Ɛtshɔkɔ Wakondjaso lo Mɛnya Lowando Laso lo Ngandji ka Jehowa—Etenyi 1
1 Ɔpɔstɔlɔ Joani akafunde ate: “Shu tatûlangaka, ne dia ndi [Jehowa] akatulangi ntundu.” (1 Joa. 4:19) Lam’akanyiyaso lo kɛnɛ katosalɛ Jehowa, sho tshutshuyamaka dia mɛnya lowando laso l’efula. Yeso akasha ɛnyɛlɔ lo dikambo sɔ lo sambisha awui wendana la lokombo laki Nzambi ndo la Diolelo diande l’okitanyiya tshɛ. (Joa. 14:31) Ekɔ ohomba sho sɛdingola toho tɔmɔtshi takokaso mɛnya lowando laso lo ngandji ka Jehowa ndo ɛtshɔkɔ waya oma lo dikambo sɔ.
2 Lo Sambisha lo Luudu la Luudu: Yeso aketsha ambeki ande woho wa kamba olimu w’esambishelo ka Diolelo. Alako ande mɛnyaka hwe dia vɔ wakahombe tadianganyaka lokumu l’ɔlɔlɔ lo luudu la luudu. (Luka 9:1-6; 10:1-7) Pombaka mɛtɛ monga la ngandji ka Nzambi ndo ka wonyaso onto dia tetemala la sambisha lo luudu la luudu etena kahomanaso la wendjodi kana la wekamu. Koko shamɛ kondjaka wahɔ lo sambisha lo luudu la luudu, nɛ dia mbetawɔ ndo eshikikelo kaso keketshamaka ndo sho mongaka l’elongamelo k’oshika.
3 Oko wakambaso olimu ɔsɔ l’ɛlɔmbwɛlɔ k’andjelo, sho tanaka anto efula wele la ndjala ndo la mposa k’akambo wa mɛtɛ. (Eny. 14:6) Anto amɔtshi wakawasambisha wakate dia paka l’etena kakawalɔmbaka ekimanyielo mbakakome Ɔmɛnyi wa Jehowa lo mvudu yawɔ. Akadiyɛso ahende l’ɔna dikɛnda ɔmɔtshi wakatasambishaka lo luudu la luudu lo disɛnga dimɔtshi dia Antilles. Wonya wakayangaka akadiyɛso asɔ dia vɔ komiya esambishelo ka wɔ ka lushi lɔsɔ, ɔna dikɛnda laki lawɔ akatshu la ntondo ndamɛ lo luudu lakasukana ko akakɔkɔla. Osekaseka ɔmɔtshi akadihola lokuke. Lam’akɛnyi akadiyɛso dikambo sɔ, vɔ wakatshu otsha le wɔ ndo wakasawola l’osekaseka ɔsɔ. Nde akalɔmbɛ dia vɔ mbɔtɔ lo luudu ndo akawatɛ dia nde aki oma la nɔmba Nzambi dia mbotomɛ Ɛmɛnyi dia ndjolakanya Bible!
4 Lo Sambisha lo Toshinga: Lam’ele l’ahole amɔtshi ekɔ wolo efula dia tana anto lawakawɔ, esambishelo ka lo toshinga ekɔ yoho yoleki dimɛna dia sambisha anto. Ndo nto, anto efula mbidjasɛ lo wa nkombo yadihama wonya tshɛ kana lo mvudu y’etajɛ yalamema le asɔlayi lɛnɛ ahatakoke sambisha lo luudu la luudu. Koko, lowando laso lo ngandji ka Jehowa totshutshuyaka dia nyanga toho tshɛ takokaso sambisha anto losango la Diolelo, mbidja ndo esambishelo ka lo toshinga.—Tuk. 1:20, 21.
5 Lo Sala Waendelo w’Eyoyo: Lam’ele tekɔ lo tayange anto ‘weya ehomba awɔ wa lo nyuma,’ sho nangaka sala tshɛ kakokaso sala dia kotsha ehomba awɔ ɛsɔ. (Mat. 5:3) Kɛsɔ nɔmbaka dia sho kalola totɛ ashi lo tɔngɔ ya lo nyuma yakatonɛ. (1 Kor. 3:6-8) Kadiyɛso kɛmɔtshi ka lo wodja wa Australie akasha womoto ɔmɔtshi laki oko hɛnya nsaki efula traktɛ kɛmɔtshi. Kânga mbakidiɔ ɔsɔku, kadiyɛso akayaka dia ndjenda mama kɛsɔ nto lakande. Lam’akandayotanaka womoto ɔsɔ la ngelo, kadiyɛso akɛnyi dia l’ɔkɔngɔ wa sawo diawɔ dia mbala ka ntondo, womoto akɔ akasombe Bible k’oshinga wolo. Kadiyɛso akatatɛ mbeka la nde Bible!
6 Lo Nɔmbɔla Wekelo wa Bible: Kɛsɔ koka monga dikambo dimɔtshi dialeka tela ɔngɛnɔngɛnɔ ndo ɛlɔlɔ l’olimu aso. Ekɔ mɛtɛ ɔtshɔkɔ dia kimanyiya anto dia mbeka awui wendana la Jehowa, dia mɛna woho watshikitanyawɔ nsɛnɔ yawɔ dia mbɔngɛnyangɛnya, ndo dia mɛna woho wabatizamawɔ dia mɛnya ndjakimɔ kawɔ le Nzambi!—1 Tes. 2:20; 3 Joa. 4.
7 L’etenyi kayaye, tayɔsɛdingola toho tokina tatshɔkɔmaso lo mɛnya lowando laso lo ngandji ka Jehowa.