Onde Wɛ Nangaka Kamba Efula?
1 Yeso akɛdika Diolelo la diangɔ di’oshinga wolo. (Mat. 13:44-46) Olimu wa pandjola lokumu l’ɔlɔlɔ la Diolelo wekɔ vɔ lawɔ la nɛmɔ di’efula. Olimu ɔsɔ sunganaka mbidjama lo dihole dia ntondo lo nsɛnɔ yaso, kânga mbele ndjasha tshɛ lɔkɔ nɔmbaka dia ndjahombia akambo amɔtshi. (Mat. 6:19-21) Onde wɛ nangaka nyomoyasha efula l’olimu wa Diolelo?
2 Tɔsɛdingole Akambo w’Ohomba Anɛ: Akambo efula wekɔ ohomba dia sho nyomoyasha efula l’olimu: (1) mbɔsa yɛdikɔ ya mbetsha wahɔ wa Diolelo lo dihole dia ntondo lo lɔsɛnɔ (Mat. 6:33); (2) monga la mbetawɔ ndo ndjaɛkɛ le Jehowa (2 Kor. 4:1, 7); (3) nyangaka ekimanyielo ka Nzambi l’alɔmbɛlɔ w’oma k’ɛse otema ndo w’etete (Luka 11:8-10); (4) ndjela ndo sala akambo wɔtɔnɛ la kɛnɛ kalɔmbaso.—Jak. 2:14, 17.
3 Toho Takokaso Fudia Olimu Aso: Sho tshɛ kokaka ndjadjɛ oyango wa mbetshaka wenya ɛmɔtshi mbala la mbala l’esambishelo ngɔndɔ tshɛ. Onde wɛ kambaka la diaaso tshɛ diakondjayɛ dia sambisha lo tshakitudi ndo salaka tshɛ dia mbɔtwɛlɔ yayɛ y’asawo nyomoleka monga amɛna? Onde wɛ nɔngɔsɔlaka waendelo ayɛ w’eyoyo dia vɔ mbisha etombelo w’ɔlɔlɔ ndo salaka la wolo dia nɔmbɔla wekelo wa Bible watahame? Onde wɛ hakoke kamba oko ombatshi mboka wa tshanda kana wa pondjo kana tokamba lɛnɛ ele ohomba efula? Naka wɛ ekɔ ɔnangɛso lambobatizama, onde wɛ hakoke nyanga dia koma okambi w’olimu kana ekumanyi? (1 Tim. 3:1, 10) Onde wɛ koka nyomofudia olimu ayɛ lo ndodja dɛmandɛ dia kamba lo Bɛtɛlɛ, dia mbɔtɔ Kalasa k’Olowanyelo w’Ekambi, kana Kalasa ka Ngiliyadɛ kalowanyawɔ wa misiɔnɛrɛ?—Luka 10:2.
4 Wakakeketsha ɔnangɛso ɔmɔtshi lakakambaka olimu wa l’emunyi wa lo tena tshɛ ndo lakayashaka efula l’awui wa tɔkɛnyɔ dia nde koma ombatshi mboka wa pondjo. Nde akatatɛ kamba olimu w’ombatshi mboka wa tshanda ndo akayalɔngɔsɔla dia kamba olimu wa lo tena tshɛ. L’ɔkɔngɔ diko, nde akayɔtɔka lo Kalasa k’Olowanyelo w’Ekambi, kakokimanyiya dia nde kamba ɛlɔ kɛnɛ oko omendji w’otshimbedi. Nde ekɔ l’ɔngɛnɔngɛnɔ heyama lo woho wakandetawɔ ekeketshelo kakawawosha, ndo nde ekɔ l’eshikikelo dia nde ekɔ l’ɔngɛnɔngɛnɔ w’efula oma lo yɛdikɔ yakandɔshi ya ndjasha efula l’olimu wa Diolelo.
5 Jehowa tshɔkɔlaka wanɛ wayakimɔ la lolango lawɔ. (Is. 6:8) Tetawɔke kânga dikambo ɔtɔi koshimba dia wɛ nyomofudia olimu ayɛ, ndo kondja ɔngɛnɔngɛnɔ ndo ekeketshelo k’efula oma lo dikambo sɔ.