Onde wɛ ekɔ la yimba ya ndjahombia?
1 Naka tekɔ la lowando lo kɛnɛ kakatshelɛ Yeso Kristo anto la lokaho tshɛ, kete tayotshutshuyama dia kamba l’akoka wakiso ndo la wolo aso la yimba ya ndjahombia. Afundelo tɔlɔmbaka ɔnɛ: ‘Nyolambole alemba anyu oko olambo wasɛna, w’ekila, ndo wangɛnyangɛnya Nzambi.’ (Romo 12:1) Naka wɛ ayoyasɛdingolaka esangɔ l’esangɔ, kete wɛ ayɛnya dia kana wɛ kɛnɛmɔlaka dimɛna woho wa yimba shɔ lo ndjela waaso wele layɛ.
2 Lo eyanga ewo ka lo Bible: Onde wɛ ndjaombɛka yema ya wenya mbala la mbala dikambo dia wadielo ndo wekelo ayɛ wa Bible? Onde wɛ nɛmiyaka ekongelo kɛsɔ? Onde w’ekɔ la mbekelo ka nɔngɔsɔlaka nsanganya ya l’etshumanelo? Naka owandji wa nkumbo mbeyɛ, onde wɛ mbekaka Bible esangɔ l’esangɔ kâmɛ la wa lo luudu layɛ? Dia sho ntsha akambo asɔ, ekɔ ohomba sho mbɔsa wenya ɛmɔtshi oma lo wenya wetshaso dia menda ponde, kɛnya damɛ kana longanda kana l’elimu ekina. Omalɔkɔ, wɛ ayɛna dia ndoko ɛngɔ k’ɔlɔ koshishishɛ, naka wɛ mbeya ɔnɛ etena ketshayɛ lo mbeka Ɔtɛkɛta waki Nzambi kayokokimanyiya dia kondja lɔsɛnɔ la pondjo!—Joa. 17:3.
3 Lo mbetshaka anayɛ: Etena koleki ɔlɔlɔ ka tatɛ mbeka woho wa monga la yimba ya ndjahombia ele lam’eke onto dikɛnda. Etsha ana ayɛ wate, oko wele etena ka kɛnya kekɔ mbele ndo etena ka kamba elimu wa laa ngelo ndo wa teokrasi kekɔ. (Ef. 6:4) Shakawɔ tolimulimu tɔmɔtshi t’ohomba ta laa ngelo. Sala ekongelo ka tombaka kâmɛ la wɔ mbala la mbala l’esambishelo. Keketsha wetshelo wawashayɛ lo mbasha ɛnyɛlɔ k’ɔlɔlɔ.
4 Lo elimu wa l’etshumanelo: Etshumanelo mongaka l’ɛtshɔkɔ etena kayakimɔ onto tshɛ la lolango dia sala akambo amɔtshi lo ɔlɔlɔ w’anto tshɛ. (Heb. 13:16) Onde kokaka wɛ mbetsha wenya efula l’olimu w’esambishelo ka Diolelo ndo wa mbetɛ anto ambeki? Onde wɛ kokaka ndjakimɔ la lolango dia kimanyiya ase hemɔ kana esombe, mbala mɔtshi lo mbakimanyiya dia vɔ ndja lo nsanganya?
5 La ntondo ka Yeso ndjokimɔ olambo woleki tshɛ wa lɔsɛnɔ lande l’onto, nde akalake ambeki ande dia mbika washo awɔ lo wahɔ wa Diolelo, ko tshindja awui akina tshɛ wa lo lɔsɛnɔ lo dihole dia hende. (Mat. 6:33) Naka sho ntsha tshɛ dia monga la yimba shɔ ya ndjahombia, kete tayokondja ɔngɛnɔngɛnɔ efula lam’atatatetemala kambɛ Jehowa l’ɔngɛnɔngɛnɔ.