Totamanya nɛmiya lokombo la Jehowa la dimɛna efula
1 Satana akɔnyɔla lokombo laki Nzambi lam’akandatshutshuya ambutshi aso wa ntondo dia vɔ ntsha pɛkato. Diabolo akate lo mayɛlɛ ɔnɛ Jehowa akakese Adama. (Etat. 3:1-5) Lam’ele lokombo laki Nzambi mendanaka l’akoka wele lande wa kotsha ɔtɛkɛta ande, lâsɔ ɛtɛkɛta wakate Satana waki emamatanyiya woleki tshɛ kɔlɔ. Jehowa akayɔtshaka lokombo lande oma lo nsɔnyi kakawalisha ndo lietɛ dimɛna di’efula lo woho wakandayakotshaka sangwelo diande yema yema.—Is. 63:12-14.
2 Sho tekɔ anto anɛ wele Jehowa ‘akatɔ̂lɛ lokombo lande.’ (Etsha 15:14, 17) Dui sɔ toshaka diaaso dia sho mɛnya kɛnɛ kakanaso lo dikambo di’ekidiamelo ka lokombo lakɔ. Sho mɛnaka dia lokombo la Jehowa lekɔ dimɛna efula nɛ dia lɔ lekɔ didjidji dia kɛnɛ tshɛ kele dimɛna, wɔlamu, ngandji, kɛtshi, ndo kele ɔlɔlɔ. Tekɔ la wɔma w’efula lo menda woke woke wa lokombo laki Nzambi loludi la lotombo. (Osam. 8:1; 99:3; 148:13) Dui sɔ pombaka totshutshuya dia ntsha na?
3 Teetɛ lokombo laki Nzambi ekila: Hatokoke mbetɛ lokombo laki Nzambi ekila oleki woho welɔ nɛ dia lɔ lokongaka ekila koleki tshɛ. Koko, oma lo lɔkɛwɔ laso la pudipudi ndo oma l’esambishelo ka Diolelo, sho koka mɛnya dia sho mbɔsaka lokombo laki Nzambi la nɛmɔ dioleki tshɛ. Tote shate: “Nyukaki [Jehowa] lusaka, nyetaki lukumbu landi; nyusanyiaki wedja dia etsha andi, nyuwauhulaki dia wuki wa lukumbu landi.” (Is. 12:4) Ngande wakokaso ntsha dikambo sɔ na?
4 Sho koka kamba la diaaso tshɛ diakondjaso dia mbewoya lokombo la Jehowa ndo kɛnɛ tshɛ kalembetshiyalɔ. Oyadi lo tshakitudi kana lo luudu la luudu kana lo makashinyi la makashinyi, l’ɛsɛsɛ kana lo telefɔnɛ, olimu aso w’esambishelo mbishaka Jehowa lotombo. Lam’ahomanaso l’anto wayasha ndo walanga tohokamɛ, sho la dia mbokana la wɔ lushi lahombaso kalola dia ndjowaenda ndo ndjowaetsha akambo akina efula wendana la Jehowa. Dui sɔ mɛnyaka dia hatohombe pandja lushi lakatokanyi l’onto ndo sho la dia tetemala ntsha tshɛ dia tatɛ mbeka l’anto Bible lawakawɔ. Diɛsɛ ko, ɔnɔnyi tshɛ, anto nunu nkama ndjeyaka Jehowa, ndjɔ̂lɛmiyaka ndo ndjetɛka lokombo lande la dimɛna efula ekila.
5 Woho wayakimɔso l’otema ɔtɔi l’olimu wa mbetɛ lokombo laki Nzambi ekila mɛnyaka hwe wedi akɔna weso lo kɛnɛ kendana l’ekambokambo kakatondja Satana l’Ɛdɛna. Ɔsɔ ekɔ olimu w’ɔlɔlɔ ndo woleki dimɛna tshɛ wakokaso kamba. Nyɛsɔ totamanya nɛmiya lokombo la Jehowa la dimɛna efula ndo tolitombole l’ohetoheto tshɛ!—1 Ek. 29:13.