y’Etangelo ya Ngɔndɔ ka Divwa 1, 1990 wele l’ɔtɛ a dui ɔnɛ: “Onde Wɛ Kombolaka Ɔkɛndɛ?” la ɔnɛ: “Onde Wɛ Kokaka dia Kamba?,” akasɛngiya anangɛso efula dia vɔ monga l’ɛkɛndɛ l’atei w’etshumanelo. Lɔmba dikumanyi dia l’etshumanelo kanyu alako w’eshika lo woho wakokayɛ pama ndo kondja ɔkɛndɛ.
4 Tambokeketsha dikumanyi l’ekambi w’olimu wele enyemba dia kana lomba ɔlɔlɔ lo kɛnɛ kendana la Kalasa k’Olowanyelo w’Ekambi. Nyayeya akambo efula wendana la kalasa kɛsɔ lo mbadiaka wa rɛferansɛ wele l’ekanda waki la Société Watch Tower—Index (1986-1990, 1991-1994 la 1996), l’ɛse k’ɔtɛ a dui wata ɔnɛ: “Kalasa k’Olowanyelo w’Ekambi.” Onde nyu mɛnaka dia ‘lokuke la woke l’olimu’ lambodihɔ la ntondo kanyu? (1 Kor. 16:9a) Anangɛso efula wakɔtɔ kalasa kɛsɔ kɔfɔnyaka ɔnɛ wayoyokondja waɛsɛ w’olimu l’ɔkɔngɔ wa vɔ nongola apɔlɔmɛ wa lo kalasa kɛsɔ. Ɛlɔ kɛnɛ, vɔ wokamba lo Bɛtɛlɛ kana oko ambatshi mboka wotshikitanyi, waa misiɔnɛrɛ, kana oko emendji weteta.
5 Tokombole Olimu wa lo Tena Tshɛ: Ɛlɔngɔlɔngɔ l’esekaseka wanɛ wamboshidiya kalasa, wamato wotshukami ndo wanɛ wambolongola pasiɔ la dia kana lomba ɔlɔlɔ di’olimu w’ombatshi mboka. Vusola dikatshi di’okotsha di’Olimu Aso wa Diolelo wa Ngɔndɔ k’Enanɛi 1998. L’ɔkɔngɔ diko, ko wɛ sawola l’ambatshi mboka waki la lɔsɛnɔ lele oko layɛ. Ondo wɛ mbeyaka sɛngiyama dia nanula olimu ayɛ lo kamba oko ombatshi mboka, oko vɔ. (1 Kor. 11:1) Ahombayɛ ntsha dia kimɔka wenya 70 ngɔndɔ tshɛ ndo koma ombatshi mboka wa pondjo na?
6 Anangɛso l’akadiyɛso ndekana 17000 wekɔ lo kamba lo Bɛtɛlɛ l’andja w’otondo. Dikatshi di’okotsha di’Olimu Aso wa Diolelo wa Ngɔndɔ ka Sato 1995 mɛnyaka kɛnɛ kalɔmbama di’onto kamba olimu ɔsɔ. Bonde kahayadia dikatshi sɔ di’okotsha ndo ndjambola kana wɛ kotshaka kɛnɛ kalɔmbama lo kɛnɛ kendana la diɛsɛ sɔ dia lânde na?
7 Kamba Lɛnɛ Ele Ohomba Efula: Onde wɛ mbidjasɛ lo mbilo kakindjakindjama mbala efula lɛnɛ ele anangɛso wekɔ efula dia kahana wotsho ɔsɔ? Onde wɛ ambokanaka lomba dia fudia olimu ayɛ lo mbetawɔ monɔ lɛnɛ ele ohomba efula? Ondo vɔ mbeyaka kɔlɔmba dia monɔ lo ngelo ngelo mɔtshi yosukanyi layɛ lɛnɛ ele ohomba efula w’ekambi. (Mat. 9:37, 38) Aha ntsha dui sɔ l’esasesase, koko kana lomba ɔlɔlɔ lo dɔmbɛlɔ. (Luka 14:28-30) Sawola la dikumanyi la omendji w’otshimbedi dia kana wɛ kokaka ntsha dikambo sɔ. Vɔ wayokana la yɛ lomba dia menda kana wɛ kokaka monɔ kakiye ko kana tokokonga yema. Naka wɛ nangaka fundɛ la Société dia kondja kanyi lo kɛnɛ kendana la dihole diakokayɛ ntshɔ, kete mukanda ayɛ la dia ndja kâmɛ la mukanda wosinyisha Kɔmite k’Olimu ka l’Etshumanelo kanyu.
8 Lowanya Olimu Ayɛ: Sho tshɛ kokaka ndjasha efula l’olimu lo ndowanya olimu aso w’esambishelo. Onde wɛ ndjashaka lo toho takɔ tshɛ t’olimu, mbidja ndo esambishelo ka lo luudu la luudu, ka tshakitudi, wembwelo w’eyoyo ndo olimu wa mbeka l’anto Bible? Naka wɛ ekɔ lo mbeka l’onto Bible, onde wɛ kokaka ndowanya akoka ayɛ wa wetshelo? Ayonga ɔlɔlɔ wɛ vusola alako woshawɔ lo dikatshi di’okotsha di’Olimu Aso wa Diolelo wa Ngɔndɔ k’Esambele 1996, dia wɛ kamba la wɔ lo tshutshuya ambeki ayɛ dia vɔ ndjakimɔ ndo batizama.
9 Awui wendana la toho takokaso fudia ndo ndowanya olimu aso tanemaka lo tshapita 9 ya dibuku Organisés pour bien remplir notre ministère. Lo mɛtɛ, sho tshɛ kombolaka ndjakimɔ l’otema aso tshɛ l’olimu wa Jehowa. Bonde kahayakanyiya ɔlɔlɔ di’eyango ayɛ wa lo nyuma na? Ntsha oko walɔmba 1 Timote 4:15 ɔnɛ: “Utetemali lu akambu aso; uyakimo l’utema aye tshe loko, ne dia uhamelu aye wenami le antu tshe.”