Onde wɛ sambishaka la dihonga?
1 Kânga mbakawandama ndo manemɛ oma le atunyi awɔ, Petero la Joani wakatetemala mbewoya losango la Diolelo la dihonga. (Etsha 4:17, 21, 31) Sambisha la dihonga alembetshiyande le so ɛlɔ kɛnɛ na?
2 Tosambishake la dihonga: Tshɛkɛta mɔtshi yahatshikitanyi la “dihonga” ko “otema wolo,” yɔ nembetshiyaka “ndjashikikɛ di’aha mboka wɔma, monga la wolo, ndo l’etete.” Le Akristo wa mɛtɛ, sambisha la dihonga kɛdikɛdi tɛkɛta aha la wɔma wonya tshɛ wakondjaso diaaso dia mbewoya anto akina lokumu l’ɔlɔlɔ. (Etsha 4:20; 1 Pet. 3:15) Kɛsɔ nembetshiyaka dia hatoke sɔnyi sambisha lokumu l’ɔlɔlɔ. (Osam. 119:46; Romo 1:16; 2 Tim. 1:8) Lâsɔ, dihonga ekɔ dionga diele laso ohomba dia kotsha ɔkɛndɛ aso wa sambisha lokumu l’ɔlɔlɔ la Diolelo lo etena kɛnɛ k’ekomelo. Dihonga totshutshuyaka dia sambisha anto lokumu l’ɔlɔlɔ lo dihole tshɛ diakokawɔ tanema.—Etsha 4:29; 1 Kor. 9:23.
3 Dihonga la kalasa: Onde wɔma kana dionga dia diki kodjɛka wekamu dia wɛ sambisha asekayɛ wa la kalasa? Esangɔ efula, sala dikambo sɔ bu wɔdu, ɔnkɔnɛ diɔ kokaka monga tshondo y’ohemba. Koko, Jehowa ayokokeketsha naka wɛ mbɔlɔmba dia kondja dihonga dia sambisha anto akina. (Osam. 138:3) Dihonga ayokokimanyiya dia wɛ ndjaeyanya oko Ɔmɛnyi wa Jehowa ndo di’aha wɛ kɔmɔ otema wonya wakɔsɔkawɔ. Naka wɛ sala ngasɔ, kete esambishelo kayɛ la kalasa ayokoka shimbela wanɛ wakohokamɛ.—1 Tim. 4:16.
4 Dihonga lo dihole di’olimu: Onde wɛ mbeyamaka oko Ɔmɛnyi wa Jehowa lo dihole diakambayɛ? Yoho yamɛ yokoki anyayɛ wa l’olimu minandema la lokumu l’ɔlɔlɔ ele paka wɛ mbâsambishisha. Dihonga diayɛ ayokokimanyiya dia wɛ nɔmbaka dikimɔ woho wa wɛ mbɔtɔka lo nsanganya y’Akristo ya l’etshumanelo ndo ya weke.
5 Dihonga wonya weyɛ l’ehemba: Monga la dihonga ekɔ ohomba efula wonya walɔshamaso. (1 Tes. 2:1, 2) Diɔ tokimanyiyaka dia kukutɛ mbetawɔ kaso wolo wonya watanɛwɔ, watɔsɔkawɔ, kana watosoyawɔ. (Fil. 1:27, 28) Dihonga tokeketshaka dia sho tshikala nge wonya weso la ntondo ka tɔsɛngiya tatotshutshuya dia sekola ɛlɛmbɛ wayelaso waki Jehowa, Nzambi kaso. Diɔ tokeketshaka dia monga la wɔlamu wonya watoyanga anto akina l’ewanu.—Romo 12:18.
6 Oyadi ekakatanu akɔna wele laso, nyɛsɔ totetemale sambisha lokumu l’ɔlɔlɔ la dihonga.—Ef. 6:18-20.