Ɛngɛnɔngɛnɔ w’Olimu wa lo Tena Tshɛ
1 Oko weyɛ ɔlɔngɔlɔngɔ kana osekaseka, aha la tâmu wɛ kanyiyaka dia kɛnɛ kayoyosala lo nshi yayaye. Tukedi 21:5 totɛka dia “tukanyi ta kanga kolamelu, tatûkundjiyaka diango efula.” Naka wɛ kanyiya dimɛna dia eyango wa lɔsɛnɔ layɛ kete wɛ ayokondja wahɔ efula. Lam’asalayɛ dikongelo diendana la kɛnɛ kayoyosala lo nshi yayaye dja yimba l’olimu wa lo tena tshɛ. Lande na?
2 Sawola l’epalanga ɛmɔtshi wakakambe olimu w’ombatshi mboka lo nshi yakiwɔ akɛnda, dia mbeya ngande wayaokawɔ, wɛ ayokondja okadimwelo akɔ wamɛ ɔnɛ: “Ɛnɔnyi ɛsɔ waki ɛnɔnyi wakaleke tshɛ amɛna lo lɔsɛnɔ lami!” Ɔnangɛso ɔmɔtshi lakatatɛ olimu wa lo tena tshɛ oma ko dikɛnda akayota l’ɔkɔngɔ ate: “Ekɔ mɛtɛ dikambo di’ɔngɛnɔngɛnɔ efula di’onto mboka sso l’ɔkɔngɔ lo nshi yande y’ɔlɔngɔlɔngɔ ko monga l’akoka wa mbita ɔnɛ lakayele dako dia lomba diata ɔnɛ: ‘Ohɔ Otongi ayɛ wa woke lo nshi yayɛ y’ɔlɔngɔlɔngɔ.’ ” (Und. 12:1) Pombaka ndjalɔngɔsɔla dimɛna wɛ l’ambutshi ayɛ tatɛ oma ko kakiye, dia nyu kamba kamɛ woho wa wɛ lawɔ monga la woho w’ɔngɛnɔngɛnɔ ɔsɔ lo nshi yayɛ y’ɔlɔngɔlɔngɔ kana y’osekaseka.
3 Ambutshi, Nyâkeketsha l’Olimu wa lo Tena Tshɛ: Oko ombutshi wa Pami wele la ngandji, Jehowa nyɛ̂nyaka dimɛna woho wahombanyu sala dikambo sɔ. (Is. 30:21) Oko wenyu ambutshi w’Akristo, ɛlɔmbwɛlɔ kakinde ka la ngandji ɛkɔ ɛnyɛlɔ ka nyu ndjela. Lo dihole dia nyu tshikɛ ananyu dihole dia vamɛ sɔna mboka kele ɔlɔlɔ lewɔ, la lomba tshɛ, nyowaetsha mboka kahombawɔ ndjela woho wa vɔ tshɔkwama oma le Jehowa. Ɔnkɔnɛ, lam’ayowôla, wetshelo wakanyawasha ayowakimanyiya dia vɔ “ntshikitanya ololo la kolo.” (Heb. 5:14) Epalanga mbeyaka oma l’akambo wakâkomɛ dia kema dimɛna ndjaɛkɛ lo tokanyi tawɔ hita; vɔ pombaka ndjaɛkɛ le Jehowa dia nde mbasembolɛ mboka yawɔ. (Tuk. 3:5, 6) Dikambo sɔ diekɔ ohomba efula le akɛnda nɛ dia vɔ watashihodia akambo wa lo lɔsɛnɔ dimɛna.
4 Ambutshi le, lam’ayasukana ananyu l’ɛnɔnyi dikumi, kana la ntondo ka lâsɔ, nyosawole la wɔ yoho y’ɔlɔlɔ dikambo di’eyango awɔ wa lo lɔsɛnɔ. Wanɛ washana alako, embetsha, ndo asekawɔ wa la kalasa wayohemba mbatshutshuya dia vɔ sɔna woho wa kondja lomombo la l’emunyi la l’andja ɔnɛ. Nyokimanyiya ananyu dia vɔ sɔna kalasa yayowasha wetshelo wa dimɛna, yayowakimanyiya dia vɔ ndjakotshɛ ehomba awɔ wa l’emunyi aha la mbohɛ wahɔ wa Diolelo. (1 Tim. 6:6-11) Mbala efula, kalasa ka sekɔndɛrɛ, kamɛ la, kana mbeka olimu ɔmɔtshi w’anya mbeyaka monga kɛnɛ kele ohomba di’onto ndjakotshɛ ehomba wa lo lɔsɛnɔ lam’atatɛnde olimu w’ombatshi mboka.
5 Nyokeketsha akɛnda dia vɔ nyanga losha la monga onyemba. Naka l’ɔkɔngɔ diko vɔ wamboyɔsa yɛdikɔ ya tshuka kana tshukama, kete vɔ wayonga l’akoka wa mɛmba ɛkɛndɛ wa weke wendana la diwala. (Enda l’odingɔ 19 wa dikatshi di’okotsha di’Olimu Aso wa Diolelo wa Ngɔndɔ ka Samalo 2001, l’ɔtɛ a dui wata ɔnɛ: “Onde Wɛ Koka Mbetawɔ?”) Lo sawola la wɔ dimɛna dikambo di’olimu w’ombatshi mboka, dia tokamba lɛnɛ ele ohomba w’apandjudi efula kana tokamba lo Bɛtɛlɛ, ndo kamba olimu wa misiɔnɛrɛ, nyokeketsha ananyu kânga wanɛ weke akɛnda dia vɔ monga la nsaki ka kamba la nsɛnɔ yawɔ lo yoho ya ngɛnyangɛnya Jehowa, dia wahɔ w’anto akina, ndo yayowaela vamɛ ɔngɛnɔngɛnɔ.
6 Ɛlɔngɔlɔngɔ kana Esekaseka, Nyetsha Olimu wa lo Tena Tshɛ Ntondo: Akɛnda le, nyu hanyohombe ndjâkiyanya dia mbeya ngande wele olimu w’ombatshi mboka. Nyu mbeyaka pemba olimu akɔ lo tshanda mɔtshi lo kamba oko ombatshi mboka wa tshanda naka kokaka lo nshi yɔtɔnyu kalasa kana lo nshi ya vakashi. Ngasɔ mbayonyeya mɛtɛ nyate olimu ɔsɔ wekɔ olimu wa dimɛna efula! Onde nyu koka ndjalɔngɔsɔla la ntondo dia kamba oko ombatshi mboka wa tshanda lo ngɔndɔ kɛmɔtshi tatɛ nshi nyɛ polo lo komelo ka Ngɔndɔ k’Enanɛi?
7 Naka wɛ ekɔ dikɛnda dia pami l’ɔlɔngɔswamelo waki Nzambi, wɛ koka nto mbidja yimba dimɛna dia kotsha kɛnɛ kalɔmbama dia koma okambi w’olimu. (1 Tim. 3:8-10, 12) Ndo nto, enda dia kana wɛ koka tokamba lo Bɛtɛlɛ kana mbɔtɔ lo Kalasa k’Olowanyelo w’Ekambi etena kayoyokotsha ɛnɔnyi wahombama. Olimu ayɛ w’ombatshi mboka wayokosha wetshelo w’amɛna, ɛnyɛlɔ, woho wakokayɛ nsɛna lo ndjelaka ekongelo kɛmɔtshi ka salaka akambo, woho wakokayɛ mbeya kongɛka akambo ayɛ, woho wakokayɛ sɛna kamɛ l’anto akina ndo woho wakokayɛ monga l’akoka wa mɛmba ɔkɛndɛ. Akambo asɔ tshɛ wayokɔlɔngɔsɔla dia wɛ ndjeya mɛmba waɛsɛ wa weke w’olimu.
8 Kɛnɛ koleki tshɛ ohomba dia tondoya olimu wa lo tena tshɛ ele monga la yimba y’etete l’olimu waki Nzambi. Ɔpɔstɔlɔ Paulo akakeketsha yimba shɔ ndo akɛnya ɛtshɔkɔ wakoka onto kondja: “Akambu tshe watshanyu, nyâtshi l’utema otoi, uku le [Jehowa], aha le antu. Nyeyi nyati: Nyu nyayulungula difutu dia sangu uma le [Jehowa].” (Kol. 3:23, 24) Jehowa anyɔtshɔkɔlɛ lo nyosha ɔngɛnɔngɛnɔ efula l’olimu wa lo tena tshɛ!