Ekongelo Ka Losanganya L’otshimbedi Layaye
1 Tatɛ oma lo Lovula, ɔtɛ a dui wa nsanganya y’otshimbedi ayonga ɔnɛ “Tolonge ndo Têke dia Kotsha Dui dia Nzambi.” Ɔtɛ a dui ɔsɔ woye oma lo Euhwelu k’Elembe 31:12, 13 sunganaka dimɛna efula l’ekongelo, kɛnya nɛmɔ dia wetshelo wahombaso mbeka ndo kotsha.
2 Oyadi kânga anto efula mpokamɛka ɛtɛkɛta wa lokeso w’ɛdiɛngɛ ɛlɔ kɛnɛ, ekɔ ohomba efula dia onto l’onto l’atei aso nonga Dui dia Nzambi ndo mbeka dia dikotsha. (Luka 11:28; 1 Tim. 4:1) L’oyango ɔsɔ mbakalɔngɔsɔma awui wa lo losanganya l’otshimbedi woho wa keketsha ndo kimanyiya apandjudi, nkumbo, dikumanyi ndo ambatshi mboka. Lushi la Samalo wayosha dako dia tenyi tenyi diayonga la tenyi nɛi ndo l’ɔtɛ a dui wata ɔnɛ “Tɔlɛmbia Ekakatanu Aso lo Mpokamɛka Dui dia Nzambi.” Ndo Lushi la Lomingu la pindju, dako dikina diele l’ɔtɛ a dui wata ɔnɛ “Afundelo Mpokolaka lo Losembwe.” Ekongelo k’otondo ayonga l’ekeketshelo wa lo nyuma wahanyakoke pandja wɛ la nkumbo kayɛ.
3 Lushi la Samalo ndo la Lomingu, wayosha alako w’eshika w’endana l’esambishelo kâmɛ ndo diɛnyɛlɔ. Nyayotoka ndo ɛkɔnya la akambo wakasalema washa ekeketshelo ndo wetshelo. Ɔnkɔnɛ, naka nyayonga lawɔ ndo nyayolonga l’oyango wa kotsha kɛnɛ kayonyeka, kete nyayonga l’akoka wa kitanyiya ɛlɛmbɛ wa Dui dia Nzambi.
4 Batismu ka wanɛ weke ka ndjakimɔ le Nzambi ayonga etena k’ohomba efula ka losanganya l’otshimbedi. La ntondo ka wotelo wa lo sɛkɛ wa ndjakimɔ ka la tshondo, wanɛ walanga batizama wayohomba mbutɛ omendji-walɔmbɔla saki kawɔ ka batizama, woho wa nde mbɔsa tɛdikɔ dia dikumanyi sawola la wɔ.
5 Dako dia lo sɛkɛ diayoshama lo nsanganya shɔ diayonga l’ɔtɛ a dui wata ɔnɛ “Bonde Kahombaso Mbetawɔ dia Bible Tɔlɔmbɔla?” Nyete anto wɛnya saki. Lam’eyanyu ɔnɛ nyayotokondja ekeketshelo ndo ekimanyielo lɛkɔ, wɛ la nkumbo kayɛ nyoyalɔngɔsɔlɛ di’aha pandja ndoko etenyi ka losanganya.