Yoho ya dimɛna efula yambotondjama traktɛ y’eyoyo
1. Naa dihomɔ di’esambishelo diele la ɛnamelo k’oyoyo ka dimɛna diakatondjama?
1 Traktɛ y’eyoyo tshanu yakatondjama lo Losanganya la distrikɛ laki l’ɔtɛ a dui ɔnɛ: ‘Ɔtɛkɛta wa Nzambi wekɔ mɛtɛ!’ lakasalema lo 2013. Laadiko dia laasɔ, Nkumu ya Diolelo No. 38 kele l’ɔtɛ adui ɔnɛ: “Onde mɛtɛ anto wakavu wayɔsɛna nto?” kakakotshama l’ɔnɔngɔ wa traktɛ y’eyoyo. Traktɛ shamalo shɔ tshɛ yekɔ la ɛnamelo k’oyoyo ka dimɛna. Lande na kambotondjama traktɛ shɔ la ɛnamelo k’oyoyo? Etena kayishaso anto lo luudu la luudu, ngande wakokaso nkamba l’awui wele laadiko diayɔ?
2. L’oyango akɔna wambotondjama traktɛ lo ɛnamelo k’oyoyo ka dimɛna?
2 Lande na kambotondjama yoho y’oyoyo?: Mbala efula, dia mbɔtwɛlɔ y’eshambishelo ka luudu la luudu monga l’etombelo w’amɛna, ekɔ ohomba ndjela awui anɛi anɛ: 1) Mboka dimbola diatshutshuya onto dia mbisha kanyi yande dia ntatɛ sawo. 2) Mbadia kana mbotɛ kanyi y’oma lo Bible. 3) Mbisha ompokami traktɛ kakɔ dia nde mbadia. 4) Mbotshika la dimbola dimɔtshi dia ndjokadimola mbala kekina ndo mbokana la nde lushi la ndjowembola. Ɛnamelo k’oyoyo ka traktɛ nyɛ tokiamyiyaka dia ndjela awui anɛi asɔ aha l’okakatanu.
3. Ngande wakokaso mbisha onto traktɛ kɛmɔtshi k’oyoyo l’esambishelo?
3 Woho wa nkamba la yɔ: 1) L’ɔkɔngɔ wa mbisha ompokami mɔyɔ, ɛnyande dimbola di’ohomba diele l’ekadimwelo efula diele laadiko wa traktɛ ndo mbolande kanyi yande. 2) Fola traktɛ ndo sɛdingola la nde awui wele lam’ofudjiwɔ ɔnɛ: “Kɛnɛ kata Bible.” Adia divɛsa diele laawɔ mbala kakɔ ɔtɔi oma lo Bible naka kokaka. Naka ompokami ayɛ ekɔ l’etena, ko wɛ kɛtshanya lande awui wele lam’ofundjiwɔ ɔnɛ: “Ɛlɔlɔ wakokayɛ nkondja.” 3) Shande traktɛ kakɔ ndo keketshande dia mbadia awui akina. 4) La ntondo ka nyu kakitɔna, ɛnyande dimbola diele lo lɛkɛ l’ekomelo l’ɛse ka “Dimbola dia nkana la diɔ yimba” ndo okana la nde lushi la nyu ndjɔkɛtshanya okadimwelo washa Bible.
4. Ngande wakokaso ndjokamba la traktɛ lo wendelo w’oyoyo?
4 Bu wolo nkamba la traktɛ nyɛ dia nsala wendelo w’oyoyo. Wɛ koka tsho nkamba la avɛsa woshilami lo dikatshi di’ekomelo dia traktɛ dia nkadimola dimbola diakayotshikɛ. La ntondo ka nyu kakitɔna, kotola yambalo yande oya lo biukubuku Lokumu l’ɔlɔlɔ, ɛnyande yɔ ndo wekelo wa lɔkɔ wele l’awui akina efula wɔtɔnɛ la sawo dianyu ndo shande yɔ. Naka nde ambetawɔ ndjiɔsa, okana la nde dia nyu ndjɔkɛtshanya awui wele lo biukubuku yakɔ mbala kayaye. Ɔsɔ mbelɛwɔ ntatɛ wekelo wa Bible l’onto. Kana lo dihole dia mbosha biukubuku, wɛ koka mbosha traktɛ kekina ndo mbokana la nde dia nyu ndjɔkɛtshanya awui wele lɔkɔ.
5. Ohomba akɔna wele la traktɛ l’olimu aso w’esambishelo?
5 Aya ɛnɔnyi ndekana 130 wakambaso la traktɛ l’esambishelo. Kaanga mbotshikitanyiyɔ lo weke kana lo ɛnamelo, yɔ yokongaka nshi tshɛ ehomɔ konga l’etombelo w’ɛlɔlɔ l’esambishelo. Ɔnkɔnɛ, nyɛsɔ tokambake dimɛna la traktɛ yele la ɛnamelo ka dimɛna yambotondjama dia ntetemala dianganya ewo k’oma lo Bible lo nkɛtɛ k’otondo.—Tuk. 15:7a.