Sala la Wolo dia Mbishola Akanga wa Mpoke Wele lo Mbilo Kanyu

¹ Jehowa ekɔ lo mbisha leeta lɔnɛ ate: “Yaka! . . . One lalanga ose ashi a lumu wososa.” (Eny. 22:17) Lofulo latadɛ tsho l’akanga wa mpoke wekɔ l’atei wa wanɛ wetawɔ lo leeta lɔsɔ. Etombelo wamonga la dikambo sɔ ele, l’ɛnɔnyi 13 wetshi, tshumanelo 26 dia l’ɔtɛkɛta w’akanga wa mpoke ndo elui suke la 50 wakatema l’États-Unis.

² Kânga mbele tshumanelo l’elui wa l’ɔtɛkɛta w’akanga wa mpoke mbidjaka weolo wakiwɔ tshɛ dia sambisha akanga wa mpoke watanema lo mbilo yawɔ, ekɔ akanga wa mpoke efula lo wodja aso ɔnɛ wahombaso nyanga ndo sambisha.

³ Ngande Wokokiyɛ Kimanyiya Anto Asɔ? Wonya weyɛ l’ahole wa tanema anto efula, onde wɛ ambɛnaka anto amɔtshi watɛkɛta lo tɔjɛstɛ ondo? Onde wɛ mbeyaka onto ɔmɔtshi lo dihole diayɛ di’olimu kana la kalasa lele ose nkumbo kande ɔmɔtshi ekɔ ehoke? Dja yimba dia tana akanga wa mpoke lam’asalayɛ elimu ayɛ wa lushi la lushi. Ko ngande wakokayɛ mbeya dia vɔ wayetawɔ esambishelo ka Diolelo na?

⁴ Lo Sambisha: Naka wɛ ambotana onto ɔmɔtshi lele ehoke, ko wɛ mbewoya etshumanelo kana olui w’ɔtɛkɛta w’akanga wa mpoke woleki suke la lam’ende adrɛsɛ ande. Akanga wa mpoke efula pamaka esadi lo wekelo w’akambo wa mɛtɛ etena kɛnɛ kewɔ l’akoka wa sangana vɔ l’Ɛmɛnyi wele akanga wa mpoke lo nsanganya ya l’etshumanelo yalɔmbwama l’ɔtɛkɛta w’akanga wa mpoke, mbut’ate wa tɔjɛstɛ. Lâsɔ, naka etshumanelo kana olui ɔmɔtshi wasala nsanganya l’ɔtɛkɛta wa tɔjɛstɛ wekɔ lo ngelo kanyu, kete sekeletɛlɛ ka l’etshumanelo kanyu pombaka mbewoya etshumanelo kɛsɔ kɛnɛ kendana l’akanga wa mpoke tshɛ wa lo mbilo kanyu.

⁵ Ko kayotota naka ndoko onto lele suke dia kimanyiya akanga wa mpoke wele l’ɛtshi kanyu ka nkɛtɛ lo nyuma na? Ngande wokokiyɛ mbakimanyiya na? Ko lande na kahayakalola dia ntowaembola ndo sawola l’ose nkumbo kawɔ ɔmɔtshi lele bu ehoke na? Lɔmbawɔ dia mbaɛnya bandɛ vidɛo ka l’ɔtɛkɛta w’akanga wa mpoke dia nomialomia nsaki k’ɔnɛ lele ehoke. Apandjudi amɔtshi wakeke ɔtɛkɛta w’akanga wa mpoke w’ase Amɛrikɛ dia vɔ nyomoleka sawola dimɛna lawɔ. (Etsha 16:​9, 10) Biukubuku Kakɔna katɔlɔmba Nzambi? ndo dibuku Ewo tanemaka lo bandɛ vidɛo ka l’ɔtɛkɛta w’akanga wa mpoke w’ase Amɛrikɛ. Nɔmbɔla wekelo wa Bible lo kamba la dihomɔ sɔ amboshila tondja etombelo w’amɛna efula.

⁶ Lo sala tshɛ dia tana akanga wa mpoke wele l’ɛtshi kaso ka nkɛtɛ, sho kokaka mbasha diaaso dia vɔ mbɔsa ashi wa lomu wɔsɔsa.​—⁠Mat. 10:11; Eny. 7:⁠9.