Totshumanya Anto w’oma l’Ɛtɛkɛta Tshɛ

¹ Ɔtɛkɛta wa Nzambi wekɔ lo kotshama! Anto ‘w’oma lo wedja ndo ɛtɛkɛta tshɛ’ wekɔ lo mbɔtɔ l’ɔtɛmwɛlɔ wa mɛtɛ. (Zek. 8:23) Woho akɔna wakimanyiya Ɛmɛnyi wa Jehowa anto w’oma lo ‘waoho tshɛ, ndo w’ɛtɛkɛta tshɛ’ dia vɔ tanema pudipudi la ntondo ka Jehowa, l’elongamelo ka vɔ ndjokokamɛ lo “[fɔnu] ka wuki” na?​—⁠Eny. 7:​9, 14.

² Ɔlɔngɔswamelo Waki Nzambi Wambɔsa Tɛdikɔ: Olui-Walɔmbɔla akalɔngɔsɔla di’ekanda walembetshiya awui wa lo Bible tanema l’ɛtɛkɛta oko 380 woho w’anto wa lo nkɛtɛ k’otondo shihodia ohomba wa lokumu l’ɔlɔlɔ. Ɔlɔngɔswɛlɔ ndo otondjelo w’ekanda l’ɛtɛkɛta efula ngasɔ ekɔ mɛtɛ olimu wa wolo. Dikambo sɔ nɔmbaka dia monga l’elui w’akadimudi wele l’akoka ndo mbasha ekimanyielo kewɔ latɔ ohomba dia kadimola ekanda aso l’ɛtɛkɛta ɛsɔ tshɛ, tondja ekanda akɔ ndo mbekahanya. Koko, olimu wa woke efula wekɔ lo kambema oma le apandjudi wa Diolelo, wɛmbɛ anto losango l’eko lele lo Bible.

³ Tetawɔ Ɔkɛndɛ Ɔsɔ wa Wolo: Ɛlɔ kɛnɛ anto watɛkɛta ɛtɛkɛta ekina wotanema l’ahole efula. Dia mbasambisha lokumu l’ɔlɔlɔ, ekambi waki Nzambi efula wamboyasha dia mbeka ɔtɛkɛta wa chinois, wa russe, w’espagnol, kana ɛtɛkɛta ekina watɛkɛta anto wele l’ɛtshi ka nkɛtɛ kasambishawɔ. Akina wekɔ lo mbeka Ɔtɛkɛta w’Akanga wa Mpoke w’ase Amerikɛ. Lo Congo yakɔ hiende, tekɔ oko la yɛdikɔ ya tshumanelo 2489 ndo tolui 63 wasambisha ndo wakamba l’ekanda l’ɛtɛkɛta 17 lâdiko wa Falase. Anto wahatokaka watɛkɛta dikambo dia Jehowa kânga lushi ndo waheye ndoko dikambo lo kɛnɛ kendana la Bible wekɔ lo mbetawɔ akambo wa mɛtɛ wa l’Ɔtɛkɛta wa Nzambi.​—⁠Romo 15:⁠21.

⁴ Onde sho kokaka ndjasha efula dia mbewoya lokumu l’ɔlɔlɔ le anto wa lo mbilo kaso woye oma l’ahole akina kana oma lo wedja ekina? (Kol. 1:25) Tshumanelo efula ndjalɔngɔsɔlaka dia tosambisha l’ahole wodjashi anto watɛkɛta ɔtɛkɛta okina. Apandjudi mbekaka ntondotondo tokambokambo tɔmɔtshi tendana l’ɔtɛkɛta akɔ dia vɔ mbeya sambisha lo yoho ya wɔdu, lo mbuta ɛnyɛlɔ oko: “Nyakemwe kana mɔyɔ anyu. Tekɔ la losango l’ɔlɔlɔ la nyewoya. [Oma lâsɔ ko vɔ mbasha traktɛ kana biukubuku yatanema l’ɔtɛkɛta akɔ ko mbatɛ ɔnɛ.] Nyotshikale la wolo.” Jehowa mɛtɛ tshɔkɔlaka weho w’asawo wa tomondo wa ngasɔ!

⁵ Losango la Diolelo kotolaka anto w’oma l’ahole tshɛ ndo watɛkɛta weho w’ɛtɛkɛta tshɛ. Toyatshungole diaaso dia mbasambisha losango lakɔ.