Tonge la Shunganyi l’Ɔlɔtɔ ndo lo Yoho Yalɔngɔsɔlaso Demba
1 “Apami tshɛ, kânga ana w’akɛnda ndɔta kravatɛ. Wamato tshɛ, epalanga, esekaseka ndo ana w’akɛnda ndɔta tojipɛ, ekutu kana alɔtshi. Ndoko lɔlɔtshi djini kana dihɔndɔ diasanga demba. Onto tshɛ lele lanɛ ekɔ l’ɔngɛnɔngɛnɔ.” Ɔsɔ ekɔ ɛtɛkɛta wakafundama lo jurunalɛ mɔtshi. Jurunalɛ shɔ yaki lo tɛkɛta dikambo dia lemba lakɔna l’anto na? Onde dia losanganya lɔmɔtshi l’ase pɔlitikɛ? Onde di’anto wakaye lo kɛnyɔ mɔtshi? Onde di’anto wakaye dia ndjenda mishiki? Ndooko! Yɔ yaki lo tɛkɛta dikambo di’olui w’anangɛsɔ l’akadiyɛso wakasangana lo losanganya la distrikɛ ɔnɔnyi wetshi.
2 Lo kɛnɛ kendana la losanganya lakasalema l’osomba okina, jurunalistɛ mɔtshi akatɛkɛta dikambo di’olui w’Ɛmɛnyi wa Jehowa ate: “Apami tshɛ wekɔ pudipudi ndo vɔ ndɔta akɔti ndo kravatɛ. Wamato ndɔta la shunganyi ndo yoho ya dimɛna efula.” Onami ɔmɔtshi wakendaka woho waketaka losanganya akate ate: “Nyu nyekɔ la lɔkɛwɔ la dimɛna, la loshilambo, pudipudi ndo shunganyi. Kɛnɛ kɛnami la washo ami ndjaka mɛtɛ nd’ɔlɔ menda. L’andja wa mindo ɔnɛ, nyu ato mbakoka mbidja pudipudi!” Ɔsɔ mɛtɛ ekɔ ɛtɛkɛta w’amɛna watɛkɛtama lo dikambo diaso! Onde wɛ ngɛnangɛnaka lam’atɛkɛta anto dimɛna dikambo dia nkumbo kaso k’anto l’ɔnango? Eelo, Ɛmɛnyi wa Jehowa tshɛ kimanyiyaka dia anto tɛkɛta dimɛna lo dikambo diawɔ oma l’ɛnamelo ka dimɛna konga lawɔ.
3 Sho mbeyamaka l’andja w’otondo lo woho wayatshikitanyaso l’anto akina oma l’ɛnamelo kaso. (Mal. 3:18) Lande na? Nɛ dia sho ndjelaka dako dia l’Afundelo diatɔlɔmba dia ‘sho ndɔta dimɛna, la shunganyi ndo yimba y’ɔlɔlɔ, . . . lo yoho yasungana l’anto wata dia vɔ mbokaka Nzambi wɔma.’—1 Tim. 2:9, 10.
4 Kakɔna Kɛnya Yoho Yaso ya Ndɔta ndo ya Nɔngɔsɔla Demba? Ahɔndɔ walɔtaso ndo woho wâlɔtaso mɛnyaka woho w’onto weso, mbut’ate tokanyi taso, dionga diaso ndo eyango aso. Woho w’ɔlɔtɔ wasɔnaso mɛnyaka eso ndo atatayele. Sho hatohombe pondjo keketsha kanyi kana lɔkɛwɔ la kɔlɔ lamboleka mbekɔnɛ l’andja ɔnɛ. Sho pombaka ndjakiyanya aha dia ndɔta lo yoho ya kawotake, koko lo yoho yasungana le onto layata ate okambi waki Nzambi mbende. (Romo 12:2) Lo dihole dia sho ndjalɔtsha kana nɔngɔsɔla demba lo yoho yɛnya yimba y’ɔtɔmbɔkwɛlɔ kana yɛnya yoho ya lɔsɛnɔ ya mindo, sho pombaka mɛnya dia sho ‘tombolaka Nzambi’ mɛtɛ.—1 Pet. 2:12.
5 Tena dimɔtshi, onto leke oyoyo, lahatahokɔ akambo dimɛna, kana onto lele wɔdu lo nyuma mbeyaka ndjetawɔ kɛnɛ ketawɔ as’andja ɔnɛ lo kɛnɛ kendana l’ɔlɔtɔ kana la yoho ya nɔngɔsɔla demba, aha la nde kanyiya ntondo etombelo wakoka monga la dikambo sɔ lo lokombo la Jehowa ndo l’ɔlɔngɔswamelo ande. Sho tshɛ pombaka ndjasɛdingola dimɛna dia menda kana yimba ya l’andja ɔnɛ yaya la shɛngiya lo woho walɔtaso kana walɔngɔsɔlaso demba. Sho mbeyaka nɔmba ɔnangɛso kana kadiyɛso kɛmɔtshi kambotshunda lo nyuma dia nde menda l’otema ɔtɔi woho walɔtaso kana walɔngɔsɔlaso demba, oma lâsɔ ko sho ndjela dimɛna alako wayondotosha.
6 Amɔtshi mbetawɔka la lolango lawɔ dia vɔ pombaka menda dimɛna ɔlɔtɔ awɔ lam’ɔtɔwɔ lo losanganya la woke. Koko vɔ hawoleke mbidja yimba lo dikambo sɔ lo wenya wa l’ɔkɔngɔ wa losanganya. Sho pombaka ndjela atɔndɔ wa lâdiko wasungana le ekambi w’Akristo. (2 Kor. 6:3, 4) L’ahole tshɛ wakokaso mɛnana l’anangɛso, totshapa taso ta losanganya kamɛ la yoho yɔlɔtshiso ndo yɔlɔngɔsɔdiso demba dimɛna mɛnyaka dia sho tekɔ Ɛmɛnyi wa Jehowa. Lâsɔ, nshi tshɛ sho pombaka ndɔtaka dimɛna ndo la kɔmba, dia mɛnya dia sho ‘kema wa la nkɛtɛ.’—Joa. 15:19.
7 Nyɛsɔ tosale tshɛ kakokaso sala dia mɛnya lo Losanganya la Distrikɛ l’ɔnɔnyi ɔnɛ lele l’ɔtɛ a dui ɔnɛ “Apandjudi wa Diolelo Wele l’Ohetoheto” dia sho tekɔ ‘wodja w’ekila waki Jehowa Nzambi kaso.’ Akambo w’amɛna wayɛna anto ayokotsha ‘diando, lokumu, ndu nɛmɔ’ lo lokombo laki Jehowa.—Euh. 26:19.
[Kiombo ya lo lɛkɛ 6]
Woho wa Tombola Jehowa:
■ Ndɔta lo yoho yasungana l’okambi waki Nzambi.
■ Mbewɔ ɛlɔtɔ wɛnya yimba y’andja ɔnɛ.
■ Monga la shunganyi yɛnya dia tekɔ l’ekanelo k’ɔlɔlɔ ka yimba.