Kimanyiya Omendji ayɛ wa Wekelo wa Dibuku
1 Sho tshɛ kondjaka wahɔ efula oma lo Wekelo wa Dibuku wa l’Etshumanelo. Ngɔndɔ ketshi, takɛnyi woho wakotsha omendji wa Wekelo wa Dibuku wa l’Etshumanelo ɔkɛndɛ ande. Kakɔna kakokaso sala dia mbokimanyiya woho wa shamɛ ndo anto akina kondja wahɔ oma lo dikambo sɔ na?
2 Ɔtɔka Lomingu Tshɛ: Lam’ele wekelo wa dibuku salemaka lo tolui ta totshitshɛ, wɔtwɛlɔ ayɛ wekɔ ohomba efula. Yadjɛ oyango wa mbɔtɔka lomingu tshɛ. Wɛ kokaka nto mbisha ekimanyielo lo komaka la wonya, nɛ dia dui sɔ kimanyiyaka omendji dia tatɛ losanganya yoho ya dimɛna.—1 Kor. 14:40.
3 Shaka Kɔmatɛrɛ Yodia: Yoho kina yakokayɛ mbisha ekimanyiyelo kayɛ ele lo ndjalɔngɔsɔlaka ndo lo mbishaka kɔmatɛrɛ yodia. Kɔmatɛrɛ yendana paka la dikambo ɔtɔi ndeka amɛna ndo dui sɔ keketshaka anto akina dia mbishaka kɔmatɛrɛ. Ewɔ dia mbishaka kɔmatɛrɛ yɔsa tshɛ kotami l’odingɔ. Naka dikambo dimɔtshi diambonanda otema ayɛ, kete mɔtsha ɔkɛtshanyelo lo mbidja kanyi yayɛ lo kɔmatɛrɛ.—1 Pet. 4:10.
4 Naka wɛ mbele la diɛsɛ dia mbadia edingɔ dikambo di’olui anyu, kete kotshaka ɔkɛndɛ ayɛ lo yoho ya dimɛna. Wadielo w’ɔlɔlɔ kimanyiyaka dia wekelo mbeta dimɛna.—1 Tim. 4:13.
5 Esambishelo ka l’Olui: Nsanganya y’otsha l’olimu w’esambishelo salemaka l’ahole efula wasalema wekelo wa dibuku, ndo naka wɛ sukɛ nsanganya shɔ, kete wɛ ayokimanyiya omendji oko washande ɛnyɛlɔ l’olimu w’esambishelo. Ɔsa ɛlɔngɔswɛlɔ ɛsɔ oko waaso wa wɛ mamatana efula l’ananyɔ ndo wa mbakeketsha.
6 Alapɔlɔ w’Olimu w’Esambishelo: Kimɔka alapɔlɔ ayɛ w’olimu l’ekomelo ka ngɔndɔ tshɛ ekɔ yoho kina ya kimanyiya omendji. Wɛ koka mbosha alapɔlɔ ayɛ kana mbidja lo shɛtɛshɛtɛ ya lo Mbalasa ka Diolelo yakalɔngɔswama dia mbidjaka alapɔlɔ w’olimu. Sekeletɛlɛ koka mbɔsa alapɔlɔ wa lo shɛtɛshɛtɛ shɔ ko nde nsanganya la wakakɔngɔla emendji wa wekelo wa dibuku.
7 Omendji ayɛ wa Wekelo wa Dibuku wa l’Etshumanelo ayɔngɛnangɛna efula naka wɛ kamba la nde dihɛka lo dihɛka. Lâdiko dia lâsɔ, wɛ koka ndjashikikɛ dia Jehowa ‘ayonga kamɛ la yimba yɛnyayɛ.’—Fil. 4:23.