TSHAPITA 19

Onde Ekɔ Dimɛna Ndɔ Ta?

ONDE wɛ mbeyaka ana amɔtshi w’apami kana wa wamato wasala awui la lotamanya ndo l’epetenge?. . . Onde wɛ nangaka mɛngɔla la wɔ? Ko kana wɛ ayokombola mɛngɔla l’onto l’ɔlɔlɔ ndo lalanga ki?. . . Ombetsha a Woke akate ate: ‘Anto walanga wɔladi wekɔ la ɔtshɔkɔ nɛ dia vɔ wayetama ana waki Nzambi.’​—⁠Mateu 5:⁠9.

Koko tena dimɔtshi anto akina salaka awui watosha kɛlɛ. Shi ngasɔ mbediɔ?. . . Lâsɔ sho koka monga la mposa ka sɔmbɔya anto asɔ. Dikambo sɔ diakakomɛ ambeki waki Yeso mbala kɛmɔtshi lam’akawatatshɔka la nde otsha la Jerusalɛma. Hokamɛ kote dikambo sɔ.

Lam’akawatshu yema, Yeso akatome ambeki ande amɔtshi la ntondo otsha lo ngelo kɛmɔtshi ka tshitshɛ ka la Samariya dia vɔ toyanga dihole dia mumuya. Koko anto wa lo ngelo kɛsɔ konanga dia vɔ mumuya lo dihole diakɔ nɛ di’ase Samariya waki l’ɔtɛmwɛlɔ okina wotshikitanyi. Ndo vɔ kombokanaka l’oseka onto tshɛ lakatshɔka la Jerusalɛma dia tɔtɛmɔla.

Otoyosala otondonga wɛ mbakawasalɛ ngasɔ na? Onde wɛ otomala? Onde wɛ otowana la wɔ?. . . Kɛsɔ mbakalange ombeki Jakɔba nde la Joani sala. Vɔ wakatɛ Yeso ɔnɛ: ‘Onde wɛ nangaka dia sho mbuta dia dja polɔ oma l’olongo dia ndjaka anto anɛ?’ Diɔ diakɔ diakawaelɛ Yeso ate Ana wa Dikungola dia Mvula! Koko Yeso akawatɛ dia hatonga dimɛna salɛ anto akina ngasɔ.​—⁠Luka 9:​51-56; Mako 3:⁠17.

Ekɔ mɛtɛ di’anto mbeyaka tosalɛ kɔlɔ tena dimɔtshi. Ana amɔtshi mbeyaka tona dia sho kɛnya la diangɔ diawɔ dia tɔkɛnyɔ. Vɔ koka ndo mbuta ɔnɛ: “Hatolange mɛngɔla la yɛ.” Lam’atomba dikambo dia ngasɔ, diɔ koka tonyangiya, shi mɛtɛ? Sho koka nyanga dia sala dikambo dimɔtshi dia sɔmbɔya. Ko onde ngasɔ mbahombaso sala?. . .

Onde wɛ koka mbɔsa Bible kayɛ lam’alangɛ? Ɛsɔ tadia Tukedi 24, divɛsa 29. Sho mbadiaka lâwɔ ɔnɛ: “Tutaki wati: Dimi layûtshela uku akandantshela. Dimi layosomboya untu l’untu uku etsha andi.”

Oko le yɛ divɛsa sɔ alangadiɔ mbuta?. . . Diɔ mbutaka dia hatohombe nyanga dia sɔmbɔya. Hatohombe salɛ onto kɔlɔ paka nɛ dia nde akatosalɛ kɔlɔ. Ko ahombayɛ sala naka onto ɔmɔtshi okosola dia kɔlɔsha? Nde koka kosha kɛlɛ lo kɔlɛ nkombo mɔtshi ya kɔlɔ. Nde koka kɔ̂la ndo mbuta ɔnɛ wɛ ekɔ yɔmɔma. Ohɔsa dia nde la yɛ ate wɛ ekɔ wɔma efula. Ahombayɛ sala na? Onde wɛ pombaka ndɔ la nde?. . .

Tende nto kɛnɛ kata Bible. Fola lo Mateu tshapita 5, divɛsa 39. Yeso mbutaka lâwɔ ate: ‘Tokaloyake kɔlɔ lo kɔlɔ. Ndo naka onto ambokɔkɔmɔla lo tama dia lonya l’omi ko wɛ mbosha ndo tama dia lonya la lɔmɔsɔ.’ Oko le yɛ, Yeso akandalange mbuta lâsɔ? Onde nde akalange mbuta dia naka onto ambokosha lowala lo lɛkɛ lɔmɔtshi l’elungi, kete wɛ pombaka mbotshika dia nde kɔkɔmɔla ndo lo lɛkɛ lokina?. . .

Kema, Yeso konanga mbuta ngasɔ. Kɔmɔla tshikitana la kɔmɔla onto dikɔfi. Kɔmɔla ekɔ oko sokola onto. Ondo onto koka tɔkɔmɔla l’oyango wa tondja ta. Nde nangaka dia sho momala. Ko naka sho momala ndo tatɛ sokola onto, kakɔna kayotomba?. . . Dikambo sɔ mbeyaka tokonya lo ta.

Koko Yeso konanga di’ambeki ande ndɔ ata. Diɔ diakɔ diakandate dia naka onto ambotɔkɔmɔla, kete hatohombe mbɔkɔmɔla nde lawɔ. Hatokoke momala ndo ndɔ ta. Naka sho ndjatambiya lo ta, kete tayɛnya dia tekɔ la woho wa dionga diele l’onto lakatate la ta diakɔ.

Oko le yɛ, naka owanu wambotatɛ, kakɔna koleki dimɛna wɛ sala?. . . Kɛnɛ koleki dimɛna ele minya demba. Onto ɔmɔtshi mbeyaka kosokola tena efula. Koko dikambo sɔ mbeyaka komɛ lâsɔ. Aha naka wɛ ambonya demba, kete lâsɔ wɛ bu la wolo. Koko, kɛsɔ mɛnyaka dia wɛ ekɔ la wolo efula lo kɛnɛ kele ɔlɔlɔ.

Ko kayotota naka wɛ ambɔlɔ l’onto ko ambɔ̂lɛndja na? Kakɔna kakoka tomba oma lâsɔ?. . . Onto akɔ koka nteta angɛnyi ande amɔtshi. Vɔ koka kɔkɔmɔla osongo wa woke kana kɔkɔta lokuwa. Shi wɛ ambokoka mɛna kakianɛ lande na kele Yeso halange sho ndɔ ta?. . .

Lâsɔ ahombaso sala naka tambɛna anto akina walɔ ta na? Onde sho koka mbɔtɔ lo wedi ɔmɔtshi?. . . Bible totɛka kɛnɛ kele ɔlɔlɔ sho sala. Ohofola lo Tukedi tshapita 26, divɛsa 17. Divɛsa sɔ mbutaka ɔnɛ: “One latotoka lo dikambu diaha diandi, eli uku untu latukimeka fo lu atui.”

Kakɔna kakoka tomba naka wɛ kimɛ mfɔ l’atui na? Shi tɔ kayoka kandji ndo kayokolumata? Nɛ dia mbala tshɛ kayolangaka mfɔ kohangisɔ, wɛ ayoleka mbokimɛ la wolo l’atui ndo dikambo sɔ ayoleka momadja mfɔ kakɔ. Lâsɔ naka wɛ kimɔ mfɔ kakɔ, kete tɔ mbeyaka kolumata wolo. Ko onde wɛ ayotshikala paka lâwɔ dia kimɛ atui atɔ pondjo?. . .

Woho w’okakatanu wa ngasɔ mbayonga laso naka sho ndjatambiya lo ta dialɔ anto akina. Ondo hateye onto lakatate la ta diakɔ kana ɔkɔkɔ walɔwɔ. Ondo wekɔ lo kɔmɔla onto nɛ dia nde akavi ɛngɔ k’onto lalɔ la nde. Naka sho ndjɔtɔ lo wedi ande, kete tôkimanyiya ose wovi. Shi ɔsɔ hatonga dikambo dia dimɛna?

Lâsɔ ahombayɛ sala naka wɛ ambɛna anto walɔ na?. . . Naka la kalasa mbalɔwɔ, kete lawɔ esadi dia tewoya ombetsha ɔmɔtshi. Ko naka aha la kalasa mbalɔwɔ, kete wɛ koka mbeta ombutshi ayɛ ɔmɔtshi, opalanga ɔmɔtshi kana pulushi kɛmɔtshi. Eelo, kânga lam’alanga anto akina ndɔ, sho pombaka nyanga dia mbidja wɔladi.

Ambeki wa mɛtɛ waki Yeso salaka kɛnɛ tshɛ kakokawɔ sala dia mbewɔ dia ndɔ ata. Lo sala ngasɔ, sho mɛnyaka dia tekɔ la wolo lo kɛnɛ kele ɔlɔlɔ. Bible mbutaka di’ombeki waki Yeso ‘hahombe ndɔ ta, koko pombaka monga la memakana otsha le anto tshɛ.’​—⁠2 Timote 2:⁠24.

Kakianɛ tende alako efula wayotokimanyiya di’aha sho ndɔ ata: Romo 12:​17-21 ndo 1 Petero 3:​10, 11.

[Osato wa lo lɛkɛ 102]

Kakɔna kakalange Jakɔba nde la Joani sala dia sɔmbɔya ase Samariya?

[Osato wa lo lɛkɛ 104]

Ahombaso sala naka onto ɔmɔtshi oyanga dia tɔlɔsha?

[Osato wa lo lɛkɛ 105]

Lande na kele ndjatambiya l’ata walɔ anto akina ekɔ oko onto lakimɛ mfɔ l’atui? Ekɔ nɛ dia wɛ koka ndjohomɔ, lâsɔ tɔtɔke l’ata!

[Osato wa lo lɛkɛ 106]

Ahombayɛ sala naka wɛ ambɛna anto walɔ?