Onde Wɛ Mendaka Paka Ɛnamelo Kele l’Onto Keto?
1 Wonya watatasambisha lo sɛkɛ, yoho yayotɛna anto amɔtshi mbala ka ntondo mbeyaka totsha wɔma dia mbasambisha lokumu l’ɔlɔlɔ. Oko ɛnyɛlɔ: ngande wayoyotsha naka pami kɛmɔtshi k’ɛkɛlɛkɛlɛ tokendaka nshi tshɛ la sso dia kɔlɔ lam’atoyaka dia ndjenda osukanyi ande ɔmɔtshi wakɛnya saki k’akambo wa mɛtɛ wakawosambisha na? Kadiyɛso kɛmɔtshi kakahomana la pami ka ngasɔ akɔshi yɛdikɔ ya mbosambisha. Pami kakɔ akasha kadiyɛso mɔyɔ l’esehe tshɛ. Koko, dui dia diambo ko: pami kakɔ akahokamɛ losango l’oma lo Bible ndo aketawɔ mbeka la yema ya waasaso. Etombelo wakakondja kadiyɛso lo woho wakinde komendaka paka ɛnamelo kele l’onto keto ko: pami kɛsɔ la wadiɛnde wakayomɛ mbeka akambo wa mɛtɛ.
2 Kadiyɛso kekina akandama la wɔma mbala kakɔ ɔtɔi lam’akandɛnyi ɔlɔngɔ ɔmɔtshi waki la divo di’etale woho w’anyanya koko, nde akosambishaka lo tshena pe mbala tshɛ kakandayaka lo makashinyi wakakambaka kadiyɛso. Weolo wakadje kadiyɛso akonge l’etombelo w’ɔlɔlɔ ndo wony’ɔnɛ ɔlɔngɔ ɔsɔ aya Ɔmɛnyi wa Jehowa wambobatizama. Kakɔna kakoka toshimba di’aha mbutaka esadi eto ɔnɛ onto ɔnɛ hatetawɔ losango laso na?
3 Tokoya Ɛnyɛlɔ ka Yeso: Yeso akeyaka ɔnɛ nde ayokimɔ lɔsɛnɔ lande dikambo di’onto tshɛ. Koko, nde kɔnɛmba oma lo ɛnamelo kaki l’anto akina. Nde akeyaka ɔnɛ kânga wanɛ wele la lokumu la kɔlɔ mbeyaka mbetawɔ tshikitanya lɔkɛwɔ lakiwɔ naka vɔ kondja ekimanyielo kakoka mbala la mbala. (Mat. 9:9-13) Nde akatshaka tshɛ dia kimanyiya oyadi as’ɔngɔnyi kana ase wola. (Mat. 11:5; Mako 10:17-22) Aha sho kanɛka anto wahomana la so l’esambishelo kɔlɔ oma l’ɛnamelo kawɔ, aha la sho mbeya akambo w’ɔlɔlɔ wele l’etema awɔ. (Mat. 7:1; Joa. 7:24) Kakɔna kakoka tokimanyiya dia sho ndjela ɛnyɛlɔ k’ɔlɔlɔ kaki Yeso na?
4 Oma lo wekelo aso wa Bible, tamboyɛna dia Dui dia Nzambi diekɔ la nkudu ka tshikitanya tokanyi, lɔkɛwɔ l’onto kâmɛ ndo lonto lande. (Ef. 4:22-24; Heb. 4:12) Omalɔkɔ, sho pombaka monga la dionga di’ɔlɔlɔ lam’asambishaso ndo tshika akambo akina tshɛ l’anya wa Jehowa, Ɔnɛ leya kɛnɛ kele l’etema w’anto.—1 Sam. 16:7; Etsha 10:34, 35.
5 Nyɛsɔ tosambisha weho w’anto tshɛ aha la shɔnɔdi, aha la menda ɛnamelo kawɔ, kele olimu wa dinela wa woke wasalema nshi y’ekomelo nyɛ watshu otsha la ntondo.—1 Tim. 2:3, 4.