Kalasa k’Olimu wa Teokrasi ka lo 2001
1 Tekɔ la toshadiya efula t’oma l’Afundelo tatotshutshuya sho tshɛ dia ndjasha tshɛ lo Kalasa k’Olimu wa Teokrasi .—Tuk. 15:23; Mat. 28:19, 20; Etsha 15:32; 1 Tim. 4:12, 13; 2 Tim. 2:2; 1 Pet. 3:15.
2 Wambodjaka ekongelo kɛmɔtshi ka wadielo wa Bible wa lomingu la lomingu lo kalasa kɛsɔ. Tɔ nɔmbaka dia mbadiaka yɛdikɔ ya lɛkɛ ɔtɔi la dikatshi dia Bible lushi tshɛ. Tatɛ oma l’ɔnɔnyi ɔnɛ, wambodja ndo wadielo wa Bible lo lomingu tshɛ lasalema ovuswelo wa lofunda. Ekongelo k’okotsha ka wadielo wa Bible kakawadje lo ɛnɔnyi esato wetshi ɛnɛ kamboshila. Koko naka wɛ kombolaka mbadia Bible efula oleki yoho yɛnyishawɔ l’ekongelo, wɛ kokaka sala ekongelo kayɛ wɛmamɛ ka wadielo.
3 Sawo dia 2 mbetshaka anangɛso dia vɔ mpotɔ “wadielo wa lo sɛkɛ” w’Ɔtɛkɛta waki Nzambi. (1 Tim. 4:13) Naka wɛ mbayosala wadielo, kete wɛ la dia vusolaka wadielo akɔ mbala la mbala la dui dia wolo. Wɛ mbeyaka mpokamɛka wa bandɛ kasɛtɛ yaki Société yele la wadielo wa Bible dia wɛ ndowanya yoho yayɛ ya mbadia alɛta, ya tengolaka dui, ndo mbeka akambo akina wendana la wadielo wa dimɛna.
4 Sawo dia 3 la dia 4 mbɔsama oma lo dibuku Comment raisonner, dibuku diakawatotondjɛ dia sho kambaka ladiɔ olimu l’esambishelo. Naka awui woshawɔ wamboleka efula, kete wɛ kokaka sɔna awui woleki ohomba le etshumanelo kanyu wayɛdima la wenya wa sawo diayɛ. Wɛ mbeyaka kamba la lokongɛ tshɛ lɔtɔnganɛ la ɛtshi kanyu ka nkɛtɛ.
5 Sala la wolo tshɛ dia kotsha ɛkɛndɛ wakoshawɔ lo kalasa k’olimu wa teokrasi. Ɔsa wonya wa nɔngɔsɔla sawo diayɛ dimɛna, ndo kodisha l’otema ɔtɔi. Wɛ ayonga kiɔkɔ y’ekeketshelo le etshumanelo, ndo wɛ ayoyakondjiyɛ wahɔ lo ndjasha l’otema ɔtɔi lo Kalasa k’Olimu wa Teokrasi ka lo 2001.