Esambishelo ka lo luudu la luudu
1. Dimbola diakɔna diambwama lo kɛnɛ kendana la esambishelo ka lo luudu la luudu, ndo lande na?
1 “Wanɛ wambohokɔ akambo lo toho totshikitanyi ta dianganya Akambo wa mɛtɛ wayetawɔ dia esambishelo ka lo luudu la luudu lo ekimanyielo ka L’AURORE DU MILLÉNIUM ekɔ yoho yoleki dimɛna ya sambisha Akambo wa mɛtɛ nshi nyɛ.” Ɛtɛkɛta ɛsɔ wɔsami oma lo numɛlɔ ka Ngɔndɔ k’esambele 1, 1893 ka Le Phare de la Tour de Sion lo Angɛlɛ akatɔtɔmiya ohomba wa sambisha lo luudu la luudu. Anto wa lo andja w’otondo mɛnaka dia ɔsɔ ekɔ tshelo yatshikitanya Ɛmɛnyi wa Jehowa la anto akina. Onde yoho shɔ yeke ohomba, lam’ele tana anto lawakawɔ lo wedja ɛmɔtshi ekɔ lo taleke monga wolo?
2. Kakɔna kɛnya dia olimu w’esambishelo ka lo luudu la luudu tomba oma lo Afundelo?
2 Olimu w’ohomba ndo wotumbi oma l’Afundelo: Afundelo tɛkɛtaka dia esambishelo ka lo luudu la luudu. Yeso aketsha ambeki ande 70 dia vɔ ntshɔ ahende ahende lo mvudu y’anto. (Luka 10:5-7) Yema tshitshɛ l’ɔkɔngɔ wa nyɔi kaki Yeso, Bible mbutaka di’ambeki ande ɔnɛ: “La lushi la lushi lu etemwelo ndu [“lo luudu la luudu, NW], vo kumpeko mbetsha antu la nsambisha [l]ukumu l’[o]lolo.” (Etsha 5:42) Ɔpɔstɔlɔ Paulo aketshaka l’ohetoheto tshɛ lo luudu la luudu.—Etsha 20:20.
3. Naa wahɔ ɛmɔtshi wele la esambishelo ka lo luudu la luudu?
3 Esambishelo ka lo luudu la luudu eke yoho y’ohomba efula ya dianganya lokumu l’ɔlɔlɔ ɛlɔ kɛnɛ. Yɔ tokimanyiyaka dia sho ‘nyanga’ wanɛ wele l’etema w’ɛlɔlɔ lo yoho ya shikaa ndo yokongɛmi. (Mat. 10:11) Anto mongaka suke dia sawola l’anto lawakawɔ. Sawola la wɔ elundji l’elundji, mpokamɛ dui diawɔ, menda ɛnamelo kawɔ ndo kɛnɛ keta l’ahole wodjashiwɔ tokimanyiyaka dia sho shihodia awui wayashawɔ lɔkɔ ndo ekiyanu awɔ. Yoho y’esambishelo shɔ toshaka tena efula diaaso dia sho ndeka sawola l’anto.
4. Ngande wayotoleka kondja etombelo w’ɛlɔlɔ l’esambishelo ka lo luudu la luudu?
4 Onto l’onto asale etshikitanu: Ɔpɔstɔlɔ Paulo aki suke dia sala etshikitanu ɛmɔtshi dia ‘wahɔ wa lokumu l’ɔlɔlɔ.’ (1 Kor. 9:23) Ondo, sho kokaka tshikitanya ekongelo kaso dia sambisha etena kaleka anto monga lawakawɔ, ɛnyɛlɔ oko la dikɔlɔ, lo waa wikɛndɛ kana lo nshi y’afɛstɔ. Nyofunde listɛ la mvudu yele anto kema lawɔ ndo nyohembe kalola wonya okina kana lushi lokina la lo lomingu lɔsɔ.
5. Ngande wakokaso sambisha kâmɛ la wanɛ wele la hemɔ lo luudu la luudu?
5 Oyadi wanɛ wele la hemɔ koka sambisha lo luudu la luudu. Ondo sho kokaka ndjalɔngɔsɔla dia sambishaka la anto asɔ lo mvudu yele suke dia vɔ sambisha aha l’okakatanu. Kadiyɛso kɛmɔ kaki l’okakatanu l’ɔhɛngɛlɔ akakokaka sambisha luudu ɔtɔi lo minitɛ akumi asato tshɛ. Koko, nde aki l’ɔngɛnɔngɛnɔ ndo l’ɔlɔ w’efula l’ɔkɔngɔ wa nde sambisha kâmɛ la olui ɔmɔtshi!
6. Lande na kahombaso mbetɛ esambishelo ka lo luudu la luudu oyango aso woleki woke?
6 Takatetemala tana anto efula wele oko ɛkɔkɔ l’esambishelo ka lo luudu la luudu. Etena kakakɔkɔla ɔnangɛso ɔmɔtshi lo luudu lɔmɔ, nde akoke wawotɛ ɔnɛ: “Ɔtɔ. Dimi keyaka. Dimi ma la nɔmba Nzambi dia nde toma onto ɔmɔtshi dia ndjokimanyiya, ko oma lâsɔ lamboka onto akɔkɔla lo lokuke. Nzambi akoki dɔmbɛlɔ diami mbambondokotoma.” Etombelo wakondjaso mɛnyaka dia Jehowa ekɔ lo tshɔkɔla yoho y’esambishelo shɔ. (Mat. 11:19) Toyashikikɛ dia mbetɛ esambishelo ka lo luudu la luudu oyango aso woleki woke.