Tokambe la traktɛ dia tatɛ sawola l’anto
1 Shi dia sho sambisha onto dimɛna, ekɔ ohomba sho mbeya tatɛ sawo diaso? Kɛnɛ kele wolo dia tatɛ sawola l’onto ele mbeya kɛnɛ kakokaso mbotɛ dia memula saki kande ndo mbokotola oya lo sawo diaso. Ko ngande wakokaso tatɛ sawo lo yoho y’ɔlɔlɔ na?
2 Apandjudi efula wakɛnyi ɔnɛ dia tatɛ sawo, ekɔ ohomba sɔna tɔtɛkɛta t’eshika, tshuma onto traktɛ kɛmɔtshi. Ɛtɛ w’awui wa lo traktɛ shɔ kotolaka yambalo y’anto, ndo esato w’alangi wele lɔkɔ ngɛnyangɛnyaka washo. Traktɛ hotsha onto wɔma, nɛ dia mɛnamaka dia tɔ bu l’awui efula wa mbadia. Koko, asawo wa tomondo wele lo waa traktɛ kotolaka anto ndo sho koka kamba la wɔ dia mbeka l’onto Bible.
3 Kadiyɛso kɛmɔtshi akafɔnyaka ɔnɛ: “L’andja ɔnɛ wambolola tɔ la wesanu, anto hawoleke nanga mbetsha wenya efula lo wadielo, koko traktɛ mbewoyaka nsango y’ohomba lo tshepa pe, aha l’awui wamboleka wakoka ndjôtsha ndo onto wɔma wa mboka sso lɔkɔ. Lakadia traktɛ efula, ko lakayeka akambo wa mɛtɛ.” Tatɔnyɔlake nkudu kele l’Ɔtɛkɛta wa Nzambi oko wɛnamadiɔ lo nsango yele lo waa traktɛ shɔ.—Heb. 4:12; ɛdika la Zekariya 4:10; Jakoba 3:4, 5.
4 Atako anɛi wa wɔdu: Efula wakakondja etombelo w’amɛna lo kamba la mbɔtwɛlɔ kɛmɔtshi ka wɔdu. (1) Ɛnya onto traktɛ mɔtshi ndo mbolande kɛnɛ kaleka mbɔngɛnyangɛnya. (2) L’ɔkɔngɔ w’onto sɔna kɛmɔtshi, okande wombola ɔmɔtshi w’oshika waka epole ɔsɛkɛ lo dui dimɔtshi di’ohomba diɔtɛkɛtami lo traktɛ kɛsɔ. (3) Lam’akadimolɛ wombola akɔ, adia odingɔ kana divɛsa dimɔtshi diɔtɔnɛ la wombola akɔ oma lo traktɛ. (4) Naka nde ngɛnangɛnaka, ko nyu tetemala sawola lo ɛtɛ w’awui wa lo traktɛ kakɔ kana nyu ntshɔ lo wekelo ɔmɔtshi wa lo biukubuku Kakɔna kana lo tshapita mɔtshi ya lo Ewo yalembetshiya awui akina wendana la wombola akɔ. Yoho shɔ mbakokɛ ndjokitɛ lo mbeka l’onto akɔ Bible. Alako wayela anɛ mbeyaka kokimanyiya dia wɛ ndjâlɔngɔsɔla dia mbeya kɛnɛ kayoyotɛ onto lo kɛnɛ kendana la traktɛ nyɛi nyɛ.
5 Traktɛ kele l’ɔtɛ a dui ɔnɛ “Alɔmbɔla Andj’ɔnɛ Mɛtɛ na?” ekɔ dimbola diakotola yambalo y’anto.
Naka ɔnɛ lasawola la yɛ ambokadimola dimbola sɔ ate “Nzambi” kana ɔnɛ “Handeye,” kete adia ɛnɔngɔ ehende w’etatelo wa lo lɛkɛ 2 la odingɔ wa ntondo wa lo lɛkɛ 3. Ka epole ɔsɛkɛ lo 1 Joani 5:19 la Enyelo 12:9. Naka onto mbetawɔka kana hetawɔ wôngelo wa Satana Diabolo ndo shɛngiya yele lande l’andja ɔnɛ, kete wɛ koka tetemala kana la nde yimba l’awui wele l’ɛse k’ɔtɛ a dui wahɔnyi wata ɔnɛ “Kiɔkɔ y’Akambo wa l’Andja.” Naka nde ambɛnya saki, ko wɛ mbotɛ ɔnɛ dimi nangaka kolembetshiya oma lɛnɛ akaye Diabolo, lo kamba l’awui wa lo lɛkɛ 3 ndo 4 la traktɛ kakɔ.
6 Traktɛ kele l’ɔtɛ a dui ɔnɛ “Dikongelo Diakona Diele la Wakiso wa Ngandji Wane Wakavu na?” mbeyaka memula saki k’onto mbala kakɔ ɔtɔi: Wɛ koka mbɔtshiya sawo lo mimbola ɔnɛ:
◼ “Onde wɛ fɔnyaka dia tayɛnana nto la wakiso wa ngandji wakavu?” L’ɔkɔngɔ w’onto kadimola, ko nyu ntshɔ l’odingɔ 4 wa traktɛ ndo mbadia Joani 5:28, 29. Oma lâsɔ ko wɛ mbolembetshiya dia traktɛ kɛnɛ tokimanyiyaka dia mbeya elɛwɔ ‘Nyɔi, ndo Kɛnɛ Keta l’Ɔkɔngɔ a Nyɔi,’ lo ndjela ɔtɛ a dui wa ntondo wa lo traktɛ kɛnɛ. Lɔmbande dia nyu kɛtshanya dui sɔ kâmɛ.
7 Traktɛ “Loseno l’Ongenongeno la Nkumbo” ngɛnyangɛnyaka nkumbo tshɛ: Lam’akambayɛ la tɔ, wɛ kokaka mbuta ɔnɛ:
◼ “Ondo wɛ mbetawɔka dia nkumbo kekɔ lo wâle lo nshi yaso nyɛ. Lo kanyi yayɛ, kakɔna kakoka salema dia keketsha kâmɛ ka lo nkumbo na?” L’ɔkɔngɔ w’onto kadimola, kotola yambalo yande l’awui wele l’odingɔ wa ntondo wa lɛkɛ 6. Kamba la divɛsa dimɔtshi dia lo lɛkɛ 4 la 5 la traktɛ, ndo lembetshiyande divɛsa diakɔ. Oma lâsɔ, ko wɛ mbotɛ dia lo ndjela alako asɔ wa lo traktɛ, wɛ nangaka ndjekaka la nde Bible ofele.
8 Wɛ koka kamba la traktɛ “Lande na Kahombaye Mbetawo Bible” lo sala mbɔtwɛlɔ kɛnɛ:
◼ “Anto efula wambôkaka sawo diaki Kayina la Abɛlɛ, diele lo dibuku dia ntondo dia lo Bible. Ɔkɔndɔ wa lo dibuku di’Etatelu tɛkɛtaka nto dikambo dia wadi aki Kayina. Onde wɛ atayambolaka ɔnɛ oma lende akandakondja wadi ɔsɔ?” Kamba l’odingɔ wa komelo wa lo lɛkɛ 2 la traktɛ dia wɛ mbokadimola. Lembetshiyande dia traktɛ kɛnɛ mɛnyaka nto awui w’ohomba wa lo Bible wendana la nshi yaso yayaye. Tatɛ l’odingɔ wa sato wa lo lɛkɛ 5, lo kamba l’avɛsa wasukɛ awui asɔ.
9 Aya edja efula kambotɛna dia traktɛ yatɛkɛta awui wa lo Bible yekɔ dihomɔ di’ɛlɔlɔ dia sambisha lokumu l’ɔlɔlɔ dimɛna. Nɛ dia yɔ yekɔ totshitshɛ ndo kokaka ndjiɛmba dihole tshɛ, sho koka kamba la yɔ dimɛna l’esambishelo ka lo soko la soko kana ka lo tshakitudi. Traktɛ tokimanyiyaka efula dia sho kamba olimu aso. Totshɔke la traktɛ yotshikitanyi ndo tokambake la yɔ dia tatɛ sawola l’anto.—Kol. 4:17.