Tênde Olimu W’ohomba Efula Wa Mbetɛ Anto Ambeki La Sso Di’ɔlɔlɔ
1 La ntondo ka Yeso mbudɛ l’olongo, nde akadjangɛ wanɛ wakôyelaka dia vɔ ‘mbetɛ anto w’oma lo wedja tshɛ ambeki.’ Dia ntsha dikambo sɔ, vɔ wakahombe mbɔtɔ djuke y’esambishelo la wetshelo ndo kamba olimu ɔsɔ lo nkɛtɛ k’otondo. (Mat. 28:19, 20; Etsha 1:8) Onde vɔ wakɛnaka lotumu lawɔ oko oshikɔ a wotsho efula mɛmba? Kema, oko le ɔpɔstɔlɔ Joani, ɔsɔ komonga oshikɔ a wotsho. L’ɔkɔngɔ wa nde kamba olimu wa mbetɛ anto ambeki ɛnɔnyi 65, nde akafunde ate: “Ngandji ka [Nzambi] kene, dia shu nama elembe andi; ku elembe andi [kema, NW] wutshu.”—1 Joa. 5:3.
2 Ɔkɔndɔ wele l’Afundelo w’olimu wakakambe Akristo wa ntondo mɛnyaka ohetoheto waki lawɔ l’olimu awɔ wa mbetɛ anto ambeki wa Yeso Kristo. (2 Tim. 4:1, 2) Vɔ kombôkamba paka l’ɔkɔkɔ w’ɔnɛ ekɔ ɔkɛndɛ; koko ngandji mbakâsokoya dia vɔ tombola Nzambi ndo mbisha akina elongamelo ka panda. (Etsha 13:47-49) Lam’ele wanɛ tshɛ wakakomaka ambeki wakayetɛka ndo vɔ lawɔ anto akina ambeki, etshumanelo k’Akristo ka l’eleko ka ntondo kakahame esadi esadi.—Etsha 5:14; 6:7; 16:5.
3 Olimu wa Mbetɛ Anto Ambeki Ambɔkɛndakɛnda: L’eleko kaso ka 20 kɛnɛ, olimu wa mbetɛ anto ambeki ambohama woho wewɔ atahamaka. Polo ndo kakianɛ, miliyɔ y’anto wambetawɔ lokumu l’ɔlɔlɔ ndo wambotsha kɛnɛ kalɔmbama. (Luka 8:15) Lam’ele etena kambotshikalɛ dikongɛ di’akambo nɛ kekɔ lo tete lowango lowango, ‘ɔhɔmbɔ wa kɔlamelo ndo wa kɛsɔ’ ekɔ lo tosha dihomɔ diakimanyiya anto w’etema ɔlɔlɔ dia vɔ mbeka sɔlɔ esadi esadi.—Mat. 24:45.
4 Lo 1995, takalongola dibuku Ewo Katɔla Otsha lo Lɔsɛnɔ la Pondjo, ko lo 1996, biukubuku Kakɔna Katɔlɔmba Nzambi? Tshoto y’Etangelo ya Ngɔndɔ ka hende 1, 1996, lɛkɛ 8 mbutaka lo dikambo dia dibuku Ewo ɔnɛ: “Dibuku sɔ diele la ndjɛkɛ 192 kokaka mbekama lo tshenyi ya wonya tsho, ndo ‘wanɛ wasungana kondja lɔsɛnɔ la pondjo’ kokaka mbeka akambo efula lo tshimbo ya wekelo adiɔ dia ndjakimɔ le Jehowa ndo nongola batismu.”—Etsha 13:48.
5 Dikatshi di’okotsha di’Olimu Aso wa Diolelo wa Ngɔndɔ k’Esambele 1996 diele l’ɔtɛ a dui ɔnɛ: “Woho wa Mbetɛ Anto Ambeki l’Ekimanyielo ka Dibuku Ewo,” diakatondjɛ oyango ɔnɛ: “Lo ndjela akambo ndo akoka w’ombeki, ondo nyayokokaka sɛdingola efula ka totshapita takɔ, tshapita tshɔi lo yɛdikɔ y’oshidi a ntango ɔtɔi, aha la mbeka lowango lowango. Ambeki wayohama efula naka ndo embetsha vamɛ nɛmiya randevu wa wekelo wa lomingu tshɛ.” Sawo diakɔ diakatetemala nganɛ: “Sho nongamɛka ɔnɛ onto laya l’ekomelo ka wekelo wa dibuku Ewo ambɛnya otema ɔlɔlɔ ande hwe ndo saki kande k’oma ka tshina di’otema ka kambɛ Nzambi.” Sawo dia “Ekadimwelo lo Wembola Anyu” dia l’Olimu Aso wa Diolelo wa Ngɔndɔ ka Dikumi l’Ɔtɔi 1996 diakalembetshiya ɔnɛ: “Sunganaka dia sho kanyiya ɔnɛ tena efula ombetsha wa manamana koka, lo tshenyi ya wonya tsho, kimanyiya ombeki wele l’otema w’ɔlɔlɔ dia nde pama lo yoho yakoka dia nde mbɔsa yɛdikɔ yasungana dia kambɛ Jehowa.”
6 Etombelo Mɛnamaka lo Kamba la dibuku Ewo: Lam’akabatizamaka omoto ɔmɔtshi, nde akate kɛnɛ kakandakanyiyaka lo dikambo dia wekelo wa dibuku Ewo. Nde akeke dibuku Lɔsɛnɔ la Pondjo tshanda y’ɔlɔlɔ. Lam’akatombe dibuku Ewo, kadiyɛso kakekaka la nde akayokambaka la diɔ ko tshika dia ntondo. Ombeki akɔ akashihodia esadi eto ɔnɛ dibuku sɔ ayowokonya lo nde mbɔsa yɛdikɔ mɔtshi, ko tatɛ oma lâsɔ, dui sɔ diakôtshutshuya dia nde pama esadi esadi. Womoto ɔsɔ, laya kadiyɛso kakianɛ, ekɔ lo mbuta ate: “Dibuku Lɔsɛnɔ la Pondjo diakakimanyiya dia dimi nanga Jehowa, koko dibuku Ewo diakakimanyiya dia dimi mbɔsa yɛdikɔ ya mbôkambɛ.”
7 Tênde woho wakeke omoto okina sɔlɔ esadi esadi. L’ɔkɔngɔ wa wekelo wa hende, nde akatshu lo losanganya lɔmɔtshi lo Mbalasa ka Diolelo lam’akaye omendji w’otshimbedi a ndjembola etshumanelo kakɔ. Lomingu lakɔ, lam’akaweke mbala ka sato, nde akatɛ omendji w’otshimbedi dia nde amboshila la ndjakimɔ le Jehowa ndo nangaka monga opandjudi wahatabatizama. Dikumanyi waketawɔ l’ɔkɔngɔ wa vɔ sawola la nde, ko lomingu lakayele nde akatatɛ la sambisha. Nde akayashaka tshɛ lo wekelo ande wa Bible, ko nde akɔshi dikimɔ diahandɔsaka woho wa nde mbekaka mbala hiende kana shato lo lomingu ndo sambishaka efula. Mbala mɔtshi, wakekaka totshapita tohende kana tosato osangɔ ɔtɔi. Omoto ɔsɔ akatatɛ ndjela kɛnɛ tshɛ kakandekaka l’akambo tshɛ wa lo lɔsɛnɔ lande, nde akashidiya mbeka dibuku Ewo l’ɔkɔngɔ a mingu nyɛi ndo akahame polo lo batismu!
8 Om’aki kadiyɛso kɛmɔtshi ndjataka ndamɛ ate nde aki “mɛtɛ olonganyi w’opanganu.” Lushi lɔmɔtshi, ɔnangɛso ɔmɔtshi akɔ̂sɛngɔla dia mbeka la nde Bible lo dibuku Ewo, ko mboshikikɛ ate: Wɛ mbeyaka tona l’ɔkɔngɔ a wekelo aso wa ntondo kana l’etena tshɛ kayolanga. Pami kakɔ aketawɔ pemba, kânga mbakinde kombeyaka awui lo kalasa nshi yakinde dikɛnda ndo aya ɛnɔnyi 20 l’ɛmɔtshi wende heke ndoko okanda ɔtɔi w’awui w’ɛtɛmwɛlɔ. Akandatshe lam’akandeke dibuku Ewo? Nde akate ate: “Aki mɛtɛ ɔlɔ efula dia mɛna woho wakafundama dibuku nɛ dialembetshiya Bible l’ɛtɛkɛta wa wɔdu. Wetshelo wakokɛka atui akɔ ahende ndo awui wakatayelanaka lo yoho yasungana, ko lakakombolaka ɔnɛ lushi latotêkaka lakoke kele têke nto. Onto lakambetshaka akayele la kiɔmi tshɛ toho tɛnya la Société dia mbetɛ anto ambeki, ko l’ekimanyielo ka nyuma ka Jehowa, lakalongola batismu l’ɔkɔngɔ a ngɔndɔ nyɛi. Mɛtɛ, dimi koka mbuta nte naka sho monga la ngandji ka mbetɛ anto ambeki, tetemala la nyanga anto w’etema ɔlɔlɔ l’esambishelo, kamba la dibuku Ewo ndo ekanda ekina wɔmbɔla Bible watosha la Société, ndo djekoleko naka sho nyanga ɛlɔmbwɛlɔ ka Jehowa lo dɔmbɛlɔ, kete tayonga la diɛsɛ dia lânde dia kimanyiya ndo mbetɛ anto ambeki.” Akambo wa ngasɔ hawoleke ntshama. Anto efula weka la so hawoye lo sɔlɔ esadi esadi ngasɔ.
9 Anto Weka Bible Hawohame Woho Ɔtɔi: Pombaka mbeya ɔnɛ akoka wa wanɛ wetsha Ɔtɛkɛta wa Nzambi ndo wa wanɛ weka koka tshikitana efula. Ohamelo wa lo nyuma mbeyaka monga ɔkɔkɛ kana esadi esadi. Anto amɔtshi pamaka l’ɔkɔngɔ a ngɔndɔ ngana tsho koko akina paka edja efula. Ohamelo w’onto nemanɛka la diewo diande dia mukanda, la woho wɔsande akambo wa lo nyuma ndo wamamemande Jehowa. Anto tshɛ weka la so hawɔsɛdingola Afundelo lushi la lushi ‘l’ohetoheto efula’ oko akatshaka Ase Bɛrɔya wakakome ambetawudi.—Etsha 17:11, 12.
10 Wakeye mɛtɛ mbisha dako diele lo dikatshi di’okotsha di’Olimu Aso wa Diolelo wa Ngɔndɔ ka Tanu 1998 l’ɔtɛ a dui ɔnɛ “Tonyomoyanga Anto Efula wa Mbeka Lawɔ Bible,” lɔkɔ wakate vate: “Lo mɛtɛ, anto tshɛ weka Bible hawohame woho akɔ wâmɛ. Amɔtshi hawoleke ndjasha l’awui wa lo nyuma kana hawoleke kimɛ awui wekawɔ esadi. Le akina, mbeyaka monga wolo mbeka tshapita y’otondo lomingu tshɛ nɛ dia vɔ wekɔ l’edinganu efula lo lɔsɛnɔ. Ɔnkɔnɛ, lo tena dimɔtshi mbeyaka monga ohomba wa mbeka mbala efula dia mana totshapita tɔmɔtshi ndo ayohomba mbahɛ ngɔndɔ mɔtshi lâdiko dia shidiya dibuku di’otondo.”
11 Wanɛ Wetɛ Anto Ambeki Memalaka lo Wɛdimo: Sho pombaka shikikɛ woho watatêke l’onto lo ndjela akambo ndo akoka w’onto leka la so. Lam’ele wambotokeketsha dia tatɛka mbeka l’anto l’ekimanyielo ka biukubuku Katɔlɔmba; ondo ayohombama ngɔndɔ hiende kana shato dia ndjishidiya la ntondo ka tatɛ la dibuku Ewo. Naka sho kamba la tokanyi tshɛ toshawɔ lo dikatshi di’okotsha di’Olimu Aso wa Diolelo wa Ngɔndɔ k’Esambele 1996, kete ondo ayohomba ngɔndɔ shamalo kana divwa nto dia shidiya dibuku sɔ. Anto amɔtshi wakatatɛ mbeka dibuku Ewo wakayotshikaka ko tokoyeka biukubuku Katɔlɔmba dia kimanyiya onto akɔ lo nde mbeya atshina w’akambo wa sɔlɔ wele lo Bible esadi esadi. L’ɔkɔngɔ, vɔ wakayeka dibuku Ewo nto. Naka nyakatatɛ mbeka lo dibuku Ewo ko wekelo wekɔ lo tatshu dimɛna, kete ondo ayonga ohomba ndjeka biukubuku Katɔlɔmba l’ɔkɔngɔ wa dibuku Ewo dia vusola lo tshena pe atshina w’akambo wa sɔlɔ. Oyadi ngande, sho hatolange mbeka l’ombeki lowango lowango aha la nde mboka awui watandeke. Onto tshɛ leka ekɔ l’ohomba wa mpika mbetawɔ kande k’oyoyo l’Ɔtɛkɛta wa Nzambi lâdiko di’etshina ka wolo.
12 Lo menda etale kayaso lo ndjela deko, nshi nyɛ mbamboleka ohomba dia kimanyiya akina dia vɔ mbeka sɔlɔ. Lam’alɔmbaso tena tshɛ dia tatɛ mbeka l’anto Bible, tɔlɔmbɛke ndo wanɛ weka la so. Lâsɔ mbayotonga l’ɔngɛnɔngɛnɔ wa tetemala la batiza ambeki ‘nshi tshɛ polo l’ekomelo ka dikongɛ nɛ di’akambo.’—Mat. 28:20.