‘Okonde akokami shihodia . . . naka onto hanɔmbɔdi?’

¹ Lam’akambola osambisha Filipɛ ɔlɛnga w’ose Etiyɔpiya dia kana nde ekɔ lo shihodia kɛnɛ kakandatadiaka l’Ɔtɛkɛta waki Nzambi, pami kakɔ akôkadimola ate: ‘Okonde akokami shihodia naka onto hanɔmbɔdi?’ Filipɛ akôkimanyiya l’ɔngɛnɔngɛnɔ tshɛ dia nde shihodia lokumu l’ɔlɔlɔ lendana la Yeso, dikambo sɔ akayokonyaka pami kɛsɔ dia nde batizama aha la tshimbatshimba. (Etsha 8:​26-38) Filipɛ aki lo kitanyiya didjango diaki Yeso dia ‘mbetɛ anto wa lo wedja tshɛ ambeki, lo mbaetshaka ndo lo mbabatizaka.’​—⁠Mat. 28:​19, 20.

² Sho pombaka kitanyiya didjango dia mbetɛ anto ambeki oko wakadikitanyiya Filipɛ. Koko, woho w’ehamelo k’esadi esadi kaki la ɔlɛnga w’ose Etiyɔpiya ɔsɔ haleke mɛnama l’atei w’anto weka laso Bible. Pami kɛsɔ aki ombetawudi w’ose wodja wakayɔtɔ l’ɔtɛmwɛlɔ w’ase Juda ndo nde akayeka Afundelo, nde aki l’otema wetawɔ akambo lâsɔ aki tsho ohomba wa nde mbetawɔ ɔnɛ Yeso kaki Mɛsiya wakalakema. Tongaka dikambo dia wolo efula naka wanɛ weka laso Bible hawekesanɛ la Bible, kana wambonganyiyamaka la wetshelo w’ɛtɛmwɛlɔ wa kashi ndo naka wekɔ l’ekakatanu ɛmɔtshi wa wolo. Lâsɔ, kakɔna kayotokimanyiya dia kondja etombelo w’ɛlɔlɔ lam’alɔmbɔlaso ambeki wa Bible polo lo vɔ ndjakimɔ ndo batizama na?

³ Sɛdingola ehomba wa lo nyuma waki ombeki wa Bible: Dikatshi di’okotsha di’Olimu Aso wa Diolelo wa Ngɔndɔ k’Enanɛi, 1998 tɛkɛtaka dikambo dia lofulo la wenya lahombaso mbekaka l’anto wonya wakambaso la biukubuku Katɔlɔmba kana la dibuku Ewo. Dikatshi sɔ di’okotsha toshaka dako nɛ: “Ekɔ ohomba wekelo mbiviya lo ndjela waaso ndo akoka wele l’ombeki. . . . Tatohondjake ombeki eokelo ka dimɛna l’oyango wa tshɔ lowango lowango. Ombeki tshɛ ekɔ l’ohomba wa etshina ka shika dikambo dia mbetawɔ k’oyoyo kambonga lande l’Ɔtɛkɛta waki Nzambi.” Diakɔ diele kema dimɛna dia mbeta la wekelo w’akambo wele lo dibuku Ewo lowango lowango la kanyi ya shidiya wekelo wa dibuku sɔ l’ɔkɔngɔ wa ngɔndɔ shamalo. Le anto amɔtshi, nɔmbamaka ndekanya ngɔndɔ shamalo dia vɔ kimanyiyama dia pama polo ndo lo batismu. Lam’alɔmbɔlayɛ wekelo lomingu la lomingu, ɔsaka wenya wele ohomba dia kimanyiya ombeki woho wa nde shihodia ndo mbetawɔ kɛnɛ kekande oma l’Ɔtɛkɛta waki Nzambi. Mbala mɔtshi, mbeyaka monga ohomba nyu mbɔsa mingu hiende kana shato dia shidiya tshapita ɔtɔi ya lo dibuku Ewo. Dikambo sɔ ayonyosha etena ka mbadia ndo ka nembetshiya avɛsa woshilami.​—⁠Romo 12:⁠2.

⁴ Ko ahombayɛ sala naka l’ɔkɔngɔ wa nyu shidiya dibuku Ewo ko mɛnamaka di’ombeki atonge la eokelo ka dimɛna k’akambo wa mɛtɛ ndo nde atonge suke dia mbɔsa yɛdikɔ ya sukɛ akambo wa mɛtɛ kana kimɔ lɔsɛnɔ lande le Nzambi na? (1 Kor. 14:20) Kakɔna kakokayɛ sala nto dia mbɔ̂lɔmbɔla lo mboka katɔla otsha lo lɔsɛnɔ na?​—⁠Mat. 7:⁠14.

⁵ Kotsha ehomba wa lo nyuma waki ombeki wa Bible: Naka mɛnamaka dia onto ekɔ lo tahame, kânga ɔkɔkɛ ndo ekɔ lo ngɛnangɛna kɛnɛ katandeke, kete kokaka tetemala la wekelo wa Bible lo dibuku dikina l’ɔkɔngɔ wa shidiya biukubuku Katɔlɔmba ndo dibuku Ewo. Ondo dikambo sɔ bu ohomba le osek’onto tshɛ, koko naka amonga ohomba, kete kokaka tetemala la wekelo l’abuku anɛ: Paix véritable, Tambosangana Kâmɛ l’Ɔtɛmwɛlɔ, kana lo dibuku Parole de Dieu. Apandjudi efula wekɔ l’abuku asɔ, lâsɔ vɔ kokaka kamba la wɔ naka vɔ bu l’etshumanelo. Dibuku Parole de Dieu mbele tshɔi ya dibuku yakokanyu nɔmba l’atei w’abuku asato ango. Mbala tshɛ, nyayohombaka tatɛ mbeka l’onto lo biukubuku Katɔlɔmba la lo dibuku Ewo. Oyadi kânga ombeki wa Bible ambobatizamaka la ntondo ka nde shidiya dibuku dia hende, nyu kokaka mbadia wekelo wa Bible, waendelo w’eyoyo ndo wenya wetshanyu la nde lo alapɔlɔ anyu w’olimu.

⁶ Onde kɛsɔ nangaka nembetshiya ɔnɛ wanɛ wêke ka batizama ko wakateki paka dibuku ɔtɔi to pombaka kondja ekimanyelo lo mbeka dibuku dia hende? Ah’ɔnɛ paka. Koko, ondo vɔ mbeyaka ndjɔla lo nyuma kana ndjokoma ko hawoyohama l’akambo wa mɛtɛ, ndo ondo vɔ mbeyaka ndjonga l’ohomba w’ekimanyielo woho wa mbeya kamba l’akambo wa mɛtɛ lo nsɛnɔ yawɔ dimɛna dimɛna. Pombaka mbewoya omendji w’olimu la ntondo ka tatɛ nyomeka l’opandjudi wambobatizamaka. Ko naka wɛ mbeyaka anto ɔmɔtshi wakekaka dibuku Ewo lo nshi yakete koko kopama dia koma polo ndo lo ndjoyakimɔ le Nzambi ndo batizama, ondo wɛ kokaka mbɔsa yɛdikɔ ya towaenda dia mbeya kana vɔ wâkalange nyomotetemala la wekelo awɔ wa Bible.

⁷ Mbidja osek’onto tshɛ layasha ndo leka laso Bible yimba ekɔ djembetelo ya ngandji k’Akristo. Oyango aso ele wa kimanyiya ombeki dia nde shihodia dimɛna akambo wa mɛtɛ wa l’Ɔtɛkɛta waki Nzambi. Oma lâsɔ nde kokaka ndjɔsa yɛdikɔ y’ekomelo ya sukɛ akambo wa mɛtɛ ndo ndjâkimɔ le Jehowa lo nongola batisimu ka l’ashi.​—⁠Osam. 40:8; Ef. 3:​17-19.

⁸ Onde wɛ mbohɔka kɛnɛ kakete lam’akashile batizama ɔlɛnga w’ose Etiyɔpiya? “Ndi akatshu, atangenangena” oko ombeki waki Yeso w’oyoyo. (Etsha 8:​39, 40) Nyɛsɔ sho tshɛ, kâmɛ la wanɛ wakatalɔmbɔla lo mboka k’akambo wa mɛtɛ, tɔngɛnɛngɛnɛ efula lo kambɛ Jehowa Nzambi​—⁠kakianɛ ndo pondjo pondjo!