Manyamanya Ɔtɛkɛta wa Nzambi Dimɛna
1 Lam’akandasambishaka owandji ɔmɔtshi w’alembe, “Filipo akafula unyo, akatatela uma l’afundelu kako, akûsambisha lukumu l’ololo la Jesu.” (Etsha 8:35) Filipɔ ‘akamanyamanyaka ɔtɛkɛta w’akambo wa mɛtɛ dimɛna.’ (2 Tim. 2:15) Koko, nshi nyɛ, emendji weteta wambɛna di’apandjudi efula hawoleke kamba la Bible wonya watawasambisha. Onde wɛ kambaka la Bible l’olimu ayɛ w’esambishelo?
2 Ɔtɛkɛta wa Nzambi mbele kiɔkɔ y’akambo tshɛ wetawɔso ndo wetshaso. (2 Tim. 3:16, 17) Vɔ mbakotola anto oya le Jehowa ndo mbawaetsha awui wayowasha lɔsɛnɔ. Diakɔ mbele ekɔ ohomba sho kambaka la Bible l’olimu aso w’esambishelo lo dihole dia tɛkɛtaka tsho l’anto asawo wɛnaso ɔlɔlɔ. (Heb. 4:12) Lam’ele anto efula haweye Bible dimɛna, sho pombaka mbadiaka awui w’oma lɔkɔ dia mbaɛnya ɛlɔmbwɛlɔ ka shikaa kashatɔ ndo kɛnɛ kombɛtɔ anto lo nshi yayaye.
3 Adia Mbala Kakɔ Ɔtɔi oma lo Bible: Wɛ mbeyaka pemba ntshɔ dia tosambisha aha la tomba la tapa l’anya. Wɛ koka mbidja periodikɛ yayoyolanga mbisha anto lo fardɛ kɛmɔtshi ka tshitshɛ ndo kimɛ Bible l’anya kana kidja lo dibenga. Lâsɔ, wonya wasawolayɛ l’onto ɔmɔtshi, wɛ koka tondja Bible aha la mbɛnya di’oko wɛ ekɔ lo nanga mbisha sawo dimɔtshi di’otale. Djasɛ kana emala lo yoho yayokoka ompokami ayɛ mbeya tayelaka wadielo lo Bible kayɛ wonya watayadia. Ondo wɛ mbeyaka mbɔlɔmba dia nde mbadia divɛsa dimɔtshi la dui dia wolo. Nde ayotshikala la diambo di’efula naka nde ayokoka mɛna kɛnɛ kata Bible oleki nde kioka tsho oma l’onyɔ ayɛ. Lo mɛtɛ, dia mbokimanyiya dia nde mboka kɛnɛ kata divɛsa sɔ, ka epole ɔsɛkɛ lo tɔtɛkɛta tahunula lokanyi.
4 Mbɔtwɛlɔ ka l’Ekimanyielo k’Afundelo: L’ɔkɔngɔ wa wɛ ndjalowola le onto, wɛ kokaka mbuta wate: “Anto nyangaka alako lo tɔkɔkɔ totshikitanyi dia nɔmbɔla nsɛnɔ yawɔ. Oko le yɛ kiɔkɔ yakɔna yoleki dimɛna yakoka mbisha ɛlɔmbwɛlɔ k’ɔlɔlɔ? [Tshikande akadimole.] Ko akanyiyayɛ dikambo di’ɛtɛkɛta ɛnɛ? [Adia Tukedi 2:6, 7, ndo tshikande akadimole.] Ko wɛ kotsha wate: mɛnamaka dia lomba l’anto lekɔ anyanya, ndo shishɛka anto efula elongamelo. Kele, lomba laki Nzambi lokongaka nshi tshɛ ɔlɔlɔ ndo la wahɔ.” Oma lâsɔ, ɛnyande okanda wakatumbi layɛ, ndo shande ɛnyɛlɔ kɛmɔtshi oma lɔkɔ kashikikɛ ɔnɛ lomba laki Nzambi lekɔ ohomba.
5 Yeso akakambe l’Afundelo dia kimanyiya anto waki l’etema w’ɔlɔlɔ. (Luka 24:32) Paulo akamanya anto akambo wakandawaetshaka fundo l’ekimanyielo k’Afundelo. (Etsha 17:2, 3) Eshikikelo ndo ɔngɛnɔngɛnɔ wele laso l’olimu w’esambishelo ayohama lam’ayototalekaka mbeya manyamanya Ɔtɛkɛta wa Nzambi dimɛna.