Ntondo ka nsambisha, toyange anto
1. Lande na kele lo bɛtshi dia nkɛtɛ diatɛkɛtama ɛtɛkɛta efula, etshumanelo tshɛ nongolaka ɛtshi ka nkɛtɛ katɛkɛta anto ɔtɛkɛta awɔ?
1 Lo Pɛntɛkɔsta ka lo 33 T.D., l’ɔkɔngɔ wa vɔ nongola nyuma k’ekila, ambeki waki Yeso ‘wakatatɛ ntɛkɛta lo ɛtɛkɛta wotshikitanyi’ w’anto wakaye oma l’ahole wa ntale. (Etsha 2:4) Etombelo waki la dui sɔ ele suke l’anto 3 000 wakabatizama. Dui dia diambo ko, mɛnamaka di’efula l’atei w’angɛndangɛnda asɔ wakatɛkɛta ɔtɛkɛta ɔmɔtshi wakatɛkɛtaka anto efula, ɛnyɛlɔ Hɛbɛru kana Grɛkɛ. Koko Jehowa akalange dia vɔ sambishama losango la Diolelo lo ɛtɛkɛta awɔ wa lôtɔ. Aha la tâmu, ɔkɔkɔ ɔmɔtshi wakasale Jehowa dui sɔ ele mbala efula anto mongaka suke dia mbetawɔ lokumu l’ɔlɔlɔ etena kâsambishawɔ l’ɔtɛkɛta awɔ wa lôtɔ. Diakɔ diele ɛlɔ kɛnɛ, lo bɛtshi dia nkɛtɛ diatɛkɛtama ɛtɛkɛta efula, etshumanelo tshɛ kekɔ la ɛtshi ka nkɛtɛ kele l’anto watɛkɛta ɔtɛkɛta awɔ. (Tamboyakongɛ, lɛkɛ 107, od. 2-3) Elui wasala nsanganya l’ɛtɛkɛta w’angɛndangɛnda hawolongola ɛtshi ka nkɛtɛ, koko vɔ sambishaka wanɛ watɛkɛta ɔtɛkɛtaka akɔ l’ɛtshi ka nkɛtɛ k’etshumanelo kâlɔmbɔla ndo ka tshumanelo dikina diosukanyi la olui awɔ.
2. a) Kakɔna kalembetshiya olimu wa nyanga anto ndo lende akokaso mbayanga? b) Ngande wakoka tshumanelo diele lo ɛtshi ka nkɛtɛ katɛkɛtama ɛtɛkɛta efula kimanyiyana lam’asadiɔ? c) Kakɔna kahombaso nsala naka tambotana onto lɛnya nsaki latɛkɛta ɔtɛkɛta okina?
2 Naka tekɔ l’ɛtshi ka nkɛtɛ katɛkɛta anto tshɛ ɔtɛkɛta akɔ wâmɛ, kete tayosambisha l’oseka luudu tshɛ. Koko naka tekɔ lo mbidjasɛ lo ɛtshi ka nkɛtɛ katɛkɛta anto ɛtɛkɛta wotshikitanyi, kete hatotosala ngasɔ. Tshumanelo diasala nsanganya lo ɛtɛkɛta wotshikitanyi mbeyaka nsambisha lo ɛtshi kâmɛ ka nkɛtɛ. Kânga mbakoka tshumanelo dikina nyosha nkombo y’anto watɛkɛta ɔtɛkɛta anyu, nyeye dia nyu mbele la ɔkɛndɛ wa ntondo wa nyanga anto watɛkɛta ɔtɛkɛta wasalema nsanganya l’etshumanelo kana l’olui anyu. (Enda kiombo yele l’ɔtɛ a dui ɔnɛ: “Tokimanyiyane lam’asaso.”) Lâsɔ, nyu pombaka nyanga anto asɔ lo mimbola anto wakoka nyotɛ lɛnɛ akokanyu mbatana. Ngande wakokaso nyanga anto watɛkɛta ɔtɛkɛta ɔmɔtshi?
3. Tɛdikɔ takɔna tahomba mbɔsa etshumanelo kana olui dia nyanga anto wewɔ l’ohomba ndo wenya engana wahombawɔ mbetsha l’olimu ɔsɔ?
3 Woho wa nkongɛ olimu wa nyanga anto: Lofulo la wenya lahombaso mbetsha l’oyangelo w’anto lo ɛtshi ka nkɛtɛ katɛkɛta anto ɛtɛkɛta efula nemanɛka l’akambo wa lo ɛtshi kaso ka nkɛtɛ. Ɛnyɛlɔ, anto angana wa lo ngelo kanyu watɛkɛta ɔtɛkɛta wasalema nsanganya l’etshumanelo kana l’olui anyu? Apandjudi angana wele l’etshumanelo kana l’olui anyu? Adrɛsɛ w’anto angana wamboshila nkondja etshumanelo kana olui anyu? Etshumanelo hatosala oyangelo w’anto asɔ lo yɛdikɔ yâmɛ lo bɛtshi tshɛ dia nkɛtɛ, koko tɔ mbeyaka mɛna ɔlɔlɔ ntshɔ lo bɛtshi dia nkɛtɛ diele anto emete emete diosukanyi la wɔ ndo diele bu etale efula. Koko ekɔ ohomba nyu monga la ekongelo ka dimɛna ka nyanga anto wenyu l’ohomba dia nyu mbisha anto efula diaaso dia vɔ tɛndɛ lokombo laki Jehowa.—Romo 10:13, 14.
4. a) Ngande wahomba kongɛma olimu wa nyanga anto? b) Naa toho tɔmɔtshi takokaso nyanga anto watɛkɛta ɔtɛkɛta wasalema nsanganya l’etshumanelo kana l’olui aso?
4 Diaha nshisha wenya oshishashisha l’oyangelo w’anto weso l’ohomba, olui wa dikumanyi, djekoleko omendji w’olimu pombaka nkongɛ akambo dimɛna ndo menda woho wakambema olimu akɔ. (1 Kor. 9:26) Lo elui wasala nsanganya lo ɔtɛkɛta okina, ɔnangɛso ɔmɔtshi lele l’akoka, ndeka dimɛna ekumanyi kana okambi wakimanyiya, layɔsɔnama oma le olui wa dikumanyi kokaka nɔmbɔla olimu ɔsɔ. Tshumanelo ndo elui efula mbɔsaka tɛdikɔ ta tokotayangi anto wewɔ l’ohomba, ɛnyɛlɔ lo mimbola anto dia vɔ mbalakanya lɛnɛ akokawɔ ntana anto watɛkɛta ɔtɛkɛta ɔmɔtshi. Oma lâsɔ, sho kokaka ndjotshɔ l’ahole wakawatolakanyisha dia mbeya adrɛsɛ wahombaso mbidja lo dikatshi diaso di’ɛtshi ka nkɛtɛ. Olui wa dikumanyi wenda olui ɔmɔtshi mbeyaka mbɔsa tɛdikɔ di’etshumanelo k’otondo ntshɔ toyanga anto watɛkɛta ɔtɛkɛta wasalema nsanganya l’olui ɔsɔ, naka dui sɔ kokaka salema.—Enda kiombo yele l’ɔtɛ a dui ɔnɛ: “Woho wakokaso ntana anto watɛkɛta ɔtɛkɛta aso.”
5. a) Naa alako amɔtshi wahomba apandjudi ndjela etena kewɔ l’olimu wa nyanga anto? b) Kakɔna kakokawɔ mbutɛ anto etena kasalawɔ olimu ɔsɔ?
5 Sho pombaka monga la oyango ɔmɔtshi etena kayakimɔso dia nyanga anto watɛkɛta ɔtɛkɛta ɔmɔtshi. Lam’ele olimu ɔsɔ wekɔ etenyi kɛmɔtshi k’esambishelo, sho pombaka ndɔtaka dimɛna. Anto efula mɛnaka ɔlɔlɔ tohodi mbɔtwɛlɔ yayotokamba la wɔ ndo tatɛkɛtaka ɔtɛkɛta watawayange anto mbakimanyiyaka dia vɔ ntɛkɛta la waasaso ndo dia vɔ ndowanya diewo diawɔ di’ɔtɛkɛta. Sho mbeyaka mbadia wenya wetshaso l’olimu wa nyanga anto, koko aha wenya wetshaso dia nsanga ɛtshi ka nkɛtɛ kana dia nsala listɛ l’anto. Etena katanaso onto latɛkɛta ɔtɛkɛta wele anto watɛkɛta ɔtɛkɛta akɔ mbatatayange, sho pombaka nsala la wolo dia mbosambisha lokumu l’ɔlɔlɔ ndo aha la ntshimbatshimba sho pombaka mbewoya omendji w’olimu kana onto ɔmɔtshi lakandasha ɔkɛndɛ ɔsɔ dia nkotsha lokombo l’onto ɔsɔ lo dikatshi di’ɛtshi ka nkɛtɛ. Sho pombaka nsala dui sɔ oyadi onto akɛnyisha nsaki kana bu. Kânga mbele olimu wa nyanga anto wekɔ ohomba, sho pombaka monga la wɛdimo ndo ndjakimɔ lo toho tshɛ tendana l’olimu w’esambishelo.—Enda kiombo yele l’ɔtɛ a dui ɔnɛ: “Kɛnɛ kakokaso mbuta etena katatayange anto.”
6. Ekakatanu akɔna wa lânde wele la olimu wa nyanga akanga wa mpoke?
6 Woho wa nyanga akanga wa mpoke: Olimu wa nyanga akanga wa mpoke wekɔ la ekakatanu wa lânde ndo dui sɔ nɔmbaka dia mbidja welo ndo monga la etete. Hatokoke mbeya kanga ehoke oma lo lokombo lande, oma lo diema diande kana oma l’ɔlɔtɔ ande. Ndo nto, ase nkumbo ndo angɛnyi mbeyaka mengenga dia mbewoya apandjudi akambo wendana la kanga ehoke lo fɔnya diele oko wayowodja lo wâle. Alako wayela anɛ wendana la woho wa nyanga akanga wa mpoke wayotokimanyiya ndo dia nyanga anto watɛkɛta ɔtɛkɛta okina.
7. a) Ambola akɔna wakokaso mboka anto dia vɔ tolakanya lɛnɛ akokaso ntana akanga wa mpoke? b) Akokaso nsala dia monola tokanyi ta kɔlɔ tele la ompokami aso?
7 Tshumanelo kana elui w’ɔtɛkɛta w’akanga wa mpoke wakakondja etombelo w’ɛlɔlɔ lo tambolaka ahole wakoka anto asɔ tanema. Onto lasambishaso mbeyaka mbeya osukanyi, osekande la l’olimu kana la la kalasa latɛkɛta ɔtɛkɛta w’akanga wa mpoke. Mbeyaka monga ko nde akɛnyi efundelo ɛmɔtshi wɛnyishawɔ ɔnɛ akanga wa mpoke wekɔ lanɛ. Mbeyaka monga ko nde ekɔ la owotɔ ɔmɔtshi wele kanga ehoke. Teye dia anto amɔtshi mbeyaka tokanɛ kɔlɔ naka towambola ɔnɛ weho w’anto kapanda bu lanɛ. Koko, ekɔ awui amɔtshi wakokaso nsala diaha anto tokanɛ kɔlɔ, ɛnyɛlɔ lo tɛkɛta la loshilambo tshɛ ndo lo tshena pe ndo lo mbuta awui w’eshika. Anto amɔtshi wakakondja etombelo w’ɛlɔlɔ lo nkamba la Bible kana DVD di’akanga wa mpoke etena kambolawɔ onto lasawola la wɔ dia kana nde mbeyaka onto ɔmɔtshi lele lohoke. Oma lâsɔ vɔ mbeyaka mbuta lo tshena pe dia wekɔ lo nkombola mbewoya ase mpoke elongamelo k’oma lo Bible. Naka ompokami aso ekɔ lo mengenga dia totɛ lɛnɛ ele akanga wa mpoke, nde mbeyaka mbetawɔ dia sho mbosha adrɛsɛ aso kana sho tshikɛ owotɔ kana ɔngɛnyi ande wele ehoke dikatshi dia leeta di’oya lo losanganya lɔmɔtshi la l’etshumanelo.
8. Ngande wakoka tshumanelo dikina sukɛ etshumanelo k’akanga wa mpoke?
8 Mbala ɔtɔi kana hiende l’ɔnɔnyi, etshumanelo k’ɔtɛkɛta w’akanga wa mpoke mbeyaka mbelɛ etshumanelo kosukanyi la wɔ kasala nsanganya l’ɔtɛkɛta okina dia ndjakimanyiya dia nyanga ase mpoke l’ɛtshi ka nkɛtɛ ka woke katɛkɛtama ɛtɛkɛta efula. Losanganya l’otsha l’olimu w’esambishelo layosala etshumanelo k’akanga wa mpoke kokaka monga l’alako amɔtshi wendana l’olimu ɔsɔ ndo la wɛnyɛlɔ ɔmɔtshi. Olui tshɛ w’apandjudi pombaka monga l’opandjudi ɔmɔtshi w’oma l’etshumanelo k’akanga wa mpoke ndo vɔ monga la kartɛ k’ɛtshi ka nkɛtɛ shikaa kayangawɔ toyanga anto.
9. Ngande wakoka oyangelo w’akanga wa mpoke salema l’ahole watshɔwɔ dia tɔtɛkɛta awui awɔ, dia tɔkɔkɔla demba kana dia toyanga elimu?
9 Oyangelo w’akanga wa mpoke kokaka salema nto l’ahole weyama dia vɔ sanganaka ndo tshɔka lɛkɔ dia tɔtɛkɛta awui awɔ, dia tɔkɔkɔla demba kana dia toyanga elimu. Apandjudi pombaka ndɔtaka dimɛna l’olimu wakambawɔ. Lo dihole dia sambisha olui w’otondo w’akanga wa mpoke, ndeka dimɛna nsawola l’ɔtɔi kana ahende wa l’atei awɔ lo sheke. Naka sawo diambeta dimɛna, kete nyu kokaka mbishana la wɔ nkombo l’adrɛsɛ anyu.
10. Ngande wakoka apandjudi nyanga anto wewɔ l’ohomba l’ahole wakamba anto olimu lo ngelo kawɔ?
10 Yoho kina yakokanyu nsala ele nsala kartɛ kɛnya ahole wakamba anto elimu, k’oma lâsɔ ndjotshɔ l’ahole asɔ l’etena kahombama. Lo kartɛ kɛmɔtshi, nyu mbeyaka mɛnya ahole wasondjawɔ esasɛ kana mazoto. Lo kekina, nyu kokaka mɛnya ahole wele rɛstora, ɛtɛlɛ kana weho w’elimu ekina wasalema. Naka kartɛ la kartɛ kekɔ la woho w’olimu ɔmɔtshi wakambema lo ngelo kanyu, kete apandjudi kokaka nkamba la woho wa mbɔtwɛlɔ wɔtɔnɛ la kartɛ kawɔ ndo manyamanya mbɔtwɛlɔ kakɔ. Ɛnyɛlɔ, lam’ele lo ɛtɛlɛ efula vɔ pangiyaka ndo akanga wa mpoke, sho kokaka nembetshiya owandji w’ɔtɛlɛ lo tshena pe olimu wakambaso ndo mbosha DVD yakatshwe la so ndo dikatshi dia leeta di’oya lo losanganya lɔmɔtshi la l’etshumanelo dia nde mbisha akanga wa mpoke wohangi l’ɔtɛlɛ awɔ. L’ahole amɔtshi wakambawɔ elimu, sho kokaka mimbola dia kana ase olimu amɔtshi kana ewandji ɛmɔtshi w’olimu mbeyaka ɔtɛkɛta w’akanga wa mpoke. Naka kalasa kɛmɔtshi k’akanga wa mpoke kekɔ lo ɛtshi kaso ka nkɛtɛ, kete sho kokaka mbasha DVD mɔtshi dia vɔ mbidja lo bibliɔtɛkɛ awɔ.
11. Lande na kele olimu wa nyanga anto wekɔ etenyi k’ohomba k’olimu aso w’esambishelo?
11 Olimu w’ohomba: Nyanga anto watɛkɛta ɔtɛkɛta wasalema nsanganya l’etshumanelo kaso bu dui tshitshɛ. Ndo nto, lo bɛtshi dimɔtshi dia nkɛtɛ mbeyaka monga tshondo y’okakatanu dia monga la adrɛsɛ wa shikaa l’ɔtɛ wa wonwelo w’anto. Koko l’ahole efula, oyangelo w’anto wekɔ etenyi kɛmɔtshi k’ohomba k’olimu aso w’esambishelo. Jehowa lakatosha ɔkɛndɛ wa nsambisha kema la shɔnɔdi. (Etsha 10:34) Nde ‘nangaka dia weho w’anto tshɛ shimbamela ndo nkoma lo ewo k’oshika k’akambo wa mɛtɛ.’ (1 Tim. 2:3, 4) Ɔnkɔnɛ, sho kokaka nkamba kâmɛ la Jehowa ndo lam’asaso dia ntana anto wa l’ɛtɛkɛta tshɛ ‘walongola ɔtɛkɛta wa Nzambi l’etema w’amɛna.’—Luka 8:15.
[Kiombo ya lo lɛkɛ 5]
Tokimanyiyane lam’asaso
Naka etshumanelo kana olui wekɔ l’ohomba w’ekimanyielo dia nyanga wanɛ watɛkɛta ɔtɛkɛta awɔ dia mbasambisha, kete omendji w’olimu kokaka mɛnana la dikumanyi dia lo tshumanelo diosukanyi la wɔ diasala nsanganya l’ɛtɛkɛta ekina. Ndeka dimɛna vɔ mɛnana paka la dikumanyi dia lo tshumanelo diele bu etale efula ndo diele l’anto efula watɛkɛta ɔtɛkɛta watawayange anto. Tshumanelo dialɔmbawɔ ekimanyielo kokaka mbewoya apandjudi awɔ dia naka wambotana onto ɔmɔtshi latɛkɛta ɔtɛkɛta wayangawɔ anto, kete vɔ pombaka mfunda adrɛsɛ ande ko mbisha omendji w’olimu dia nde tomɛ etshumanelo kana olui wakalɔmbɛ ekimanyielo. Emendji w’olimu wa lo tshumanelo diakamba lo ɛtshi ka nkɛtɛ kâmɛ katɛkɛtama ɛtɛkɛta efula pombaka nkamba kâmɛ ndo nɔmbɔlaka anto wayasha l’akambo wa mɛtɛ otsha lo etshumanelo kana olui walɔmbwama nsanganya l’ɔtɛkɛta awɔ.
Naka apandjudi wambotana onto ɔmɔtshi layasha lahatɛkɛta ɔtɛkɛta awɔ (kana ehoke), kete aha la ntshimbatshimba vɔ pombaka ndodia fɔrmilɛrɛ Veuillez suivre l’intérêt ko kisha sekeletɛlɛ ka l’etshumanelo. Dui sɔ diayokimanyiya di’onto ɔsɔ kimanyiyama aha la ntshimbatshimba.—Enda km 5/11 lɛkɛ 3.
[Kiombo ya lo lɛkɛ 6]
Woho wakokaso ntana anto watɛkɛta ɔtɛkɛta aso
• Tombole anto akina, ɛnyɛlɔ ambeki wa Bible, ase nkumbo kana asekaso wa l’olimu.
• Tokambe la dibuku di’ase kɔpanyi ya telefɔnɛ diafundawɔ nkombo y’anto (annuaire téléphonique) dia nyanga nkombo yatanema efula l’ɔtɛkɛta wayangaso anto.
• L’ɔkɔmi tshɛ mbola anto wakamba elimu l’ahole waya anto efula, ɛnyɛlɔ lo biro y’aseka lɛɛta kana la kalasa.
• Tohokamɛke waewoyelo washama lo aradiyo wendana la elimu wayangawɔ anto watɛkɛta ɔtɛkɛta aso.
• Totshu lo waa makashinyi wasondja anto watɛkɛta ɔtɛkɛta aso.
• La lotshungɔ l’akanga wa dihole, sho kokaka nkitsha mɛsamɛsa mɔtshi yele l’ekanda aso la ntondo ka makashinyi, lɛnɛ ɔtɔwɔ kalasa y’adidi kana lo dihole dimɔtshi diele anto watɛkɛta ɔtɛkɛta aso mbɔsaka mituka la wɔ mbala la mbala.
• Sho kokaka nsomba dibuku dimɔtshi kana prɔgramɛ kɛmɔtshi kofundjiwɔ nkombo ndo adrɛsɛ w’anto naka ɛlɛmbɛ wa lo wodja hawoshimbe dikambo sɔ.
[Kiombo ya lo lɛkɛ 7]
Kɛnɛ kakokaso mbuta etena katatayange anto
Naka sho nsawola l’onto la lɔngɛnyi tshɛ, kete nde hatotokanɛ kɔlɔ. Mbala efula mbeyaka monga ohomba mɛnya onto ntondo okanda ɔmɔtshi l’ɔtɛkɛta w’akanga wa mpoke.
L’ɔkɔngɔ wa sho mbisha onto mɔyɔ, sho kokaka mbuta ɔnɛ: “Tekɔ lo tayange anto watɛkɛta ____________ dia sho mbaewoya elongamelo kasha Bible. Onde wɛ mbeyaka onto ɔmɔtshi latɛkɛta ɔtɛkɛta akɔ?”
Etena katatayange akanga wa mpoke, sho kokaka mbuta ɔnɛ: “Akemwe. Onde sho kokaka kɛnya dui dimɔtshi? [Kamba la DVD diodjishayɛ l’ɔrdinatɛrɛ ayɛ wa l’anya dia mbɛnya divɛsa dimɔtshi di’oma lo Traduction du monde nouveau diele l’ɔtɛkɛta w’akanga wa mpoke.] Ɔnɛ ekɔ divɛsa dimɔtshi di’oma lo Bible l’ɔtɛkɛta w’akanga wa mpoke. Lâdiko wa Bible, tekɔ nto la vidɛo mɔtshi yashaso anto aha la mbalɔmba falanga yele l’oyango wa nkotsha ehomba wa lo nyuma w’akanga wa mpoke. Onde wɛ mbeyaka kanga ehoke ɔmɔtshi kana onto lahayoka dimɛna leya ɔtɛkɛta w’akanga wa mpoke?” Naka ompokami aso heye ndoko onto, kete sho kokaka mbosha bɛnyɛlɔ di’ahole wele ondo nde akɛnyi kanga ehoke ɔmɔtshi, ɛnyɛlɔ lo dihole diande di’olimu, la kalasa kana laka osukanyi ande.