“Nzambi mbeyaka ntsha akambu tshe”
1 Olimu wa ntondo w’etshumanelo k’Akristo ele wa sambisha losango la Diolelo l’andja w’otondo. (Mat. 24:14) Ɔsɔ kema olimu wa tshitshɛ. Anto efula watenda mɛnaka di’olimu ɔsɔ nɔmbaka dia sho monga l’ekondjelo k’efula koleki kɛnɛ kele laso. Anto akina hawoleke mbetawɔ dia sho kokaka kamba olimu ɔsɔ lam’ele anto tɔsɔkaka, todjɛka wekamu, ndo tɔhɛnyahɛnyaka. (Mat. 24:9; 2 Tim. 3:12) Akanga wa diɔnyɔ wekɔ l’eshikikelo dia hatokokaki tondoya olimu ɔnɛ pondjo. Koko, Yeso akate ate: “[Nzambi] mbeyaka tsha akambu tshe.”—Mat. 19:26.
2 Bɛnyɛlɔ di’Amɛna dia Ndjela: Lam’akatatɛ Yeso olimu ande, nde aki oko onto ɔtɔi lalɔshana l’andja w’otondo. Dia pemba mbôshimba di’aha nde tondoya olimu ande, atunyi wakôsalɛ weho w’akambo tshɛ wakakoke mbosha sɔnyi polo ndo lo vɔ ndjôyaka nyɔi ka kɔlɔ efula. Koko, l’ekomelo, Yeso akate l’eshikikelo tshɛ ate: “Dimi lambuleka wa la kete wulu.” (Joa. 16:33) Ɔsɔ mɛtɛ aki dikambo dia diambo efula!
3 Ambeki waki Yeso wakɛnya dihonga ndo ohetoheto wa woho akɔ wamɛ l’olimu w’Akristo. Efula wakadjama eshingɔ, wakakɔmama, wakadjama lo lokanu ndo wakakome polo ndo lo ndjakema. Koko, vɔ “wa[k]angenangena[ka] ne dia vo wakakuki dia monywama dia lukumbu [lande].” (Etsha 5:41) Kânga mbakawâsalɛ ngasɔ, vɔ wakakambe olimu wakɛnaka anto di’oko hawokokaki salema, mbut’ate olimu wa sambisha lokumu l’ɔlɔlɔ “edja ndu l’ekumelu ka kete.”—Etsha 1:8; Kol. 1:23.
4 Woho Wakokaso Tondoya lo Nshi Yaso Nyɛ: Sho lawɔ takatatɛ olimu w’esambishelo ka Diolelo l’ohetoheto tshɛ kânga mbakɛnaka anto di’oko hatokokaki tondoya olimu akɔ. Kânga mbatoshimbawɔ dia sambisha, mbatɔhɛnyahɛnyawɔ, mbatodjawɔ lo nkanu, ndo mbasalawɔ akambo akina wa ngala dia memadja olimu aso, tekɔ lo tatetemala kamba olimu akɔ. Lande na kahatahekɔ olimu ɔsɔ na? “Aha uma lu wulu wa ta, kana uma lu khudu, keli uma le Nyuma kami, mbata [Jehowa] Kanga lulimbilimbi.” (Zek. 4:6) Lam’ele Jehowa ekɔ lo tosukɛ, ndoko kakoka memadja olimu aso!—Romo 8:31.
5 Etena kasambishaso, sho hatohombe mboka sɔnyi, mboka wɔma kana mɛna di’oko sho kema l’akoka. (2 Kor. 2:16, 17) Tekɔ l’ɛkɔkɔ woleki tshɛ watotshutshuya dia tetemala la pandjola lokumu l’ɔlɔlɔ la Diolelo. L’ekimanyielo ka Jehowa, tayokotsha kɛnɛ kele “wulu”!—Luka 18:27.