Tokimanyiya Wanɛ wele ‘l’Etema w’Ɔlɔlɔ’
1. Anto akɔna watshumanya Jehowa ndamɛ lo nshi yaso nyɛ oya le nde?
1 Onto tshɛ ekɔ la nsaki kɛmɔtshi ka wolo l’otema ande wa didjidji. (Mat. 12:35) Bible tɛkɛtaka dikambo ‘di’anto walanga ta.’ (Osam. 55:21) Amɔtshi ‘hawɔkɔhɛ la momala.’ (Tuk. 29:22) Koko ekɔ nto anto akina ‘walanga kondja lɔsɛnɔ la pondjo.’ (Etsha 13:48) Lo nshi yaso nyɛ, Jehowa ndamɛ ekɔ lo tshumanya wanɛ wele l’etema w’ɔlɔlɔ wa ngasɔ. (Hang. 2:7) Ngande wakokaso mbakimanyiya dia vɔ koma atɛmɔdi waki Jehowa?
2. Kakɔna kalɔmbama dia sho kotsha ɔkɛndɛ aso wa mbetɛ anto ambeki?
2 Tosale Waendelo w’Eyoyo w’Amɛna: Mɛna akambo la sso di’ɔlɔlɔ lam’asalaso waendelo w’eyoyo ekɔ ohomba efula dia kotsha ɔkɛndɛ wele laso wa mbetɛ anto ambeki. (Mat. 28:19, 20) Onde sho salaka la wolo dia nomialomia nsaki kɛnya onto? Onde sho tokalolaka dia tenda anto tshɛ waketawɔ ekanda aso kana wanɛ wakangɛnangɛna lokumu l’ɔlɔlɔ? Onde sho tetemalaka lo welo wadjaso dia mbakimanyiya woho wa vɔ pama lo nyuma? Lam’ele ɔsɔ ekɔ dikambo diendana la nsɛnɔ y’anto, sho pombaka sala la wolo dia mbesa nsaki tshɛ kɛnya onto.
3. Kakɔna kahombaso sala l’ɔkɔngɔ wa sho sawola l’onto ɔmɔtshi l’olimu aso w’esambishelo?
3 Kam’ekeyɛ atohɛ kɛnɛ kakayasawodi l’onto lɛnyisha nsaki, funda lokombo ndo adrɛsɛ ande. Funda dui diosawodinyu, avɛsa wadishanyu, ndo okanda wamboyotshikɛ. Yema tshitshɛ oma lasɔ, tohɛke dia kalola aha la tshimbatshimba dia towenda nto.
4. Ngande wakokaso sala waendelo w’eyoyo w’amɛna?
4 Woho wa Sala Waendelo w’Eyoyo: Etena kakalolayɛ dia tosala waendelo w’eyoyo, ekɔ ohomba efula wɛ monga l’osalosalo ndo wɛ mɛnya woho wayashayɛ la lɔngɛnyi tshɛ le onto lasawola layɛ. Lɛndjalɛndja sawo ndo kamba l’Afundelo. Lɔngɔsɔla dia nyu kɛtshanya dikambo dimɔtshi di’oma lo Bible, ndo l’ekomelo ka sawo, onyiya wombola wayoyoyokadimola lo wendelo wayela. Ayonga dikambo dia dimɛna efula dia mbewɔ dia kɔhɔtana l’onto la sawola laso naka nde ambotodja kanyi mɔtshi yahɔtɔnɛ l’Afundelo. Sala la wolo dia nyu kɛtshanya akambo wasanganyu lolemi.—Kol. 4:6.
5. Welo akɔna wakadje ombatshi mboka ɔmɔtshi, ndo etombelo akɔna wakayala?
5 Pombaka mbidja welo dia sala waendelo w’eyoyo, koko etombelo waya oma lɔkɔ wekɔ amɛna efula. Ombatshi mboka ɔmɔtshi wa lo wodja wa Japon akayadjɛ oyango wa nyomoleka sala waendelo w’eyoyo oseka ngɔndɔ tshɛ. Nde akatatɛ la sala listɛ l’anto tshɛ wakandatane l’esambishelo ka luudu la luudu, ko l’ɔkɔngɔ a nshi esambele, nde akakalola nto dia towaenda. Nde akalɔngɔsɔla dimɛna dimɛna kɛnɛ kakandahombe tota ndo akakambe olimu ande lo monga l’eshikikelo k’efula lo losango lakandasambishaka. Lo wendelo ande ɔmɔtshi, nde akatatɛ mbeka l’onto ɔmɔtshi lakawotɛ ate: “Asekayɛ tshɛ waya dimi mbatshanyaka. Ɔnɛ mbele mbala ka ntondo ka dimi nyohokamɛ.” Etete ka la ngandji kaki l’ombatshi mboka ɔsɔ akatodja etombelo w’ɔlɔlɔ. L’ekomelo ka ngɔndɔ ka ntondo kakandɔshi yɛdikɔ shɔ, nde akeke Bible l’anto dikumi.
6. Lande na kahombaso tetemala la salaka waendelo w’eyoyo?
6 Nsɛnɔ y’anto yekɔ lo tatetemala la tshikitana. (1 Kor. 7:31) Tena efula nɔmbamaka dia kalola mbala la mbala dia tohomana l’onto lakɛnya nsaki. Oma lo woho wasalaso waendelo w’eyoyo w’amɛna, sho kokaka kimanyiya anto wele l’etema w’ɔlɔlɔ dia vɔ mbɔtɔ lo mboka k’otsha lo lɔsɛnɔ la pondjo.—Mat. 7:13, 14.