Totetemale sambisha ɔtɛkɛta wa Nzambi la dihonga
1 Oko weso ekambi w’Akristo, sho mbeyaka diaha anto tshɛ mbayotohokamɛ etena kasambishaso. (Mat. 10:14) Koko, hatohombe mbetawɔ dia otonelo w’anto amɔtshi toshimba dia sho mbewoya lokumu l’ɔlɔlɔ. (Tuk. 29:25) Kakɔna kayotokimanyiya dia sho tetemala sambisha ɔtɛkɛta wa Nzambi la dihonga?
2 Ɔpɔstɔlɔ Paulo akashihodia ‘nɛmɔ di’efula diele la ewo ka Kristo Yeso.’ Dui sɔ diakotshutshuya dia nde sambisha la ‘dietawɔ dia wolo.’ (Fil. 3:8; 1 Tes. 1:5) Kânga mbakɔsaka anto amɔtshi losango lakandasambishaka oko lɔ bu la wolo ndo anyanya, nde akashihodia dia lɔ laki “wulu wa [Nzambi] utsha lu panda le untu tshe lawetawo.” (Romo 1:16) Ɔnkɔnɛ, kânga etena kakandahomanaka la ɔlɔshamelo, nde akatetemala ‘sambisha la dihonga lo wolo wa Jehowa.’—Etsha 14:1-7; 20:18-21, 24.
3 Kiɔkɔ ya wolo aso: Aha lo wolo ande hita mbakakoke Paulo sambisha la dihonga. Etena kakandatɛkɛtaka dikambo diande ndo dia Silasi, Paulo akafunde ate: ‘L’ɔkɔngɔ wa sho sowa ndo mbotshama sɔnyi la Filipi, sho takonge la dihonga lo ekimanyielo ka Nzambi kaso dia nyotɛ lokumu l’ɔlɔlɔ laki Nzambi l’atei wa ata efula.’ (1 Tes. 2:2; Etsha 16:12, 37) Ndo nto, etena kakinde lo lokanu la Rɔma, Paulo akalɔmbɛ dia akina nɔmba lo wahɔ ande dia Nzambi mbokimanyiya woho wa nde tetemala mbewoya lokumu l’ɔlɔlɔ ‘la dihonga oko wakandahombe tɛkɛta.’ (Ef. 6:18-20) Lo ndjaɛkɛ le Jehowa lo dihole dia ndjaɛkɛ le nde ndâmɛ, Paulo akakoke tetemala sambisha ɔtɛkɛta wa Nzambi la dihonga.—2 Kor. 4:7; Fil. 4:13.
4 Ɔsɔku mbediɔ ɛlɔ kɛnɛ. Ɔnangɛso ɔmɔ lakokaka wolo ndjaeyanya oko Ɔmɛnyi wa Jehowa lo dihole diande dia olimu ndo sambisha lo tshakitudi wanɛ waki lo dihole diande dia olimu akalɔmbɛ lo kɛnɛ kendana la dui sɔ ndo akatatɛ sambisha. L’etatelo osekande ɔmɔtshi la l’olimu akatone dia nde mbosambisha, koko etena kakawotɛ ɔnangɛso dia elongamelo ka eolwelo nde aketawɔ mbeka Bible. Oma ko etena kɛsɔ, ɔnangɛso ɔsɔ akakambaka la diaaso tshɛ diakandakondjaka dia sambisha. Lo olimu okina wakandakondja, nde akakimanyiya anto 34 polo lo batismu lo edja k’ɛnɔnyi 14. Sho koka ndjashikikɛ dia Jehowa ayotokeketsha woho akɔ wâmɛ ‘dia sho tetemala sambisha ɔtɛkɛta ande la dihonga.’—Etsha 4:29.