“Usasi anyu ahete”
1. Dikambo diakɔna dieso la diɛsɛ dia mbutɛ anto akina?
1 Oma ko ehotwelo ka lushi polo ndo lo wodjelo alɔ, osase wɛnama tombolaka Jehowa Nzambi. Koko, Yeso akalɔmbɛ ambeki ande dia vɔ mpɛtsha woho okina w’osase, mbuta ate ‘osase wa lomu.’ (Joa. 8:12) Mpɛtsha osase wa lo nyuma ekɔ diɛsɛ dia woke diele ndo l’ɛkɛndɛ. Yeso akatɛ ambeki ande ate: “Usasi anyu ahete la ntundu ka antu” dia vɔ nkondja wahɔ. (Mat. 5:16) L’atei wa wodjima wa lo nyuma wele nshi nyɛ l’andja, osase ɔsɔ pombaka mpɛta ndo dikambo sɔ diekɔ ohomba efula! Ngande wakokaso mpɛtsha osase aso l’ɛnyɛlɔ ka Kristo?
2. Ngande wakɛnya Yeso ohomba wa mpɛtsha osase wa lo nyuma?
2 Lo nsambisha: Yeso akakambaka la wenya, wolo ndo diangɔ diaki la nde dia mbeyanya osase w’akambo wa mɛtɛ le anto akina lo mvudu yawɔ, l’ɛsɛsɛ, l’akona, mbuta ate ahole tshɛ wakatanemaka anto. Nde akashihodia ohomba w’efula wa mpɛtshɛ anto osase wa lo nyuma w’akambo wa mɛtɛ. (Joa. 12:46) Dia dikambo sɔ salema lo yɛdikɔ y’efula, Yeso akalowanya ambeki ande dia vɔ monga “[osase w]a wa la kete.” (Mat. 5:14) Osase awɔ wakahɛtɛ lo woho wakawasalɛka asukanyi awɔ akambo w’ɛlɔlɔ ndo lo woho wakawasambishaka akambo wa mɛtɛ.
3. Ngande wakokaso mɛnya lowando l’osase w’akambo wa mɛtɛ?
3 Ekambi waki Nzambi mbɔsaka ɔkɛndɛ wele la wɔ wa ‘ntetemala nkɛndakɛnda oko ana wa yanyi’ la nɛmɔ ndo vɔ sambishaka dihole tshɛ diakokawɔ ntana anto. (Ef. 5:8) Wadielo wa Bible kana w’ekanda aso ekina lo sɛkɛ etena keso l’olimu kana l’etena ka diomuyelo la kalasa kokaka tosha diaaso dia sho nkɛtshanya l’anto awui wa lo Afundelo. Lo nsala ngasɔ, kadiyɛso kɛmɔtshi ka dikɛnda akatatɛ wekelo wa Bible l’onto ɔmɔtshi ndo akakahe abuku 12 le asekande wa la kalasa!
4. Lande na kele ‘ɔhɛtshɛlɔ w’osase aso’ nɔmbaka dia sho monga lɔkɛwɔ la dimɛna?
4 Lo nkamba olimu wa dimɛna: Dia mpɛtsha osase aso, sho nɔmbamaka nto monga la lɔkɛwɔ la dimɛna lushi la lushi. (Ef. 5:9) L’olimu, la kalasa ndo l’ahole akina, Okristo pombaka monga la lɔkɛwɔ la dimɛna nɛ dia kɛsɔ ayowosha diaaso dia nde mbutɛ anto akina akambo wa mɛtɛ w’oma lo Bible. (1 Pet. 2:12) Ɛnyɛlɔ, lɔkɛwɔ la dimɛna laki l’ɔna dikɛnda l’ɛnɔnyi etanu lakatshutshuya ombetsha ande dia nde mbelɛ ambutshi ande. Nde akate ate: “Latɛnaka ɔna lele la lɔkɛwɔ la pudipudi la nganɛ!” Mɛtɛ, olimu aso ndo lɔkɛwɔ la so la dimɛna kotolaka anto oya lo ‘osase wa lomu’ ndo tombolaka Nzambi kaso.