‘Tosembɔ tɔ lo dikambo!’
1 Onde ɔtɛkɛtshi ayɛ ambokohemboyaka ɔtɛkɛta lushi lɔmɔtshi, ɛnyɛlɔ lo kotɛ ɔnɛ: ‘Alangɛ na? Ombite lo tshena pe!’ Dikambo dia ngasɔ atetshadiɔ na?
2 Nshi nyɛ, anto efula waya bu la solo dia lotutsha. Vɔ nangaka mbeya waa na weso ndo lande na kambotoya ndjowawenda. Naka vɔ ndjeya ɔnɛ takaye l’oyango wa ndjɔkɛtshanya la wɔ lo Bible, kete vɔ mbeyaka tona tohokamɛ. Anto efula hawɛnyi ohomba a walelo wa Bible ndo asawo wa lo nyuma lo nsɛnɔ yawɔ. Ngande wakokaso mbetawoya anto wa ngasɔ dia vɔ mbɔsa kânga taahe tongana toto dia kɛtshanya la so dui dimɔtshi di’ohomba lo Bible na?
3 Kɛnɛ koleki ɔlɔlɔ sho ntsha: Yoho yoleki ɔlɔlɔ sho ntsha ele: mɛnya ɔtɛkɛtshi aso ɔnɛ Bible kokaka mbôkimanyiya dia nde kandola ekakatanu ande ndo towote ngasɔ lo tshena pe. Asawo woleki dimɛna ele mboka ɔtɛkɛtshi aso dimbola diotshutshuya dia nde kana yimba, ko l’ɔkɔngɔ wɛ ndjowosha divɛsa diakadimola lo dimbola diakɔ. Ondo wɛ ayolanga pemba la tokanyi tɔmɔtshi toshawɔ lanɛ. Alako asɔ tokimanyiyaka dia ‘sembɔ tɔ lo dikambo’ aha la tshimbatshimba ndo memula saki k’ɔtɛkɛtshi aso.
4 Lo mbilo kele mbala efula anto mbutaka ɔnɛ hawɔngɛnangɛna akambo wasambishaso, wɛ mbeyaka monyiya dimbola diendana mɛtɛ l’onto:
◼ “Lam’ele tayanga mbɔtɔ l’eleko kekina, onde wɛ ekɔ l’elongamelo kɛmɔtshi kana kema? [Tshikande akadimole.] Bible ambotataki la ntondo ɔnɛ akambo watɛnya pâ wɛnaso ɛlɔ kɛnɛ kâmɛ l’etombelo w’oma l’akambo akɔ wayonga.” Adia 2 Timote 3:1, 2, 5 la Tukedi 2:21, 22.
◼ “Lo wodja aso ɔnɛ, anto ndjakiyanya efula lo woho wayonga yonge yaso ya demba lo nshi yayaye. Onde wɛ mbeyaka ɔnɛ Nzambi ayoshidiya ekakatanu tshɛ wendana la ki ka demba?” Adia Enyelo 21:3, 4.
◼ “Oko le yɛ, onde wɛ fɔnyaka dia tayonga dimɛna lo kartie kaso naka onto tshɛ kotsha awui wa lo Bible?” Adia Mateu 22:37-39.
5 Lam’ele ɔkɛndɛ aso ele sambisha lokumu l’ɔlɔlɔ la Diolelo, lo dihole tshɛ diakoka, sho pombaka kotola yambalo y’anto oya lo kɛnɛ kayosala Diolelo sɔ. Wɛ kokaka mbuta ɔnɛ:
◼ “Onde wɛ mbeyaka dia Bible, dibuku dioleki edja l’andja ɔnɛ, diakate ɔnɛ andja w’otondo wayɔlɔmbwama paka la lowandji kana diolelo ɔtɔi?” Adia Danyele 2:44.
◼ “Lo woho wafɔnyɛ, ngande wohotɔsɛnaka otonga Yeso Kristo mbalɔmbɔla lanɛ la nkɛtɛ?” Adia Osambu 72:7, 8.
6 Lo mbilo kaleka anto ndjasha l’awui w’ɔtɛmwɛlɔ, wɛ mbeyaka pemba mbɔtwɛlɔ kɛmɔtshi l’atei wa nyɛ:
◼ “Anto efula wekɔ lo kɛngishama l’ɔtɛ w’ɔnɛ akotɔ pami kana womoto, l’ɔtɛ wɔtɛmwɛlɔ awɔ kana lokoho lawɔ la demba. Oko le yɛ, Nzambi akanande lo dikambo dia lohetsho la ngasɔ?” Adia Etsha 10:34, 35.
◼ “Sho mbeyaka dia Yeso Kristo akatshe ahindo efula lo nshi yakinde lanɛ. Naka wɛ akakoke mbɔlɔmba dia nde nyomotsha dihindo dikina nto, diakɔna diohowɔlɔmba dia nde ntsha na?” Adia Osambu 72:12-14, 16.
7 Kanɛ wadihola ɔtɛkɛtshi ayɛ lokuke, wɛ koka tatɛ la sawo lo mbuta ɔnɛ:
◼ “Ɛlɔ kɛnɛ, anto efula wambɔlɛmba dia mboka di’ekakatanu wele l’anto. Vɔ nangaka anto mbatɛ nganɛ wayoshila ekakatanu akɔ. Aha la tamu, ndo wɛ mbalanga mbeya nganɛ wayowoshila. Ko lende akokaso mbeya woho wa kandola ekakatanu aso?” Tshikande akadimole. Adia 2 Timote 3:16, 17.
8 Bonde kahayahembe mbɔtwɛlɔ kɛnɛ? Mbala efula, dimbola dia wɔdu ndo dia mondo ambokokaka dia memula saki k’ɔtɛkɛtshi aso. Mama kɛmɔtshi kaki konangaka nonga losango laso akelɛ akadiyɛso ahende lo luudu lande l’ɔkɔngɔ w’ɔmɔtshi a l’atei awɔ mboka wombola ɔnɛ: “Onde wɛ kokaka mbeya Diolelo nɛ dialɔmbayɛ lo dɔmbɛlɔ dia Nkumadiɔndjɔ?” Dimbola sɔ diakemula saki kande ko nde aketawɔ mbeka Bible. Ɛlɔ kɛnɛ, nde aya okambi wa Jehowa wambobatizama!
9 Lam’asawolɛ l’ɔtɛkɛtshi ayɛ, tɛnde awui w’eshika. Tɛnde awui w’oma k’ɛse otema. Anto wayetawɔ losango laso aha l’okakatanu lam’ɛnawɔ dia sho ndjashaka mɛtɛ le wɔ.—Etsha 2:46, 47.
10 Olimu wa sambisha lokumu l’ɔlɔlɔ aya wolo efula ɛlɔ kɛnɛ. Anto amɔtshi hawoyolanga sawola l’anto wahaweye. Akina wekɔ lo diɛnɛ l’ekakatanu wa lo lɔsɛnɔ ko waya bu l’etena efula ka ntsha dikambo dikina. Koko, teye dia takakoke tana anto wakoka mbetawɔ losango laso. (Mat. 10:11) Weolo wadjaso dia mbayanga wayonga l’etombelo w’ɔlɔlɔ naka mbɔtwɛlɔ yaso ya l’asawo yayongaka tomondo ndo ‘sembɔ tɔ lo dikambo!’