Nsanganya Y’olimu Ya Ngɔndɔ Ka Ntondo
Lomingu la Ngɔndɔ ka Ntondo 5
Taahe 10: Waewoyelo. Waewoyelo wa l’Olimu Aso wa Diolelo.
Taahe 15: “Tɔtɛkɛtɛ Dikambo dia Jehowa Lushi Tshɛ.” La wembola ndo ekadimwelo. Lam’asɛdingolanyu odingɔ 4, nyosha kɔmatɛrɛ y’oma lo dibuku Manuel pour l’École, wekelo 16, odingɔ 14-16.
Taahe 20: “Bible: Ehomɔ Kakasha Nzambi Anto Tshɛ dia Mbâlɔmbɔlaka.” Ekumanyi kɛmɔtshi asɛdingole sawo diakɔ kâmɛ ndo ɛkɔkɔ wahomba tshutshuya onto tshɛ dia mbɛkama Bible. (Enda biukubuku Un livre pour tous, lɛkɛ 30, 32.) Kɔnya apandjudi ahende lo tshena pe dia vɔ nembetshiya woho wayâlɔngɔsɔlawɔ dia kamba l’alako woshawɔ l’odingɔ 3-8. Nyosale ɛnyɛlɔ kɛmɔtshi k’ɔsami l’odingɔ ɔmɔtshi l’atei a wengo dia mɛnya woho wa sawola l’onto mbala ka ntondo ka pomana la nde ndo ɛnyɛlɔ kekina ka diembwelo.
Osambu 165 ndo dɔmbɛlɔ dia ndjihelo.
Lomingu la Ngɔndɔ ka Ntondo 12
Taahe 10: Waewoyelo. Alapɔlɔ wa falanga.
Taahe 20: Lande na mbishola kɛnɛ kele kɔlɔ? Dako oma le ekumanyi, di’oma lo Tshoto y’Etangelo ya Ngɔndɔ k’Enanɛi 15, 1997, lɛkɛ 26-30.
Taahe 15: “Naka Wɛ Haye, Anto Tshɛ Mbeyaka!” Ekumanyi kɛmɔtshi alɔmbɔlɛ ɔkɛtshanyelo wa l’ampokami. Ta lofulo la l’atei atei l’anto wɔtɔ lo nsanganya y’etshumanelo. Sɛngɔla anangɛso l’akadiyɛsɔ amɔtshi dia vɔ nembetshiya bonde kakeketshamawɔ oma lo woho wasanganawɔ lo mbalasa ka Diolelo.
Osambu 172 ndo dɔmbɛlɔ dia ndjihelo.
Lomingu la Ngɔndɔ ka Ntondo 19
Taahe 5: Waewoyelo.
Taahe 15: Ehomba wa l’etshumanelo.
Taahe 25: “Totohomba Monga Embetsha, Aha Paka Esambisha Eto.” La wembola ndo ekadimwelo. Lam’ayonyɔsɛdingola odingɔ 11, nyadia lo dibuku Manuel pour l’École, wekelo 15, odingɔ 11.
Osambu 174 ndo dɔmbɛlɔ dia ndjihelo.
Lomingu la Ngɔndɔ ka Ntondo 26
Taahe 8: Waewoyelo. Ohola apandjudi dia vɔ ndja la dikatshi di’okotsha di’Olimu Aso wa Diolelo wa Ngɔndɔ ka Hende 1998 lo losanganya lomingu layaye.
Taahe 17: “Kalasa k’Olimu wa Teokrasi lo 1998.” Dako oma le omendji wa kalasa. Lembetshiya woho wokoki onto tshɛ kondja wahɔ efula oma lo kalasa kakɔ l’ɔnɔnyi wayaye. Keketshawɔ dia onto tshɛ tetemala la ndjela “Ekongelo Kekina ka Walelo wa Bible” lomingu tshɛ.
Taahe 20: Tosambisha Lokumu l’Ɔlɔlɔ lo Dihole Tshɛ. Ɔkɛtshanyelo kâmɛ l’ampokami oma lo dibuku Notre ministère, lɛkɛ 93-7, l’ekimanyielo ka wembola ɛnɛ: (1) Bonde kele kamba l’ekanda aso ekɔ dimɛna efula lo dianganya lokumu l’ɔlɔlɔ? Lande na kahombaso mbisha anto ekanda akɔ lo diaaso tshɛ? (2) Bonde kahombaso ndjâtshutshuya dia sambisha lo yoho ya tshakitudi? Naa toho tɔmɔtshi ta sambisha lo tshakitudi? (Mbola apandjudi dia vɔ kɔndɔla awui amɔtshi wakawɛnyi l’esambishelo ka tshakitudi.) (3) Bonde kahomba etshumanelo ndjasha tshɛ lo kindjakindja dimɛna lo mbilo k’otondo kakawawasha? Bonde kele lɛnɛ ele olimu nshi tshɛ, ekɔ dimɛna onto monga la mbilo kande hita? (4) Naa wahɔ wakondjaso oma lo tɛdikɔ tɔsama dia sambishaka l’olui na? Ngande wakokaso kongɛ olimu aso w’esambishelo lo yoho ya sho kamba la wenya aso dimɛna efula?
Osambu 222 ndo dɔmbɛlɔ dia ndjihelo.
[Caption on page 3]
Hika Lɔsɛnɔ Layɛ L’olimu Wa Jehowa
1 Yeso akɛdinya ampokami ande la ambiki a mvudu ahende. Ɔmɔtshi akahike lɔsɛnɔ lande lâdiko dia dive dia kitanyiyaka Kristo ndo akakoke shika ekolo lam’akaye lɔpɛpɛ la wekamu ndo fɔnu. Okina akahike lâdiko dia lɔsɛnga nɛ di’ohedia ande ndo kokoka memala lam’akaye ehemba. (Mat. 7:24-27) Lam’ele tekɔ lo sɛna l’ekomelo ka dikongɛ nɛ di’akambo, sho pomanaka la pɛpɛ efula y’oma le otunyi. Wange w’edima wa fɔnu ka woke wekɔ lo tshumana esadi esadi l’ehotwelo ka wonya. Onde tayokikɛ polo l’ekomelo aha la mbetawɔ kaso tɛwɔ? (Mat. 24:3, 13, 21) Dui sɔ nemanɛka efula la woho wahikaso nsɛnɔ yaso ɛlɔ kɛnɛ. Ɔnkɔnɛ, ekɔ ohomba efula sho ndjambola ɔnɛ: ‘Onde dimi lekɔ lo pika lɔsɛnɔ lami l’Okristo lo kambɛ Nzambi l’okitanyiya?’
2 Pika nsɛnɔ yaso l’olimu wa Jehowa kɛdikɛdi na? Kɛdikɛdi kitsha Jehowa lo dihole dia ntondo lo nsɛnɔ yaso. Dui sɔ tɔlɔmbaka dia sho ndeka ndjasha l’olimu wa Diolelo. Diɔ nemanɛka ndo l’okitanyiya le Nzambi lo kɛnɛ tshɛ katshaso lo lɔsɛnɔ laso la lushi la lushi. Diɔ tɔlɔmbaka nto dia mbidja otema aso tshɛ lo wekelo w’onto ndamɛ, wa lo nkumbo, lo wekelo wa Bible wa l’etshumanelo ndo l’esambishelo, mbut’ate mbetsha akambo asɔ lo dihole dia ntondo. (Und. 12:13; Mat. 6:33) Dia tetemala la kitanyiya awui asɔ, mbetawɔ kaso pombaka pikama lâdiko dia dive dia wolo diahatonyukɔ lam’ayodiɔkɔmama pɛpɛ y’oma l’otunyi.
3 Ekɔ ɔlɔ efula dia mɛna miliyɔ y’anto wahika nsɛnɔ la elongamelo kawɔ ka lo nshi yayaye l’olimu wa Nzambi, oko akatshe Yeso. (Joa. 4:34) Vɔ ndjelaka ekongelo ka Teokrasi l’akambo tshɛ ndo kondjaka ɛtshɔkɔ wa mamba lɔkɔ. Mama kɛmɔtshi akate woho wakawodja anawɔ ahende w’apami nde l’omende dia vɔ kambɛ Jehowa ate: “Takalodja lɔsɛnɔ laso la mɛtɛ: lo ntshɔka lo nsanganya ya weke tshɛ, ntshɔka lo nsanganya ya l’etshumanelo, ndo ndjilɔngɔsɔlaka ndo sambishaka tena tshɛ.” Omɛnde akakotsha ate: “Mɛtɛ bu etenyi kɛmɔtshi ka lo lɔsɛnɔ laso, koko tɔ kekɔ tshondo ya lɔsɛnɔ laso. Oseka ɛngɔ tshɛ mendanaka la tɔ.” Onde ndo wɛ kokaka mbetsha olimu wa Jehowa lo dihole dia ntondo lo nkumbo kanyu?
4 Kahanya Wenya wa lo Lomingu lo Yoho Yasungana: Ɔlɔngɔswamelo waki Jehowa tokimanyiyaka dia monga la mbekelo k’ɔlɔlɔ k’akambo wa lo nyuma lo tɔlɔngɔsɔlɛ nsanganya tshanu lo lomingu. Akristo wahika nsɛnɔ yawɔ l’ɔtɛmwɛlɔ wa Jehowa nɔngɔsɔlaka akambo awɔ wa l’emunyi la wa lo nkumbo lo yoho yahawakoke pandja nsanganya shɔ tshɛ y’ohomba. Vɔ hawotshikɛ akambo wele bu ohomba efula etena ka mbafukutanyɛ wɔ̂twɛlɔ awɔ wa lo nsanganya.—Fil. 1:10; Heb. 10:25.
5 Akristo wambotshunda mbeyaka ɔnɛ oko wahombaso ndɛka mma nshi tshɛ lo wenya ɛmɔtshi weyama, woho akɔ mbahombaso memɛ ekongelo k’oshika ka wekelo w’onto ndamɛ ndo wa lo nkumbo, kamɛ ndo ka nɔngɔsɔlaka nsanganya. (Mat. 4:4) Onde wɛ koka ndjaombɛ taahe 15 kana 20 lushi tshɛ dia wɛmɛ mbekaka Bible? Okanga wa tondoya ekongelo kɛsɔ ele: aha akambo akina mbɔsa etena kakayaombɛ dia wekelo. Ɔsɔ onge mbekelo k’ɔlɔlɔ le yɛ. Dui sɔ mbeyaka kɔlɔmba dia memɔka esadi oleki wonya wokoyemɔka. Ase nkumbo ka Bɛtɛlɛ 17 000 wele l’andja w’otondo memɔka ko pindju ka pɛ dia ndjɔsɛdingola divɛsa dia lushi. Mɛtɛ, dia memɔ esadi pombaka monga la ekongelo kasungana ka wonya wa ndalaka woho wa wɛ mumuya dimɛna ko memɔ la demba dia wolo la pindju.
6 Naka wɛ ekɔ owandji wa nkumbo, kete tatɛ la memɛ ndo nɔngɔsɔla ekongelo k’elimu wa Teokrasi lo nkumbo kanyu. Nkumbo mɔtshi mbadiaka Bible, Annuaire, kana okanda okina kâmɛ l’ɔkɔngɔ wa mma dia dikɔlɔ. Ambutshi efula wambɛna anawɔ wambôla waya Akristo wele nge lo nyuma mbutaka ɔnɛ dui dimɔtshi diakâkimanyiya dia vɔ monga ngasɔ ele: mbekelo kaki la nkumbo kawɔ ka ndjaombɛka dikɔlɔ dimɔtshi lomingu tshɛ dia vɔ keketshana kâmɛ lo nyuma. Papa kɛmɔtshi kakemɛ ekongelo ka ngasɔ akate ate: “Dimi fɔnyaka nte kɛnɛ kakaleke pamia anaso lo nyuma ko, wekelo aso wa Bible wakatatatɛ ntsha lo nkumbo mbala la mbala Lushi la Sato tshɛ, ambeta ɛnɔnyi oko 30.” Anande akɔ asato wambobatizamaka oma ko akɛnda, l’ɔkɔngɔ, vɔ akɔ asato wakayɔtɔ l’olimu wa lo tena tshɛ. Lâdiko dia wekelo wa lo nkumbo, kokaka vusola asawo wa lo losanganya kana wa l’olimu w’esambishelo, ndo nyu kokaka ntsha elimu ekina tshɛ kâmɛ.
7 Lo ekongelo kayɛ ka lomingu la lomingu, onde wɛ ‘akayasombɛ etena,’ dikambo di’esambishelo ka Diolelo? (Kol. 4:5) L’atei aso, efula wekɔ l’elimu wa mamba lo lɔsɛnɔ. Amɔtshi pombaka kokɛ nkumbo yawɔ ndo kotsha ɛkɛndɛ wele lawɔ. Naka hatongi l’ekongelo k’oshika ka sambishaka ndo mbetshaka lomingu tshɛ, kete akambo akina wayekamɛ olimu ɔsɔ w’ohomba efula. Pami kɛmɔtshi kakalongaka ngɔmbɛ efula akate ate: “Oya l’ɔnɔnyi wa 1944, dimi lakɛnyi dia yoho yamɛ yakamahombe ndjasha l’olimu aki sɔna lushi lɔmɔtshi dikambo di’olimu akɔ. Lomingu tshɛ, dimi lakɔsaka lushi ɔtɔi dikambo di’olimu.” Ekumanyi kɛmɔtshi k’Okristo ambɛna dia woho wende l’ekongelo k’ɔlɔlɔ dikambo di’esambishelo mbokimanyiyaka dia sambisha yɛdikɔ y’eshidi 15 lo ngɔndɔ. Naka nde ambɛna dia nd’ekɔ l’olimu wa l’emunyi wa sala Lushi la Samalo, nde akatshɔka ntondo la pindju l’esambishelo, ko l’ɔkɔngɔ nde ndjosala olimu akɔ. Onde wɛ la nkumbo kayɛ hanyokoke sɔnaka lushi lɔmɔtshi lomingu tshɛ dia sambishaka, lo mbɔsa dikambo sɔ oko etenyi kɛmɔtshi ka lo lɔsɛnɔ lanyu la lo nyuma?—Fil. 3:16.
8 Tɔsɛdingole Yoho Yasɛnaso: Ekɔ akambo amɔtshi watoshimba dia sho mpika nsɛnɔ yaso l’olimu wa Jehowa. Akambo wa shashimoya mbeyaka fukutanya ekongelo kaso kendana la wekelo, nsanganya ndo olimu w’esambishelo. Ndo Satana, ɔndɔshi aso, ayotsha tshɛ dia ‘todihɛ mboka’ ndo fukutanya ekongelo kaso. (1 Tes. 2:18; Ef. 6:12, 13) Tetawɔke dia wekamu ɛsɔ kɔtɛtɔla ko wɛ ndjohekɔ. Sala etshikitanu tshɛ wahombama dia wɛ tetemala l’olimu ayɛ wa teokrasi. Dia sho kamba lo yoho yasungana, sho la dia ndjashikikɛ ndo monga l’etete.
9 Tatetawɔke dia tɔsɛngiya t’oma l’andja ɔnɛ ndo t’oma l’alemba aso w’ekokele todingitanya la elimu ɛmɔtshi w’anyanya wakoka tɔsɛ wenya aso tshɛ. Sho la dia ndjasɛdingola dimɛna lo ndjambola wembola wele oko: ‘Onde lekɔ lo tashisha wɛdimo yema yema lo kɛnɛ kendana la yoho yami ya lɔsɛnɔ kana mbekola yimba yami l’awui akina, oko wakimi ntondo? Onde lambomɛ mpika lɔsɛnɔ lami l’akambo watete wa l’andja ɔnɛ? (1 Joani 2:15-17) Wenya engana wetshami l’eyango ami hita, lo wɛɛngɔ, lo tɔkɛnyɔ kana l’ɛngɛnɔngɛnɔ ekina, mbidja ndo wenya wendami televisiɔ kana Internet—lo mbɛdika la wenya wetshami l’elimu wa lo nyuma na?’
10 Ahombayɛ sala naka wɛ mɛnaka dia lɔsɛnɔ layɛ lamboleka ningitana l’elimu w’anyanya na? Oko wakalɔmbɛ Paulo di’anango ‘ndjalɔngɔsɔla,’ kana ‘mbɔtɔ lo mboka k’ɔlɔlɔ,’ bonde kahayasɛngasɛnga Jehowa dia kokimanyiya dia wɛ ndeka ndjasha nto l’olimu ande na? (2 Kor. 13:9, 11) L’ɔkɔngɔ wa nɔmba ko ndjashikikɛ dia kotsha yɛdikɔ yayɛ ndo sala etshikitanu wahombama. (1 Kor. 9:26, 27) Jehowa ayokokimanyiya di’aha wɛ takɔ mboka k’akambo w’ɔlɔlɔ kana tshika olimu ande.—Ɛdika l’Isaya 30:20, 21.
11 Angemaka Wonya Tshɛ l’Olimu Waki Nzambi Washa Ɔngɛnɔngɛnɔ: Miliyɔ y’anto tayangaka ɔngɛnɔngɛnɔ l’ekudukudu ko ndjâka waya oko laanga ambɛlɛ okonda kete wɛna ɔnɛ diangɔ dia l’emunyi diakawakondja hawasha ɔngɛnɔngɛnɔ wa pondjo. Aki oko ‘lɔpɛpɛ mbakawatatshanyaka.’ (Und. 2:11) Lo wedi okina, lam’atetemalaso kimɔ nsɛnɔ yaso tshɛ le Jehowa, ‘lo mbokitshaka la ntondo kaso wonya tshɛ,’ sho mongaka l’ɔngɛnɔngɛnɔ w’efula. (Osam. 16:8, 11) Ɔsɔku mbediɔ nɛ dia Jehowa mbele kiɔkɔ ya lɔsɛnɔ laso. (Eny. 4:11) Ohondonga aha nde, Ombishi a Woke w’Alaka, tshike lɔsɛnɔ laso lekɔ anyanya ato. Kambɛ Jehowa toshaka ɔngɛnɔngɛnɔ lo lɔsɛnɔ, ndo tokondjiyɛka, ndo sho, ndo anto akina ɛlɔlɔ waha l’ekomelo.
12 Hatohombe minya yimba oma l’olimu ɔsɔ ko mbutaka ɔnɛ ekomelo k’andja ɔnɛ waki Satana eke etale. Sho la dia mɛnya oma lo lɔsɛnɔ laso la lushi la lushi ɔnɛ tekɔ lo kongɛ nshi yayaye. Anto wa lo nshi ya Nɔa, wanɛ waki kombetawɔka ɔnɛ mvula k’elola kayɔlɔ ‘waki la diɔnyɔ,’ ndo wakayakimɔka paka l’eyango awɔ vamɛ wele oko: ndɛ, nɔ, tshuka kana tshukama—edja ndo ‘lam’akawakumɛ elola.’ (Mat. 24:37-39) Ɛlɔ kɛnɛ, wanɛ wamboyakimɔ paka l’akambo wa l’andja ɔnɛ wayɛna ko washo awɔ nganɛ wayolana elongamelo kawɔ kendana la nshi yayaye lo elanyelo ka woke kahawatɛnaka ndoko lushi, mbut’ate lo ‘lushi la Jehowa.’—2 Pet. 3:10-12.
13 Omalɔkɔ, tetemala mpika lɔsɛnɔ layɛ le Jehowa, Nzambi kasɛna ndo salaka lolango lande. Ndoko lɛnɛ okokiyɛ mbɛkɛ otema ayɛ l’andja ɔnɛ naka aha le Jehowa Osukɔ wasungana. Nde hakoke mbuta kashi, ndo nde ayokotsha alaka ande tshɛ. (Tito 1:2) Nde hakokaki mvɔ—ndo tshɛ kombaso le Jehowa tayokitana etondo eto. (Hab. 1:12; 2 Tim. 1:12) Lɔsɛnɔ loludi l’okitanyiya ndo la mbetawɔ lele laso ɛlɔ kɛnɛ, lekɔ etatelo ka lɔsɛnɔ laha l’ekomelo layotokondja oma l’olimu w’ɔlɔ wakambɛso Nzambi kaso k’ɔngɛnɔngɛnɔ!—1 Tim. 1:11; 6:19.
[Caption on page 3]
[Caption on page 3]
“Mɛtɛ bu etenyi kɛmɔtshi ka lo lɔsɛnɔ laso, koko tɔ kekɔ tshondo ya lɔsɛnɔ laso.
Oseka ɛngɔ tshɛ mendanaka la tɔ.”