Nsanganya kimanyiyaka ɛlɔngɔlɔngɔ l’esekaseka

¹ Osekaseka ɔmɔtshi akate ate: “Mbala mɔtshi dimi fɔnyaka dia l’atei w’anto tshɛ ɛlɔngɔlɔngɔ l’esekaseka mbatatenyanya etana koleki wolo lo lɔsɛnɔ. Tekɔ lo sɛna kâmɛ l’anto wasala monanyi, wanɔ didjoyadjoya, ndo wele emunga wa wanu.” Onde ndo wɛ mbakanyiya ngasɔ? Naka eelo, kakɔna kafɔnyayɛ kokoki kokimanyiya dia ndɔshana la tɔsɛngiya ta kɔlɔ tɔsɔ? Wɛ pombaka monga la mbetawɔ, mbetawɔ ka wolo lo mboka y’osembwe yaki Jehowa, nɛ dia naka wɛ bu latɔ, kete wɛ ‘heya mbɔngɛnyangɛnya dimɛna.’ (Heb. 11:⁠6) Wɔtwɛlɔ wa lo nsanganya ya l’etshumanelo ayokokimanyiya dia keketsha mbetawɔ kayɛ k’Okristo ndo yɛdikɔ yakayɔshi dia mbewɔ kɛnɛ kele kɔlɔ.

² Nsanganya yekɔ la diangɔ efula dia kosha: Kakɔna katetɛka olelo ɔlɔ wonya wasanganyayɛ lonya wɛ l’angɛnyi w’eshika na? Kema ɔsɔhanyelo wa tangangɔ t’ɔlɔlɔ tatolangaka onyɔ kâmɛ ndo sawo diamɔtshanyu? Woho akɔ wamɛ mbatongaka ndo lo nsanganya yaso, koko lo yoho ya lo nyuma.

³ Akambo wekama lo nsanganya tokeketshaka, tɛnyaka woho wa ndɔshana l’ekakatanu wa lo lɔsɛnɔ wa lushi la lushi, ndo woho wa shihodia prɔfɛsiya ya diambo ya lo Bible. Yɔ mbishaka alako w’eshika waketsha woho wa monga la yoho ya lɔsɛnɔ yoleki dimɛna ndo yoho ya tondoya ekakatanu wahomana layɛ. Ndoko angɛnyi wɛdimi la wanɛ watanaso lo nsanganya, ndo hiɛlɛlɛ ya lo nyuma yele lɛkɔ ndjaka nd’ɔlɔ ndjihɛnga ndo yɔ kema kânga la wâle ɔtɔi. (Osam. 133:⁠1) Diɔ diakɔ diakate osekaseka ɔmɔtshi ate: “Lam’atshɔmi la kalasa lushi l’otondo, tɔ tɔnɛndjaka demba. Koko, nsanganya yekɔ oko ɛtɛkɔ k’ashi l’atei w’oswe wa shɛnga, lɛnɛ atomotutshaka demba dia kondja wolo wa tatɛ lushi lokina la kalasa.” Osekaseka okina akate nde lawɔ ate: “Lambɛna dia diekesanelo dia l’anto walanga Jehowa, kimanyiyakami dia dimi lawɔ ndjasukanya la nde.”

⁴ Lo fundja lokombo lo Kalasa k’Olimu wa Teokrasi, wɛ mbekaka woho wa mɔtshanya awui amɔtshi oma lo Bible, ko mbalɔnga oko sawo ko l’ɔkɔngɔ diko ndjodisha la ntondo k’ampokami lo Mbalasa ka Diolelo oko onto lasawola la wɔ. Ohokanyiya diɛsɛ diele la yɛ dia mbeka woho wa mbeya mbetsha akambo wa mɛtɛ washimbɛ nsɛnɔ wele l’Ɔtɛkɛta waki Nzambi la kongamu tshɛ! Onde ekɔ dihole dikina diakoka ɛlɔngɔlɔngɔ tana woho wa wekelo wa ngasɔ oka?

⁵ Woho wa kondja wahɔ woleki tshɛ oma lo nsanganya: Ekɔ akambo asato w’ohomba efula wakoka tokimanyiya dia kondja wahɔ woleki tshɛ oma lo nsanganya. Akambo akɔ vɔanɛ: ndjalɔngɔsɔla, mbisha kɔmatɛrɛ, ndo kamba olimu la kɛnɛ kekayɛ.

⁶ Lɔngɔsɔlaka nsanganya: Sala ekongelo k’oshika ka nɔngɔsɔlaka nsanganya esangɔ l’esangɔ. Tetawɔke di’adɛvɔara wa la kalasa, olimu wa lo tena dimɔtshi, kana tɔkɛnyɔ kɔsɛ etena keyɛ l’ohomba dia tavusodi akambo wayotekama lo losanganya. Kɛsɔ ayokokimanyiya dia monga la mbekelo ka dimɛna. Dui dia ntondo ndo dioleki tshɛ ele, tetemala la walelo wa Bible wa lomingu la lomingu wele l’ekongelo ka Kalasa k’Olimu wa Teokrasi. Kɛsɔ nɔmbaka paka minitɛ ngana tsho lushi tshɛ dia mbadia ndo kana yimba lo totshapita takalɔngɔswama dia mbadia. Yaombɛ yema y’etena ka nɔngɔsɔla Wekelo wa Dibuku wa l’Etshumanelo ndo Wekelo wa Tshoto y’Etangelo. Amɔtshi salaka dikambo sɔ lushi ɔtɔi kana nshi hiende la ntondo ka nsanganya shɔ. Lo yɛdikɔ yɛdimi l’akoka ayɛ salaka woho akɔ wamɛ lo kɛnɛ kendana la tenyi dia lo Losanganya l’Olimu la lomingu tshɛ.

⁷ Shaka kɔmatɛrɛ lo nsanganya: Bible mbutaka dia lam’aki Yeso l’ɛnɔnyi dikumi l’ehende, wakotane lo tɛmpɛlɔ ahokamɛ, ambola wembola ndo asha ekadimwelo. (Luka 2:​46, 47) Kɛsɔ nangaka nembetshiya dia nde mɛtɛ akayashaka tshɛ lo dikambo sɔ. Wɛ ayokondja wahɔ efula oma lo nsanganya naka wɛ ayosala la wolo dia mbishaka kɔmatɛrɛ lɔkɔ.​—⁠Tuk. 15:⁠23.

⁸ Wɛ pombaka monga la yambalo y’efula lo kɛnɛ kalakanyawɔ lo nsanganya. Esangɔ efula, pokamɛ dako diasha onto, ndeka wolo la ntondo ka wɛmamɛ mbisha dako. Lande na na? Dikambo yimba yayɛ mbeyaka mbekekɔ ahole akina wonya watɛkɛta onto okina. Lâsɔ ahombayɛ sala dia ndɔshana la dikambo sɔ? Paka wɛ fundaka towui tɔmɔtshi lo dikatshi. Fundaka awui w’ohomba walangayɛ ndjôholaka l’ɔkɔngɔ. Awui wafundayɛ wayokokimanyiya dia wɛ shikikɛ yimba yayɛ lo losanganya. Ndo nto, yangaka avɛsa lo Bible kayɛ ndo tayelaka ɔtɛkɛtshi wonya watandadia.

⁹ Lâdiko dia lâsɔ, yadjɛ oyango wa kadimolaka lo tenyi tshɛ dia lo nsanganya dialɔmbawɔ ampokami dia kadimolaka. Wɛ ayokondja wahɔ efula naka wɛ kanyiyaka dimɛna kɛnɛ kalangayɛ tɛkɛta. Tukedi 15:28 mbutaka ɔnɛ: “Kanga utema w’ololo atukanaka yimba dia kaluya dui.”

¹⁰ Kamba olimu la kɛnɛ kekayɛ: Dikambo dia komelo ele wɛ ndjashikikɛ dia kɛnɛ kekayɛ ‘kekɔ lo kamba olimu l’otema ayɛ.’ (1 Tes. 2:13) Naka wɛ kamba olimu l’akambo w’ohomba wekayɛ lo nsanganya tshɛ, kete wɛ ayoyasukanya efula la Jehowa Nzambi. Nde ayonga onto la mɛtɛ lo washo ayɛ, ndo wɛ ayonga l’ɔngɛnɔngɛnɔ w’efula l’atei w’otema etena ‘katayakɛndakɛnda l’akambo wa mɛtɛ,’ lo mbɔtɔnganyiya lɔsɛnɔ layɛ l’akambo akɔ.​—⁠3 Joa. 4.

¹¹ Anangɛso l’akadiyɛso w’ɛlɔngɔlɔngɔ lee, naka nyayɔlɔngɔsɔlaka nsanganya mbala la mbala, mbishaka kɔmatɛrɛ lɔkɔ ndo kambaka olimu la kɛnɛ kekanyu, kete nyayɔngɛnangɛnaka nsanganya efula. Ndo l’etena kakɔ kâmɛ nyayokondja ɛlɔlɔ tshɛ wakokanyu kondja oma lo nsanganya. Mbetawɔ kanyu kayokeketshama, kamɛ ndo yɛdikɔ yakanyɔshi ya tshikala la kɔlamelo le Jehowa, Shɛnyu lele l’olongo.​—⁠Osam. 145:⁠18.