Ekadimwelo lo wembola anyu

◼ Waa na wele l’ɔkɛndɛ wa mɔmbaka Mbalasa ka Diolelo?

Mbalasa ka Diolelo ka pudipudi ndo k’olangala mɛnyaka anto kɛnɛmɔ ka losango leso lo tasambisha. (Enda lo 1 Petero 2:12.) Ekɔ ohomba efula Mbalasa ka Diolelo tshikalaka pudipudi aha la mindo, ndo onto tshɛ kokaka mbidja lonya lo dikambo sɔ. Aha sho kɔma anya ko tshikɛ anto amɔtshi ato ɔkɛndɛ ɔsɔ. Mbala efula, wɔmbɛlɔ wa Mbalasa ka Diolelo salemaka lo ndjela elui wa Wekelo wa Dibuku wa l’Etshumanelo. Ndo ɔnɔmbɔdi wa wekelo wa dibuku kana ɔnɛ latɔlɔmbɔlaka naka nde bu lawɔ mbahomba mbisha ɛnyɛlɔ lo dikambo sɔ. Lo mbalasa nyɛ yasangana tshumanelo efula, dikumanyi wayokongɛ akambo dia etshumanelo tshɛ tshikaka Mbalasa ka Diolelo pudipudi.

Ngande wakokaso kotsha ɔkɛndɛ ɔsɔ lo yoho yoleki dimɛna na? Mbalasa ka Diolelo pombaka mɔmbamaka kana solamaka lo ndjela ekongelo kayowotondjaka mbala la mbala. Dihomɔ diendana l’olimu ɔsɔ pombaka monga suke suke. Listɛ l’akambo wahomba salema pombaka panema lo dihole diayohombaka wanɛ wele l’ɔkɛndɛ wa mɔmba kana sola Mbalasa ka Diolelo mboka sso. Kokaka monga listɛ hiende, listɛ la ntondo mendanaka la wɔmbɛlɔ wa Mbalasa ka Diolelo oma l’ɔkɔngɔ wa losanganya tshɛ ndo listɛ la hende mendanaka la wɔmbɛlɔ kana osolelo w’oseka tshukutshuku tshɛ ya Mbalasa ka Diolelo wayosalemalaka lomingu la lomingu. Ɔnɔmbɔdi wa wekelo wa dibuku mbahomba tondja ekongelo kendana la lushi ndo wonya wasungana le wanɛ wele l’ɔkɛndɛ ɔsɔ wa mɔmba kana sola Mbalasa ka Diolelo. Paka mbidjaka lomba mbala la mbala lo alɛmbɔlɛmbɔ ndo dɛngalɛnga dikina dia lo Mbalasa ka Diolelo. Pombaka tshikaka ɛsɛsɛ la parkingɛ hwe kana pudipudi. Ɔnɔnyi tshɛ Mbalasa ka Diolelo pombamaka solamaka dimɛna la ntondo k’anto mbɔtɔ lo losanganya la Eohwelo ka nyɔi ka Yeso. Pombaka sola adidishi la dihele, sola nd’odihe, la waa rido.

Lo mɛtɛ, sho tshɛ kokaka mbetɛ ɔkɛndɛ ɔsɔ osadi, naka hatotodjaka mindo lo mbikadjaka akatshi oyadi l’etei kana l’andja ka mbalasa. Sho kokaka mbidja diangɔ dikina dia lo luudu l’ɔnɔngɔ, ndo ditshika pudipudi l’ɔkɔngɔ wa kamba ladiɔ dikambo di’anto akina. Aha mbatshatsha akatshi kana ɛsɛkɛ kana ndanya ekala la kɔsa ya lo Mbalasa ka Diolelo. Endaka tapi, kɔsa, komba yambolana kâmɛ ndo diangɔ dikina, ewoya ɔnangɛso lele l’ɔkɛndɛ wa namaka kana nɔngɔsɔlaka Mbalasa ka Diolelo.

Sho tshɛ toyale la lolango la mbidja lonya l’olimu ɔsɔ. Ngasɔ mbayongaka Mbalasa ka Diolelo dihole dia dimɛna efula diasungana la luudu l’ɔtɛmwɛlɔ ndo tayɔsama oko anto wa pudipudi wangɛnyangɛnya Jehowa Nzambi ndo wotshikitanyi l’anto akina.​—⁠1 Pet. 1:⁠16.