Ɛtshɔkɔ Wakondjaso lo Mɛnya Lowando Laso lo Ngandji ka Jehowa—Etenyi 2
1 L’etenyi ka sawo nɛ kakatasɛdingola ngɔndɔ ketshi, takɛnyi weho ɛnɛi wakokaso mɛnya lowando laso lo ngandji ka Jehowa l’olimu w’esambishelo. (1 Joa. 4:9-11) L’etenyi kɛnɛ tayɛna toho tokina totanu ta sala dikambo sɔ. Naka sho ndjasha tshɛ dia kimanyiya anto akina lo nyuma, kete tayɔtshɔkwama.
2 Esambishelo ka lo Tshakitudi: Ɔnɛ ekɔ yoho ya dimɛna efula ya tana anto wele la ndjala ndo la mposa ka losembwe ndo ya mbakahɛ ekanda wayokoka mbakimanyiya. Sunganaka mɛtɛ dia sho ‘ndjatshungwɛ etena k’ɔlɔlɔ’ ndo sambisha lo waaso tshɛ ndo onto tshɛ lahomana laso. (Ef. 5:16) Ondo dia sambisha lo yoho shɔ sho pombaka monga la dihonga, koko naka sho shihodiaka ngandji ka Nzambi ndo ehomba wele l’anto, kete tayosambishaka lo diaaso tshɛ.—2 Tim. 1:7, 8.
3 Misiɔnɛrɛ ɔmɔtshi akakondja etombelo w’amɛna lo tatɛ sawola l’onto ɔmɔtshi lakadjasɛ suke la nde lo mutuka. Pami kɛsɔ akɛnya mposa kande k’akambo wa mɛtɛ. Misiɔnɛrɛ ɔsɔ akakalola towenda nto lakande ko vɔ wakatatɛ mbeka Bible. Pami kɛsɔ akakome Ɔmɛnyi wa Jehowa ndo akahame polo ndo nde koma ekumanyi l’etshumanelo!
4 Lo Fundɛka Anto Mikanda: Mbeyaka monga ko sho bu l’akoka wa sambisha lo luudu la luudu l’ɔtɛ wa pâ mɔtshi yele laso lo demba kana l’ɔtɛ wa mvula ngembe. Sho koka funda mikanda dia sambisha anto weyaso lo tshena pe, ɛnyɛlɔ anto weyaso wambovusha lakiwɔ ɔmɔtshi la ngandji, kana anto wakiso kotana la ngelo l’ɛtshi kaso ka nkɛtɛ. Sho koka mbidja traktɛ kɛmɔtshi kakotola yambalo lo losango la lo Bible lo divɔlɔpɛ ndo keketsha onto lafundɛso dia nde tofundɛ naka nde ayonga la wembola. Kamba l’adrɛsɛ ayɛ hita kana wa Mbalasa kanyu ka Diolelo; koko lam’alangɛ tokambake l’adrɛsɛ wa Bɛtɛlɛ.
5 Esambishelo ka lo Telefɔnɛ: Ɔnɛ ekɔ yoho ya dimɛna ya sambisha anto wahatakoke pomana la wɔ l’esambishelo ka luudu la luudu. Naka sho sala dikambo sɔ la yewo, la ngandji ndo la mayɛlɛ, kete sho koka kondja etombelo w’amɛna efula. Olimu Aso wa Diolelo wa Ngɔndɔ ka Hende 2001 lɛkɛ 5-6, wekɔ l’alako w’eshika wɛnya woho wakokaso kondja etombelo woleki amɛna.
6 Lam’akasambishaka kadiyɛso kɛmɔtshi lo telefɔnɛ, nde akambola womoto ɔmɔtshi lakasawolaka la nde dia kana nde kanyiyaka efula dikambo dia nshi yande yayaye ndo ya nkumbo kande. Womoto ɔsɔ akawotɛ ate ngasɔ mbediɔ. Nde akasholɛ kadiyɛso ate l’ɔtɛ wende ndoko l’elongamelo mboyadjasɛnde ndamɛ lo luudu. Lo mboka woho wakayakiyanya kadiyɛso l’otema ɔtɔi lo dikambo diande, womoto ɔsɔ aketawɔ dia pomana la kadiyɛso kɛsɔ lo lobingu laki suke lawɔ. Dui sɔ diakayokonyaka womoto ɔsɔ dia mbetawɔ mbeka Bible!
7 Lo Nongolaka Eyoyo: Naka sho nangaka anyaso anto, kete tayendaka dimɛna oyoyo tshɛ waya lo nsanganya yaso ndo mbolongola dimɛna. (Romo 15:7) Nde ɛnyi dia nde ekɔ l’atei w’anto wayakiyanya l’otema ɔtɔi dikambo di’ɔlɔlɔ ande wa lo nyuma. Woho wayakiyanyaso la ngandji dikambo diande ndo wɔlɔmbaso dia sho mbeka la nde Bible mbeyaka mbotshutshuya dia mbetawɔ ekimanyielo kaso.
8 Oma lo Lɔkɛwɔ Laso l’Ɔlɔlɔ: Oma lo lɔkɛwɔ laso la dimɛna, sho mbishaka akambo wa mɛtɛ wotsho. (Tito 2:10) Lam’atɛkɛta anto wa l’andja ɔnɛ akambo w’ɔlɔlɔ lo dikambo diaso oko weso Ɛmɛnyi wa Jehowa, vɔ tombolaka Nzambi kaso. (1 Pet. 2:12) Kɛsɔ nto koka kimanyiya anto akina dia vɔ tatɛ mbɔtɔ lo mboka ka lɔsɛnɔ.
9 Lande na kahatavusola toho tɔnɛ totanu dia mɛnya lowando laso lo ngandji k’efula katoka Jehowa ndo kamba la tɔ na? (1 Joa. 4:16) Wɛ ayokondja ɛtshɔkɔ efula naka wɛ sala dikambo sɔ.