Ekadimwelo lo wembola anyu

◼ Ekanda akɔna wahombaso mbeka l’anto w’eyoyo la ntondo ka vɔ ndjobatizama?

La ntondo k’onto ndjokimɔ lɔsɛnɔ lande le Jehowa ndo ndjobatizama, nde pombaka tongi l’ewo k’oshika. (Joa. 17:⁠3) Nde ayeya akambo wende l’ohomba lo mbeka biukubuku Kakɔna Katɔlɔmba Nzambi? la dibuku Ewo Katɔla Otsha lo Lɔsɛnɔ la Pondjo. Mbala efula, biukubuku Katɔlɔmba mbekawɔ l’anto ntondo. Koko, naka takamɛ mbeka l’onto lo dibuku Ewo, kete tayoyeka la nde biukubuku Katɔlɔmba l’ɔkɔngɔ wa sho shidiya dibuku Ewo. Bonde kahombaso ntsha ngasɔ na?

Biukubuku Katɔlɔmba tôkiyaka atshina a wetshelo wa lo Bible hwe. Naka sho dieka ntondo, kete ombeki ayotashihodisha ntondo kɛnɛ kalɔmba Jehowa dia mbɔngɛnyangɛnya. Ko naka nde ndjodieka l’ɔkɔngɔ, kete ayonga oko ovuswelo w’ɔlɔlɔ wa kɛnɛ kakandeke lo dibuku Ewo. Lo weho akɔ tshɛ, tokeketsha ombeki dia nde mboka sso l’avɛsa wosuke wekelo ndo kana la wɔ yimba. Lembetshiya esato wa lɔkɔ dimɛna, nɛ dia vɔ tokimanyiyaka efula lam’alakanyaso.​—⁠Enda lo Tshoto y’Etangelo ya Ngɔndɔ ka Hende 1, 1997, lɛkɛ 9-10.

Kam’ashidiya ombeki wa Bible mbeka ekanda ɛsɔ ehende, nde mbeyaka monga l’akoka wa kadimola wembola tshɛ wayovusola dikumanyi la nde dia mbɔlɔngɔsɔla otsha lo batismu. Naka ngasɔ, kete hatonga ohomba mbeka la nde lo dibuku dikina nto, koko ɔnɛ leka la nde pombaka tetemala ndjela ehamelo kande.​—⁠Enda lo Tshoto y’Etangelo ya Ngɔndɔ ka Hende 1, 1996, lɛkɛ 4, 9.