Yashikikɛ dia wɛ kalola!
1 “Ande sawo dimɛna! Dimi pombaka mbohɔ dia ndjênda onto ɔnɛ nto.” Onde wɛ atataka ɛtɛkɛta ɛsɔ ko ndjohɛ dihole di’odjashi onto akɔ l’ɔkɔngɔ? Naka eelo, kete eya dia yoho yâmɛ yakokayɛ ndjâshikikɛ ɔnɛ wɛ ayokalola dia tênda onto akɔ ele funda kɛnɛ kahombama.
2 Funda tshɛ kahombama: Kam’ekeyɛ atohɛ kɛnɛ kakayasawodi l’onto lɛnyisha nsaki, mbahombayɛ tafundji awui tshɛ w’ohomba wendana la wendelo ɔsɔ. Funda lokombo l’onto akɔ ndo woho wayôyoweya. Funda adrɛsɛ ande, koko aha fɔnya lɔfɔnya—enda dimɛna dia wɛ ndjashikikɛ ɔnɛ kɛnɛ kafundayɛ kekɔ mɛtɛ. Funda dui di’osawodinyu, avɛsa wadishanyu, ndo okanda wamboyotshikɛ.
3 Naka wɛ ambotshika onto la dimbola diahomba ndjokadimɔma mbala kayaye, kete fundadiɔ. Onde wɛ akêyi dui dimɔtshi diendana l’onto akɔ, la nkumbo kande, kana ɔtɛmwɛlɔ ande? Naka ɔsɔku, kete fundadiɔ. Lam’ayoyɔtɛkɛta dikambo sɔ mbala kayaye, nde ayɛna ɔnɛ wɛ mɛtɛ ndjashaka le nde. Lo komelo, funda lushi la wonya wohomaninyu mbala ka ntondo ndo etena kana lushi lakayawote ɔnɛ wɛ ayoya ndjowenda. Wɔsɛlɔ wa nɔtɛ yamɛna, ayokoholaka ndo ayonga wolo wɛ mbohɛ daka diakayatasha dia kalola.—1 Tim. 1:12.
4 Kam’ashidiyɛ funda awui tshɛ, ko wɛ kitsha nɔtɛ yakɔ kâmɛ la dihomɔ diayɛ dikina di’olimu w’esambishelo—oko tapa, Bible, dibuku Comment raisonner, ndo ekanda, woho wa wɛ ndjoyidjaka anya esadi eto. Ndeka dimɛna wɛ fundaka nkombo y’anto wahayatanyi lawakawɔ lo nɔtɛ ka luudu la luudu ko wanɛ wayoyoyênda mbala kayaye lo dihole dikina. Lo mɛtɛ, oyadi kânga wɛ ayɔsa nɔtɛ y’amɛna yendana la waendelo w’eyoyo, kɛnɛ koleki ohomba ele ndjâshikikɛ ɔnɛ wɛ ayokalola!—Fil. 1:10, 11.
5 Kanyiyaka dikambo di’onto akɔ: Lam’ayalɔngɔsɔlayɛ otsha l’esambishelo, oka sso lo nɔtɛ yayɛ ya waendelo w’eyoyo. Kanyiya dikambo di’onto l’onto ndo woho wa mbɔtwɛlɔ koleki dimɛna kayoyotokamba latɔ etena kayoyotowenda. Kanyiya woho wahombayɛ tofudia saki k’onto lo wekelo wa Bible. Naka wɛ ntsha ngasɔ, kete oko weyɛ opandjudi wa lokumu l’ɔlɔlɔ, wɛ kokaka mbetɛ ambeki efula ndo fudia ɔngɛnɔngɛnɔ ayɛ.—Tuk. 21:5a.
6 Lâsɔ mbala kekina kayoyohomana l’onto lakosha lotui, tokanyiyake wate wɛ koka ndjowohɔ esadi eto. Koko, funda, oka sso nto lo nɔtɛ yayɛ, kanyiya dikambo di’onto akɔ, ndo yashikikɛ dia wɛ ayokalola!—Fil. 1:10, 11.