Tokambake la traktɛ dia dianganya lokumu l’ɔlɔlɔ
1. Ngande wakakambaka ekambi waki Nzambi la traktɛ?
1 Ekambi wa Jehowa wakatatɛ nkamba la traktɛ edja efula dia dianganya Lokumu l’ɔlɔlɔ. Lo 1880, Charles Russell nde l’asekande wakatatɛ ntondja traktɛ kaki l’ɔtɛ wa dui wata ɔnɛ: Traktɛ y’Ambeki wa Bible (l’Angɛlɛ) ndo wakakisha ambadi wa Tshoto y’Etangelo dia vɔ kahɛ anto. Traktɛ yaki ohomba efula woho ɔnɛ wele lo 1884, etena kakafundja Charles Russell tshunda dimɔtshi diakandakenge lo buku dia lɛɛta dia ntɔla wahɔ wa Diolelo otsha la ntondo, tshɛkɛta “Traktɛ” yakatanemaka lo lokombo la tshunda diakɔ diakelamɛka ɔnɛ: Zion’s Watch Tower Tract Society dielamɛ nshi nyɛ ɔnɛ: Watch Tower Bible and Tract Society of Pennsylvania. Lo 1918, Ambeki wa Bible wakakahanya traktɛ ndekana miliyɔ 300. Traktɛ yekɔ lo ntetemala monga dihomɔ dionga l’etombelo w’ɛlɔlɔ l’esambishelo.
2. Lande na konga traktɛ l’etombelo w’ɛlɔlɔ?
2 Lande na kongayɔ l’etombelo w’ɛlɔlɔ? Traktɛ yekɔ la asango w’amɛna efula ndo yɔ kotolaka yambalo y’anto. Losango la lo tshena pe lele lɔkɔ kotolaka yambalo y’anto ndo lekɔ ohomba efula. Wanɛ wɛna wolo mbadia periodikɛ kana abuku ngɛnangɛnaka traktɛ. Traktɛ bu wolo mbisha anto, kaanga le eyoyo l’ana w’akɛnda. Ndo nto, traktɛ yekɔ totshitshɛ ndo yɔ mɛmbamaka aha l’okakatanu.
3. Kɔndɔla ɛnyɛlɔ kayɛ hita kana k’oma l’ekanda aso kɛnya ohomba wele la traktɛ.
3 Anto efula wakeye akambo wa mɛtɛ ntondo l’ekimanyiyelo ka traktɛ. Ɛnyɛlɔ, womoto ɔmɔtshi l’ose Haïti akɛnyi traktɛ kaso kɛmɔtshi lo shinga, akakitɔngɔna, akakiada ndo akate ate: “Lamboshola akambo wa mɛtɛ.” Oma laasɔ, nde akatshu lo Mbalasa ka Diolelo, akatatɛ mbeka Bible ndo akayobatizamaka paka oma lo wolo wele la Ɔtɛkɛta wa Nzambi watanema lo traktɛ.
4. Naa oyango wele la so etena kakahanyaso traktɛ lo ngɔndɔ katɔlɔmbawɔ dia ndjikahɛ anto?
4 Lo luudu la luudu: Lam’ele traktɛ yekɔ dihomɔ dionga l’etombelo w’ɛlɔlɔ l’esambishelo, tayoyishaka anto mbala la mbala ntatɛ oma lo Ngɔndɔ ka dikumi l’ɔtɔi. Oyango aso kema tsho wa mbisha ompokami aso traktɛ koko ndo wa nkamba la yɔ dia tatshiya sawo. Naka onto ambɛnya nsaki mbala ka ntondo kasawolaso la nde kana lo wendelo w’oyoyo, kete sho kokaka mbɛnya woho wekaso l’anto Bible lo nkamba la dibuku Bible etshatɔ kana okanda okina wekaso l’anto Bible. Ngande wakokaso nkahanya traktɛ l’esambishelo ka lo luudu la luudu? Oko weso la weho wa traktɛ efula, ekɔ ohomba sho mbekesanɛ dimɛna la nyɛ yakahanyaso.
5. Ngande wakokaso mbisha anto traktɛ etena keso l’esambishelo ka lo luudu la luudu?
5 Mbɔtwɛlɔ kaso pombaka mbɔtɔnɛ l’awui wa l’ɛtshi kaso ka nkɛtɛ ndo la traktɛ kakahanyaso. Sho kokaka ntatɛ nsawola l’onto lo mbosha traktɛ. Sango dia dimɛna diele lo dikatshi dia ntondo kokaka nkotola yambalo yande. Sho kokaka mbɛnya traktɛ yotshikitanyi ndo mbotshika dia nde nsɔna kɛnɛ kayowɔngɛnyangɛnya. Etena katatasambisha l’ɛtshi ka nkɛtɛ kele anto tonaka ndjihola nkuke yawɔ, sho kokaka nkimɛ traktɛ lo yoho yayokoka ompokami aso mɛna lohoso latɔ kana sho koka mbɔlɔmba dia mbɛnya yangɔ mɔtshi l’ɛse ka lokuke l’oyango wa nde mbisha kanyi yande. Naka ɔtɛ wa dui wele lo traktɛ wekɔ dimbola, kete sho kokaka mbɔlɔmba dia nde mbisha kanyi yande. Kana sho kokaka mbooka dimbola l’ɛtɛkɛta aso hita diakoka nkotola yambalo yande ndo mbokotola oya lo sawo. Sho kokaka mbadia kaamɛ l’ompokami aso awui amɔtshi wa lo traktɛ, memala yema ahole wele ambola ndo mbɔɔlɔmba dia nde mbisha kanyi yande. Nyu koka mbadia avɛsa w’ohomba oma lo Bible. L’ɔkɔngɔ wa nyu nsɛdingola awui amɔtshi wa lɔkɔ, sho kokaka nkomiya sawo ndo mbokana la nde lushi lakokaso nkalola ndjowenda. Naka ase etshumanelo kanyu mongaka la mbekelo ka tshikɛ anto wahatanema lawakawɔ ekanda, kete wɛ kokaka mbotshikɛ traktɛ la mayɛlɛ tshɛ diaha anto akina mɛna.
6. Ngande wakokaso nkamba la traktɛ l’esambishelo ka lo toshinga?
6 Esambishelo ka lo toshinga: Onde wɛ ambokambaka la traktɛ l’esambishelo ka lo lo toshinga? Ambetshetshi amɔtshi mongaka prɛse ndo bu suke dia nsawola la so. Diakɔ diele ekɔ wolo dia sho mbeya kana mɛtɛ vɔ ndjashaka. Lo dihole dia sho mbasha periodikɛ keke katomba aha la mbeya kana vɔ koka tokiada kana bu, shi ayoleka dimɛna sho mbasha traktɛ? Lam’ele lohoso la traktɛ kotolaka yambalo y’anto ndo tɔ mongaka la losango la lo tshena pe, nsaki ka mbeya dikambo koka tshutshuya anto dia mbadia traktɛ lam’ewɔ la yema y’etena. Lo mɛtɛ, naka vɔ bu prɛse, kete sho kokaka nkɛtshanya la wɔ awui amɔtshi wa lo traktɛ.
7. Sha bɛnyɛlɔ dimɔtshi diɛnya woho wa nkamba la traktɛ etena katatasambisha lo tshakitudi?
7 Esambishelo ka lo tshakitudi: Kema wolo nsambisha lo tshakitudi lo nkamba la traktɛ. Ɔnangɛso ɔmɔtshi ekɔ la mbekelo ka mbidjaka traktɛ lo dibenga etena tshɛ katombande oma la ngelo. Etena kahomanande l’onto ɔmɔtshi, ɛnyɛlɔ kapita, ko nde mbotɛ ɔnɛ dimi nangaka kosha yangɔ mɔtshi, oma laasɔ ko nde mbosha traktɛ kɛmɔtshi. Etena kakatshu wadi l’omi amɔtshi la New York dia tɔsɛnya washo, vɔ waki l’eshikikelo dia wayotohomana l’anto w’oma lo wedja wotshikitanyi. Diakɔ diakawatshu la biukubuku Nations ndo la traktɛ efula l’ɛtɛkɛta wotshikitanyi. Oma laasɔ, etena kakawokaka onto ɔmɔtshi lasondja diangɔ l’omamu wa mboka, latɛkɛta ɔtɛkɛta ɔmɔtshi wahaweye kana onto lodjashi suke la wɔ lo dihole dialongawɔ wa nyama kana lo rɛstora, vɔ wakawoshaka traktɛ ka l’ɔtɛkɛta ande wa lootɔ.
8. Lo yoho yakɔna yɛdikama traktɛ la woho?
8 ‘Oonɛke woho ayɛ’: Traktɛ koka mbɛdikama la woho. Omboki wa woho atokaka woho efula nɛ dia nde heye lɔtɔngɔ layotomba ndo layola. Ondaki 11:6 mbutaka ɔnɛ: “Uneki wuhu aye la pindju. Tushaki lunya laye mumuya la dikolo, ne dia we heyi kana kene kana keku kayuluwana, kana vo ahendi wayula ololo.” Ɔnkɔnɛ, nyɛsɔ ‘totetemale dianganya ewo’ lo kambaka la traktɛ nɛ dia yɔ mongaka l’etombelo w’ɛlɔlɔ l’esambishelo.—Tok. 15:7.
[Efundelo wa l’etei w’odingɔ wa lo lɛkɛ 3]
Lam’ele traktɛ yekɔ dihomɔ dionga l’etombelo w’ɛlɔlɔ l’esambishelo, tayoyishaka anto mbala la mbala ntatɛ oma lo Ngɔndɔ ka dikumi l’ɔtɔi