Onde Wɛ Kotshaka Olimu Ayɛ Dimɛna Dimɛna?
1 Lo dibuku di’Etsha, sho mbadiaka dia ambeki wa Yeso wakakotsha olimu awɔ lo ‘sambisha dimɛna dimɛna’ awui wendana la Diolelo dia Nzambi. (Etsha 2:40; 8:25; 28:23) Ɔsɔ mbaki mɛtɛ oyango waki ɔpɔstɔlɔ Paulo. (Etsha 20:24) Onde ɔsɔ kema oyango aso oko weso ekambi wa lokumu l’ɔlɔlɔ? Ngande wakokaso kotsha oyango ɔsɔ na?
2 Toyalɔngɔsɔlɛ: Ekɔ ohomba ndjalɔngɔsɔla dimɛna dia sho sambisha dimɛna. Kɛsɔ kekɔ mɛtɛ, djekoleko lam’akahɛso anto periodikɛ, nɛ dia yɔ mongaka l’asawo efula wotshikitanyi. Dia tokimanyiya dimɛna lo dikambo sɔ, wambodja ɔnɔngɔ w’oyoyo l’Olimu Aso wa Diolelo, mbut’ate ɔnɔngɔ wele lo lonya la lɔmɔsɔ, wele la bɛnyɛlɔ dia mbɔtwɛlɔ yendana la numɛlɔ y’eyoyo ya Tshoto y’Etangelo la Réveillez-vous! Ɔtɛ ɔmɔtshi wa sawo wasungana wakotola yambalo y’anto wayodjamaka lo numɛlɔ tshɛ. Ngande wakokaso kamba la mbɔtwɛlɔ nyɛ ya tshena pe na?
3 Sɔna mbɔtwɛlɔ kɛmɔtshi kɛnayɛ wate kayonga dimɛna efula l’ɛtshi kanyu ka nkɛtɛ. Adia dimɛna alako woshawɔ l’ɔnɔngɔ ɔsɔ ndo sɔna awui amɔtshi wa lânde wakoka kotola yambalo y’anto. Sɔna divɛsa dimɔtshi diele lo periodikɛ diɔtɔnɛ la sawo diakɔ ndo diakokɛ tadiɛ ɔtɛkɛtshi ayɛ. Komiya lo tshena pe lo keketsha ompokami ayɛ dia nde mbadia periodikɛ ndo naka kokaka, ewoyande lo tshena pe woho wakokande kimɔ woshasha dia sukɛ olimu w’Ɛmɛnyi wa Jehowa wakambema l’andja w’otondo. Kakianɛ, aya wɛ mvusola mbɔtwɛlɔ kayɛ.
4 Toyalɔngɔsɔlɛ dia Tokamba la Bible: Naka sho ndjalɔngɔsɔla dimɛna, kete mbala efula tayokokaka kamba la divɛsa dimɔtshi lo mbɔtwɛlɔ kaso. Ɛnyɛlɔ, apandjudi efula wa tomanamana tondoyaka dikambo sɔ dimɛna. Ngande wasalawɔ na? Wonya wakomawɔ lo soko di’onto, vɔ mongaka la Bible l’anya, l’ɔkɔngɔ wa memula onto ko vɔ mbuta ɔnɛ:
◼ “Tekɔ lo tambola anto wahomana laso dia kana vɔ mbetawɔka awui anɛ . . . “ Nyadia Etatelu 1:1, oma lâsɔ ko nyu mimbola ɔnɛ: “Onde wɛ mbetawɔka ɛtɛkɛta ɛsɔ?” Naka onto ambetawɔ, ko nyu mbotɛ ɔnɛ: “Ndo sho lawɔ mbetawɔka dikambo sɔ. Koko, onde wɛ fɔnyaka dia naka Nzambi mbakatonge diangɔ tshɛ, kete nde ndamɛ mbele lo kiɔkɔ y’awui wa kɔlɔ?” L’ɔkɔngɔ wa nyu mboka okadimwelo waki onto, nyadia Undaki 7:29. Nyofole dibuku Ewo lo lɛkɛ 71, ndo nyadia odingɔ 2. Nyokeketsha onto woho wa nde tadia dibuku diakɔ. Naka onto hetawɔ ɛtɛkɛta wele l’Etatelu 1:1, kete nyɔlɔmbɛ dia nyu sɛdingola dibuku Création.
5 Toyele Saki Tshɛ Kɛnya Onto: Hatokoke kotsha olimu aso dimɛna naka hatoyedi saki tshɛ kɛnya onto. Naka tambosawola l’onto ɔmɔtshi dimɛna oyadi nde halongodi periodikɛ yaso kana ekanda ekina, funda lokombo ndo adrɛsɛ ande. Tosale tshɛ dia nomialomia saki kɛnyisha onto lo kalola dia towenda nto aha la tshimbatshimba. Lɔmbande dia nyu tatɛ mbeka la nde Bible.
6 Ambeki wa Yeso wa lo ntambe ka ntondo wakeyaka dia Yeso akawadjangɛ dia ‘sambisha dimɛna.’ (Etsha 10:42) Didjango diakɔ sɔ mendanaka la so, nɛ dia ɔsɔ mbele yoho yamɛ yayotokoka mbetɛ anto ambeki. (Mat. 28:19, 20) Nyɛsɔ tosale la wolo aso tshɛ dia kotsha ekambelo kaso dimɛna dimɛna.—2 Tim. 4:5.