‘Ngamula osase ayɛ’
1 Andja ɔnɛ wotodingi wekɔ lo wodjima oyadi lo yimba kana lo nyuma. Osase w’akambo wa mɛtɛ tɔkɛnɛmɔlɛka ‘etsha wahatɔ elowa’, etsha wa wodjima woho wa sho mbeya mbewɔ etsha akɔ wakoka tokonya lo nyɔi. Diɔ diakɔ diakakeketsha ɔpɔstɔlɔ Paulo Akristo ate: ‘Nyɔkɛndɛkɛndɛ oko ana w’osase.’—Ef. 5:8, 11.
2 Otshikitanu w’efula wekɔ lam’asa ‘olowa w’osase’ la wodjima wa l’andja ɔnɛ. (Ef. 5:9) Dia sho tɔ olowa ɔsɔ, sho la dia monga bɛnyɛlɔ di’amɛna efula lo kɛnɛ kendana la yoho ya lɔsɛnɔ l’Okristo, mbut’ate weho w’anto wetawɔma le Yeso. Sho pombaka nto kɛnɛmɔla waonga asɔ l’otema aso tshɛ, ndo monga la wangasanu l’akambo wa mɛtɛ. Sho la dia kɛnɛmɔla olowa ɔsɔ lo lɔsɛnɔ laso la lushi la lushi ndo l’olimu aso.
3 Ngamulaka osase lo diaaso tshɛ diakondjayɛ: Yeso akatɛ ambeki ande ate: “Okone usasi anyu ahete la ntundu ka antu.” (Mat. 5:16) Lo mbokoya Yeso, sho pɛtshaka osase waki Jehowa lo sambisha Diolelo diaki Nzambi ndo asangwelo ande. Sho ngamulaka osase aso lam’atatembola anto lawakawɔ ndo lam’adianganyaso akambo wa mɛtɛ l’ahole w’olimu, la kalasa, le asukanyi aso, kana lo dihole tshɛ diakondjaso diaaso.—Fil. 2:15.
4 Yeso akate di’aha anto tshɛ mbayetawɔ osase. (Joa. 3:20) Ɔnkɔnɛ, sho hatohombe ntɛwɔ etena katona anto efula dia “usasi a lukumu l’ololo la lutumbu la Kristu” mbahɛtɛla. (2 Kor. 4:4) Jehowa mendaka etema w’anto ndo nde hatolangaka di’atshi wa kɔlɔ monga l’atei w’ekambi ande.
5 Lam’ayelaso mboka yaki Jehowa ndo wakondjaso osase wa lo nyuma, sho kokaka ngamula osase ɔsɔ la ntondo k’anto akina. Naka vɔ wayɛna oma lo lɔkɛwɔ laso ɔnɛ ‘tekɔ l’osase wa lɔsɛnɔ,’ kete vɔ lawɔ wayotshutshuyama dia sala etshikitanu wahombama dia ndo vɔ koma amɛmbi w’osase.—Joa. 8:12.
6 Lo ngamula osase aso, sho tombolaka Otungi aso ndo kimanyiyaka anto wele l’etema w’ɔlɔlɔ dia vɔ mboweya ndo ndjala l’elongamelo ka lɔsɛnɔ la pondjo. (1 Pet. 2:12) Oko weso l’osase, nyɛsɔ tokambe la wɔ dia kimanyiya anto akina woho wa vɔ tomba oma lo wodjima wa lo nyuma ndo sala etsha wɔtɔnganɛ l’osase.