Kalasa ka l’andja ɔnɛ la eyango ayɛ wa lo nyuma
1 Naka wɛ nongola wetshelo wa dimɛna la kalasa etena kekeyɛ ɔlɔngɔlɔngɔ kana osekaseka, kete wɛ ayonga l’akoka wahombama dia wɛ mbeya mbadia la funda dimɛna ndo wɛ ayohotɔ wekelo w’okama aso wa nkɛtɛ la diangɔ diasɛna lɔkɔ (géographie), ayohotɔ ɛkɔndɔ w’akambo wakete, akumi la siansɛ. L’edjedja ka wonya, wɛ ayoyokoka mbeka woho wa kanyiya dikambo, disɛdingola dimɛna, kandola ekakatanu, ndo tondjaka tokanyi t’ɛlɔlɔ. Kalasa ka ngasɔ kayokokimanyiya dimɛna lɔsɛnɔ layɛ l’otondo. Ngande wakoka kalasa kayɛ mbɔtɔnɛ l’eyango ayɛ wa lo nyuma ndo kokimanyiya dia wɛ kondja ‘lomba la mɛtɛ la akoka w’ekanelo ka lomba’ na?—Tuk. 3:21, 22.
2 Toyale anto wele ohomba efula l’olimu waki Nzambi: Lam’eso la kalasa, tohokɛ lotui ɔlɔlɔ lo awui walakanyawɔ ndo totshake adɛvwara aso dimɛna. Naka wɛ manyamanyaka wadielo ndo ekɔ la mbekelo y’amɛna ya wekelo, kete wɛ koka sɛdingola Dui dia Nzambi aha l’okakatanu ndo tshikalaka nge lo nyuma. (Etsha 17:11) Naka wɛ monga l’ewo k’akambo efula, kete wɛ ayokoka sawola la weho w’anto tshɛ wahomana la yɛ l’esambishelo, mbut’ate wanɛ wakole lo ngelo yotshikitanyi, wayasha l’awui a weho la weho ndo wele la tokanyi totshikitanyi. Wetshelo wakayakondja la kalasa ayokokimanyiya dia wɛ tetemala kotsha ɛkɛndɛ w’Okristo wele layɛ l’atei w’ɔlɔngɔswamelo waki Nzambi.—Enda lo 2 Timote 2:21; 4:11.
3 Eka di’aha mendɛka paka l’anya w’anto: Naka wɛ ndjasha tshɛ, kete wɛ kokaka mbeka nto dia monga l’akoka wayokokimanyiya dia wɛ ndjoyasɛnyaka l’ɔkɔngɔ wa wɛ shidiya kalasa. (Enda lo 1 Timote 5:8.) Sɔna kalasa ka wɛ mbɔtɔ dimɛna dimɛna. Lo dihole dia wɛ mbɔtɔ kalasa kele ndjongaka pâ dia wɛ tana olimu, ɔtɔ kɛnɛ kayoyokokimanyiya dia tana olimu wa dimɛna ndo wasungana. (Tuk. 22:29) Kalasa ka ngasɔ ayokokimanyiya dia wɛmɛ ndjoyasɛnyaka ɛnyɛlɔ oko naka wɛ amboyolanga ntshɔ dia tokamba olimu wa Nzambi lɛnɛ ele ohomba efula.—Enda lo Etsha 18:1-4.
4 Naka wɛ nongola wetshelo wa dimɛna lam’âkayɔtɔ kalasa, kete wɛ ayonga l’akoka wa nanula olimu ayɛ wakambɛyɛ Nzambi. Dja tshete dia wɛ mbeya djimulimu mɔtshi yayoyokokimanyiya dia wɛ ndjâsɛnya etena katayahame l’olimu wa Jehowa. Lo yoho shɔ mbayokokimanyiya kalasa dia wɛ kotsha eyango ayɛ wa lo nyuma.