Onde Sho Kambaka la Biukubuku Katɔlɔmba dia Tatɛ Wekelo?
1 Onde sho mbeyaka dia naka sho sawolaka l’anto wɛnya nsaki asawo wa lo Bible mbala la mbala ndo lo yoho ya dimɛna lo kamba l’okanda ɔmɔtshi wekaso l’anto Bible, kete tekɔ lo nɔmbɔla wekelo wa Bible, oyadi asawo akɔ wekɔ wa lo tshena pe? Eelo, dikambo sɔ diekɔ mɛtɛ oyadi wekelo wekɔ lo salema lo luudu l’onto kana lo telefɔnɛ. Lande na kahatadje welo wa lânde lo Ngɔndɔ ka Tanu la ka Samalo dia tatɛ mbeka l’anto Bible lo yoho shɔ lo kamba la biukubuku Katɔlɔmba na?
2 Toyalɔngɔsɔlɛ dia Kondja Etombelo w’Amɛna: Lam’ashaso onto biukubuku Katɔlɔmba, teye dimɛna dikambo shikaa dialangaso sawola la nde. Naka wendelo w’oyoyo mbasalaso, kete tohɔ akambo wakatasawola mbala ketshi. Toyambole shate: ‘Naa edingɔ wa lo biukubuku wakokami ndeka kotola yambalo lɔkɔ dia shikikɛ kɛnɛ kakatasawola kɛsɔ ndo tokonya lo wekelo wa Bible’? Naka tekɔ lo tasambisha lo luudu la luudu, kete tɔsɛdingole akambo wasungana le akɛnda, le epalanga, le pami, kana le womoto. Tɔsɛdingole ɛtɛ w’awui wele lo biukubuku ndo sɔna ɔtɛ a dui wayokotola yambalo y’onto. L’ɔkɔngɔ wa sho sɔna mbɔtwɛlɔ kɛmɔtshi, tokivusole mbala efula. Ɔsɔ ekɔ dikambo dimɔtshi l’atei w’akambo wakoka tokimanyiya dia kondja etombelo w’amɛna.
3 Dikatshi di’okotsha di’Olimu Aso wa Diolelo wa Ngɔndɔ ka Ntondo 2002 diekɔ la mbɔtwɛlɔ enanɛi yɛnya “Woho wa Mbisha Anto Biukubuku Katɔlɔmba.” Kiombo yele l’ɔtɛ a dui ɔnɛ: “Woho wa Mbeka l’Onto Mbala Kakɔ Ɔtɔi” mɛnyaka woho wa kamba la biukubuku dia tatɛ mbeka l’anto Bible. Sho mbeyaka kamba la mbɔtwɛlɔ ka ntondo lo yoho nyɛ:
◼ “Onde wɛ mbeyaka dia lo minitɛ ngana tsho, wɛ koka kondja okadimwelo lo wombola ɔmɔtshi w’ohomba wa lo Bible? Ɛnyɛlɔ, lande na kambofulanɛ ɛtɛmwɛlɔ wayata vate Akristo mbewɔ? Onde wɛ atayambolaka wombola ɔsɔ?” L’ɔkɔngɔ w’onto kadimola, ko sho mbifola biukubuku Katɔlɔmba lo wekelo 13 ndo sɛdingola la nde edingɔ ehende wa ntondo. Naka wonya wekɔ, kete tadia divɛsa ɔtɔi kana ahende. Oma lâsɔ ko sho mbadia wombola wa komelo wele la diko ka dikatshi ndo mbotɛ ɔnɛ: “Etenyi kotshikadi ka wekelo mɛnyaka tolembetelo totanu tatokimanyiya dia mbeya ɔtɛmwɛlɔ wa mɛtɛ. Layɔngɛnangɛna ndjokenda nto dia sho sɛdingola tolembetelo takɔ.”
4 Totetemale: Tokambe la diaaso tshɛ dia tatɛ mbeka l’anto Bible lo biukubuku Katɔlɔmba. Tɔlɔmbɛ ekimanyielo ka Jehowa. (Mat. 21:22) Lo tetemala mbidja welo, sho koka kimanyiya onto ɔmɔtshi dia nde mbetawɔ lokumu l’ɔlɔlɔ!