Ekongelo ka Losanganya l’Otshimbedi Layaye
1 Dia tshikala nge lo mbetawɔ l’andja ɔnɛ watengengɔ akambo, sho pombaka ndjaɛkɛ le Jehowa. Woho akɔna wokokiso mɛnya wɛkamu ɔsɔ lo lɔsɛnɔ laso la lushi la lushi? Wɛkamu aso le Jehowa wekɔ la shɛngiya yakɔna lo lɔsɛnɔ laso ndo la nkumbo kaso? Ngande watokimanyiyawɔ dia shika tanga lo tɔsɛngiya ta l’andja waki Satana ɔnɛ? Ekongelo ka losanganya l’otshimbedi la l’ɔnɔnyi w’olimu 2003 kadimolaka lo wembola ɛsɔ. Lɔ lekɔ l’ɔtɛ a dui ɔnɛ: ‘Tɛkamake Jehowa ndo Totshake Ɔlɔlɔ.’—Osam. 37:3.
2 Aha paka lo waaso amɔtshi wa lânde kana lo tena dieso lo dihombo di’efula to mbahombaso mɛnya wɛkamu aso le Jehowa. Sho pombaka monga la wɛkamu ɔsɔ l’akambo tshɛ wa lo lɔsɛnɔ laso la lushi la lushi. Dikambo sɔ mbayolembetshiyama lo sawo dia mbɔtwɛlɔ diele l’ɔtɛ a dui ɔnɛ: ‘Tɛkamake Jehowa Tena Tshɛ.’ (Osam. 62:8) Sawo dia tenyi nɛi diele l’ɔtɛ a dui ɔnɛ: “Tokitsha Wɛkamu Aso le Jehowa” diayotɛnya woho wa tana ndo wa kamba l’awui wa lo Bible wakoka tokimanyiya dia monga la diwala di’ɔlɔlɔ, dia kandola ekakatanu watomba lo nkumbo, ndo dia kotsha ehomba aso wa l’emunyi.
3 Andja waki Satana ɔnɛ wekɔ lo pemba dia mbɔtshiya kanyi ya kɔlɔ lo yimba yaso lo kɛnɛ kendana la woho wa mbeya tshikitanya ɔlɔlɔ la kɔlɔ ndo akambo w’ohomba la wele kema ohomba. (Is. 5:20) Sawo diele l’ɔtɛ a dui ɔnɛ: “Toyalame oma l’Akambo w’Anyanya wa lo Lɔsɛnɔ” ndo diata ɔnɛ: “Tewɔ Akambo wa Kɔlɔ ndo Tônge Atshi w’Akambo w’Ɔlɔlɔ” wayoleka keketsha yɛdikɔ yaso ya kitanyiya ɛlɛmbɛ waki Jehowa wa lâdiko.—Am. 5:14.
4 Lam’ayokomiya Jehowa dikongɛ nɛ di’akambo dia kɔlɔ, ekambi ande wayohomba ndjaɛkɛ tshɛ le nde. Kɛsɔ mbayolembetshiyama lo sawo dia lo sɛkɛ diele l’ɔtɛ a dui ɔnɛ: “Kem’edja Tayanga Tshungɔ oma l’Asui wa l’Andja Ɔnɛ.” L’ɔkɔngɔ wa sawo sɔ, wayotɔlɔmba dia shamɛ ndjasɛdingola lo ndjela sawo diata ɔnɛ: “Onde Wɛ Ayadiema l’Ɔnɔngɔ wa Wanɛ Wayokita Diolelo Diaki Nzambi?” Losanganya layokomɛ la dako diatɔlɔmba ɔnɛ: “Toyaɛkɛ l’Alaka Waki Jehowa.”
5 Dikambo dimɔtshi di’ohomba dia lo losanganya tshɛ ele batismu. Onto tshɛ lalanga batizama pombaka mbewoya omendji walɔmbɔla aha la tshimbatshimba woho wa tɛdikɔ tɔmɔtshi t’ohomba mbɔsama.
6 Lo tena nɛ diengengɔ awui, paka Jehowa oto mbele kiɔkɔ ya shikaa ya wɛkamu ndo ndamɛ oto mbele onto lahengengɔ l’akambo. (Osam. 118:8, 9) Nyɛsɔ sho tshɛ tokeketsha wɛkamu aso le nde lo mbɔtɔ lo tenyi tshɛ dia losanganya l’otshimbedi.