Waendelo w’Eyoyo Konyaka lo Wekelo wa Bible
1. Lande na kele wendelo w’oyoyo ohomba efula?
1 Yeso akatome ambeki ande aha paka dia tosambisha tsho koko ndo dia ‘tetɛ ambeki, la mbaetsha.’ (Mat. 28:19, 20) Osambisha mbewoyaka koko ombetsha salaka akambo efula ndeka lasɔ. Nde mbishaka diewo, nembetshiyaka, ndo mbishaka tolembetelo. Yoho mɔtshi ya mbetsha anto akina ele sala waendelo w’eyoyo le wanɛ wakɛnya saki l’oyango wa tatɛ la wɔ wekelo wa Bible.
2. Waa na wakokaso kalola dia tenda?
2 Le anto akɔna wahombayɛ sala waendelo w’eyoyo? Yashikikɛ dia kalola dia tenda anto tshɛ waketawɔ nongola okanda ɔmɔtshi kana wakɛnya yema ya wahɔ lo lokumu l’ɔlɔlɔ. Naka wɛ ambɛna onto lele la wahɔ etena kasambishayɛ l’ahole wele anto efula, kete yanga woho wa kondja adrɛsɛ ande kana numɛlɔ kande ka telefɔnɛ dia wɛ ndjeya woho wa ndjela nsaki kɛnyishande. Tokake wɔma dia tatɛ wekelo wa Bible. Tetemala la nyanga wanɛ wetawɔ wekelo wa Bible, ko wɛ ayowakondja.—Mat. 10:11.
3, 4. Kakɔna kahombaso ntsha etena kasalaso waendelo w’eyoyo?
3 Yasha le Anto: Ɔlɔngɔswɛlɔ wa waendelo w’oyoyo tatɛka etena kɛnanayɛ l’onto mbala ka ntondo. Esambisha wakondja etombelo w’amɛna mbɔsaka nɔtɛ l’awui wele la wahɔ le ompokami, ndo vɔ kambaka l’awui akɔ dia ndjotatɛ l’asawo akina. Anto amɔtshi mɛnaka ohomba munyiya wombola l’ekomelo ka sawo dia kotola yambalo y’ompokami lo wendelo wa mbala kekina. Woho wayashaso l’otema ɔtɔi le anto akina totshutshuyaka dia tetemala la kanyiya dikambo diawɔ kânga l’ɔkɔngɔ wa sho kakitɔna la wɔ, ndo totshutshuyaka nto dia kalola aha la tshimbatshimba dia towaenda. Naka kokaka, kete ona woho wa kawola etena keke onto la wahɔ, ondo l’ɔkɔngɔ wa lushi ɔtɔi kana wa nshi hiende.
4 Etena kasalayɛ wendelo w’oyoyo, ona woho wa tatɛ sawo oma l’awui wakayasawola lande mbala ka ntondo. Onga l’oyango wa mbewoya kânga dikambo ɔtɔi to di’oma l’Afundelo diasha ekeketshelo mbala tshɛ ndo onga suke dia mpokamɛ onto lasawola layɛ. Ona woho wa mbeya ompokami ayɛ dimɛna. Oma lasɔ, lo waendelo ekina wayela, ewoyande akambo wa mɛtɛ w’oma l’Ɔtɛkɛta wa Nzambi waleka mbɔtɔnɛ l’awui wele lande ohomba.
5. Yoho yakɔna yokokiyɛ kamba la yɔ dia tatɛ mbeka l’anto Bible?
5 Eya Etena ka Tatɛ la Wekelo wa Bible: Sala waendelo w’eyoyo l’oyango wa tatɛ wekelo wa Bible. Woho akɔna wakoka dikambo sɔ salema? Ewoya onto dia wɛ nangaka kahana la nde kanyi mɔtshi y’ohomba, ndo fola odingɔ ɔmɔtshi wa lo dibuku Ewo kana biukubuku Katɔlɔmba wɛnayɛ wate vɔ mendanaka l’onto akɔ. Adia odingɔ akɔ, mbola wombola wa lɔkɔ, ndo lembetshiya divɛsa ɔtɔi kana ahende woshawɔ lawɔ. Dikambo sɔ kokaka salema paka lo soko di’onto lo yɛdikɔ ya minitɛ tshanu kana dikumi. Kumiya lo munyiya wombola wayela ndo okana la nde etena ka nyu ndjotetemala la sawo mbala kekina.
6. Woho akɔna wakokaso mɛnya dia sho mbeyaka ohomba wa sala waendelo w’eyoyo?
6 Ndjela wahɔ tshɛ wɛnya anto ekɔ dikambo di’ohomba efula l’olimu aso. Ɔnkɔnɛ, toyaombɛke etena ka l’ekongelo kaso ka lo lomingu dia salaka waendelo w’eyoyo. Naka tayosala ngasɔ, kete tayoleka kondja etombelo w’efula l’olimu aso ndo tayonga l’ɔngɛnɔngɛnɔ wa mɛtɛ.