Tokambe la Bible Dimɛna
1. Kakɔna kakokayɛ sala lam’ayalɔngɔsɔlayɛ otsha l’olimu w’esambishelo?
1 Oyadi okanda akɔna wakatalɔngɔsɔdi dia tosha anto l’esambishelo, ekɔ ohomba sɔtɔla divɛsa dimɔtshi diatshutshuya anto dia kana yimba diakokaso tadiɛ wanɛ wayotohokamɛ. (Heb. 4:12) Sɔtɔla divɛsa oma l’okanda washayɛ onto ayokokimanyiya dia wɛ mbɔtshiya dimɛna awui walangayɛ sawola l’onto l’okanda akɔ. L’ahole amɔtshi, apandjudi wakɛnyi ɔlɔlɔ kimɛka Bible l’anya awɔ etena kasawolawɔ l’onto kana kasambishawɔ lo luudu la luudu.
2. (a) Ngande wakokaso tatɛ sawo diaso la divɛsa dimɔtshi? (b) Awui akɔna wa l’Afundelo wayasha anto wa l’ɛtshi kanyu ka nkɛtɛ?
2 Tatɛ la Divɛsa Dimɔtshi: Apandjudi amɔtshi mimɛka sawo lo mimbola onto lasawola lawɔ dimbola dimɔtshi dialɔmba onto dia mbisha kanyi yande diendana la divɛsa dimɔtshi, oma lâsɔ ko vɔ tatɛ mbadia divɛsa diakɔ. Dikambo sɔ kotolaka yambalo y’onto esadi l’Ɔtɛkɛta waki Nzambi. Onde mbɔtwɛlɔ mɔtshi yayela nyɛ kokaka monga l’etombelo w’ɔlɔlɔ l’ɛtshi kanyu ka nkɛtɛ?
◼ “Naka wɛ ekɔ la wolo wa sala ngasɔ, onde wɛ hosala etshikitanu ɛsɔ?” Adia Enyelo 21:4.
◼ “Lande na kotɔsɛna lo tena dia wolo dia nganɛ na?” Adia 2 Timote 3:1-5.
◼ “Onde wɛ fɔnyaka dia tshunda diaso di’anto diayonga dihole dia dimɛna efula naka onto tshɛ ndjela dako nɛ diayela?” Adia Mateu 7:12.
◼ “Onde wɛ fɔnyaka di’ana ayɛ kokaka monga la yoho ya lɔsɛnɔ yɔkɔndɔdiwɔ lanɛ?” Adia Osambu 37:10, 11.
◼ “Onde wɛ fɔnyaka di’ɛtɛkɛta ɛnɛ wayokotshama lushi lɔmɔtshi?” Adia Isaya 33:24.
◼ “Onde wɛ mbeyaka otshikitanu wa lowandji wɔtɛkɛtshiwɔ lanɛ?” Adia Danyele 2:44.
◼ “Onde wɛ ambokombolaka dia mboka Nzambi wombola ɔnɛ?” Adia Jobo 21:7.
◼ “Onde sho kokaka ndjɛna wakiso wa ngandji wakavu nto?” Adia Joani 5:28, 29.
◼ “Onde wanɛ wambovɔ mbeyaka kɛnɛ kasala wanɛ wele la lɔsɛnɔ?” Adia Undaki 9:5.
3. Ngande wakokaso kimanyiya anto dia vɔ shihodia avɛsa wa lo Bible wadiaso?
3 Lembetshiya, Sha Ɛnyɛlɔ, Ɛnya Woho wa Kamba la Diɔ: Naka onto nangaka dia nyu sawola, kete tosawolake la nde lowango lowango. Koko, ɔsa etena ka nembetshiya, mbisha ɛnyɛlɔ, ndo mɛnya woho wa kamba la divɛsa diadayɛ dia onto mbodishihodia. (Neh. 8:8) Etena kashihodia anto ndo ketawɔwɔ kɛnɛ ketsha Ɔtɛkɛta waki Nzambi, dui sɔ koka mbela etshikitanu wa diambo lo nsɛnɔ yawo.—1 Tes. 2:13.
4. Ngande wakokaso kamba la Bible dimɛna lo waendelo w’eyoyo?
4 Totetemale kamba la Bible dimɛna oko wayangaso dia pamia nsaki. Sho kokaka kamba la shambu yakɔ yâmɛ etena kasalaso waendelo w’eyoyo: (1) Sɔtɔla divɛsa diahombama. (2) Oka wombola wa wɔdu watshutshuya onto dia mbisha kanyi yande wendana la divɛsa diɔsɔnyiyɛ. Oma lâsɔ, adia diɔ. (3) Lembetshiya, sha ɛnyɛlɔ ndo ɛnya woho wa kamba ladiɔ. Sala la wolo dia onto lembolayɛ kotshaka dikambo dimɔtshi l’ewo kande k’Ɔtɛkɛta waki Nzambi etena tshɛ kawembolayɛ. Wɛ kokaka ndjotatɛ esadi eto la nɔmbɔla wekelo wa Bible!