‘Ɔtɛkɛta wa Nzambi . . . Wekɔ la Nkudu’
1 Paulo akafunde ate ‘ɔtɛkɛta wa Nzambi wekɔ la lɔsɛnɔ ndo la nkudu.’ (Heb. 4:12) Akandalange mbuta lâsɔ na? Ɔtɛkɛta wa Nzambi kana losango lele lo Bible koka monga la shɛngiya ya wolo le anto. Lomba latanema lo Bible lekɔ la wolo wa ndowanya lɔsɛnɔ l’onto. Esambelo ndo elongamelo kashatɔ kotolaka anto oya le Jehowa Nzambi, Ɔnɛ Lashana Lɔsɛnɔ. Losango latɔ mbidjaka anto w’etema ɔlɔlɔ lo mboka k’otsha lo lɔsɛnɔ la pondjo. Ɔnkɔnɛ, dia kondja etombelo ɛsɔ, sho pombaka kamba la Bible etena kasambishaso anto akina.
2 Adiaka Divɛsa Dimɔtshi lo Diaaso Tshɛ: Mɛnamaka di’apandjudi efula waya bu la mbekelo ka kambaka la Bible l’esambishelo ka lo soko la soko. Onde ɔsɔku mbediɔ ndo le yɛ? Lam’ele mɛnamaka di’anto efula bu letena k’otale ka sawola la so, ondo yema yema wɛ aya la mbekelo ka mbishaka paka ekanda kana shila akambo wele lo divɛsa dimɔtshi ko mbeta. Tambokeketsha apandjudi tshɛ dia sala la wolo dia mbadiaka kânga divɛsa ɔtɔi oma lo Bible etena kasambishaso lokumu l’ɔlɔlɔ woho wa kimanyiya onto dia nde mɛna ɔnɛ losango lakiso tanemaka mɛtɛ l’Ɔtɛkɛta waki Nzambi.
3 Kânga mbele anto yema tshitshɛ tsho mbele la mbekelo ka mbadiaka Bible, anto efula wekɔ lo tetemala la kiɔsa la nɛmɔ. Mbala efula, kânga anto wele l’elimu efula wa kamba mbetawɔka dia mbɔsa kânga minitɛ ngana tsho dia mpokamɛ losango ladiema mbala kakɔ ɔtɔi oma l’Ɔtɛkɛta wa Nzambi. Lam’adiema divɛsa dimɔtshi diasungana la wangasanu ndo walembetshiyamadiɔ lo tshena pe, nkudu k’ɔtɛkɛta wa Jehowa kokaka monga la shɛngiya y’ɔlɔlɔ le ompokami. Ko ngande wakokayɛ mbɔtɔnganyiya ɛtɛkɛta ayɛ wa mbɔtwɛlɔ la wadielo wa divɛsa di’oma lo Bible na?
4 Hemba Dikambo Sɔ l’Okahanyelo wa Periodikɛ: Omendji ɔmɔtshi w’eteta akakambe l’avɛsa lo yoho y’ɔlɔlɔ lam’akandakahanyaka periodikɛ. Nde akatshu la Bible ka tshitshɛ lo dibenga diande. L’ɔkɔngɔ wa nde mbisha onto periodikɛ ndo wa nembetshiya ɔtɛ ɔmɔtshi wa dui lo tshena pe, nde mbufolaka Bible mbala kakɔ ɔtɔi ndo mbadiaka divɛsa dimɔtshi diɔtɔnɛ la sawo diakɔ. Dikambo sɔ koka salema lo mimbola tsho ɔnɛ: “Akanayɛ lo kɛnɛ kendana la daka nɛ diasha ekeketshelo na?” ndo oma lâsɔ ko mbadia divɛsa dimɔtshi diakasɔnami.
5 Yadjɛ oyango wa mbadiɛka ompokami ayɛ tshɛ divɛsa ɔtɔi kana ahende. Nkudu katshutshuya anto kele la diɔ koka ndiholɛ anto efula mboka dia vɔ ndjasukanya oya le Nzambi.—Joa. 6:44.