‘Tɔlɔ ta di’Ɔlɔlɔ dia mbetawɔ’
1 Ɔpɔstɔlɔ Paulo akakɔkɔmiya Timɔtɛ dia ‘ndɔ ta di’ɔlɔlɔ dia mbetawɔ.’ (1 Tim. 6:12) Paulo ndamɛ akakambe l’ɛtɛkɛta ɛsɔ. Lo ekomelo ka lɔsɛnɔ lande nde akatɛkɛta l’eshikikelo dia nde akalɔ ta di’ɔlɔlɔ. (2 Tim. 4:6-8) Lo weho tshɛ, nde akatetemala sambisha la dihonga tshɛ, ndo la etete. Lo ndjela ɛnyɛlɔ kande, sho kokaka ndjashikikɛ oma k’ɛse otema ɔnɛ tekɔ lo sala tshɛ kakokaso sala lo ta diaso diendana la mbetawɔ k’Akristo.
2 Todje welo wahombama: Paulo akakambe olimu efula. (1 Kor. 15:10) Ngasɔ mbahombaso sala etena katatayange anto tshɛ walanga tohokamɛ l’ɛtshi kaso ka nkɛtɛ. (Mat. 10:11) Dia tana amɔtshi l’atei awɔ, mbeyaka monga ohomba sho tombaka kɔlɔ̂mɔ dia sambisha wanɛ wahomana la so lo toshinga. Kana sambishaka l’akɔlɔ wa yɔɔ kana kama wahɔ midi woho wa tana anto wamboshila kalola lawakawɔ.
3 Dia sho komaka la wonya lo losanganya l’otsha l’olimu w’esambishelo lasalema l’olui aso wa wekelo wa dibuku, sho pombaka ndjaekiya ndo monga l’ekongelo k’ɔlɔlɔ. Ɛnyɛlɔ, ase nkumbo ka Bɛtɛlɛ amɔtshi kɛndakɛndaka minitɛ 60 wikɛndɛ tshɛ dia tosambisha kamɛ la tshumanelo diakiwɔ. Ndo nto, sho mbeyaka mandola apandjudi amɔtshi ndo nkumbo mɔtshi ya l’etshumanelo kaso wanɛ wakoma la wonya lo nsanganya kânga mbodjashiwɔ l’ahole w’etale. Sunganaka sho mbokoya bɛnyɛlɔ dia weho w’anto wa ngasɔ wele l’etete ndo wele l’ekongelo k’ɔlɔlɔ k’onto ndamɛ.
4 Sho pombaka tshutshuyama dia mbesa wahɔ tshɛ watanaso le onto. Kânga lam’akahɛso anto ekanda lo toshinga kana l’esambishelo ka lo tshakitudi, sho pombaka sala la wolo dia mbɔsa adrɛsɛ w’onto kana numɛlɔ kande ka telefɔnɛ. L’ɔkɔngɔ diko sho kokaka ndjotshɔ towenda dia tolomialomia saki kande ndo sala tshɛ dia tatɛ wekelo wa Bible.
5 Tosambishake tena tshɛ: Paulo aki la etete l’esambishelo. (Romo 15:19) Onde ndo wɛ mbele l’etete? Onde wɛ sambishaka tena tshɛ? Onde ndo wɛ mbayoyasha l’olimu w’esambishelo ngɔndɔ kɛnɛ k’otondo? Ɛnɔmbɔdi wa Wekelo wa Dibuku wa l’Etshumanelo wayɔngɛnangɛna dia mɛna nganɛ wayoyakimɔ onto tshɛ la l’olui awɔ l’olimu w’esambishelo lo Ngɔndɔ k’Enanɛi. Vɔ wayokokimanyiya dia sala dikambo sɔ.
6 Naka sho mbokoya ɛnyɛlɔ ka Paulo ɔnɛ lakâmɛka lokumu l’ɔlɔlɔ dimɛna dimɛna, kete tayotetemala ‘ndɔ ta di’ɔlɔlɔ dia mbetawɔ.’