Woho Wayasha Emendji wa Wekelo wa Dibuku wa l’Etshumanelo le So
1 Oyango wa Wekelo wa Dibuku wa l’Etshumanelo ele wa “ndeka mbidja yimba l’ohamelo wa lonyuma w’onto tshɛ. . . . Ɔnɛ ekɔ yoho yɛnya Jehowa ngandji kande ka shikaa ndo woho wakanɛnde ekambi ande.” (om lɛkɛ 75; Is. 40:11) Omendji wa wekelo wa dibuku ekɔ l’ɔkɛndɛ w’ohomba wendana la mbidja onto tshɛ yimba.
2 Lo Wekelo wa Dibuku: Lam’ele wekelo wa dibuku salemaka lo tolui ta totshitshɛ, omendji wa wekelo wa dibuku ekɔ l’akoka wa mbeya anto tshɛ wa l’olui ande dimɛna. (Tuk. 27:23) Mbala efula nde ekɔ la waaso wa mongaka la wɔ kâmɛ la ntondo kana l’ɔkɔngɔ wa wekelo oseka lomingu tshɛ. Lo ngɔndɔ, nde kokaka sawola suke l’oseka onto tshɛ la l’olui ande. Dikambo sɔ diayokimanyiya anto wa l’olui ande wa wekelo wa dibuku di’aha vɔ mboka wolo tɛkɛta la nde etena kewɔ l’ekakatanu kana kewɔ l’ohomba w’ekeketshelo.—Is. 32:2.
3 Omendji wa wekelo wa dibuku salaka la wolo dia keketsha anto tshɛ wa l’olui ande dia mbisha ekadimwelo wonya wa salema wekelo. Yoho mɔtshi yasalande dikambo sɔ ele nɔmbɔla wekelo dimɛna ndo la ngandji. (1 Tes. 2:7, 8) Nde nyangaka woho w’onto tshɛ tɛkɛta, ongi kânga ana w’akɛnda. Naka anto amɔtshi mbokaka sɔnyi mbisha kɔmatɛrɛ, kete nde mbeyaka mbakimanyiya l’ɔkɛngɛ lo mbashaka la ntondo divɛsa diayowadia kana odingɔ wayowosha kɔmatɛrɛ lɔkɔ. Kana nde mbeyaka mbaɛnya woho wa vɔ mbishaka ekadimwelo lo tɔtɛkɛta tawɔ vamɛ.
4 Naka okimanyidi waki omendji wa wekelo wa dibuku ekɔ okambi w’olimu, kete omendji ayɔlɔngɔsɔla woho wa nde nɔmbɔlaka wekelo mbala ɔtɔi oma l’ɔkɔngɔ wa ngɔndɔ hiende tshɛ. Dikambo sɔ kimanyiyaka omendji dia nde sɛdingola woho walɔmbɔla okambi ɔsɔ ndo mbosha alako wele ohomba. Ɔsɔ mɛtɛ ekɔ ɔlɔngɔswɛlɔ wa dimɛna dia kimanyiya anangɛso dia ndowanya diewo diawɔ dia mbetsha!—Tito 1:9.
5 L’Olimu w’Esambishelo: Ɔkɛndɛ ɔmɔtshi wa woke wele l’omendji wa wekelo wa dibuku ele wa mbisha ɛnyɛlɔ lo kɛnɛ kendana l’olimu w’esambishelo. (Wal. 27:16, 17) Nde ayɔlɔngɔsɔla dimɛna esambishelo ka l’olui ndo ndjâtshutshuya dia kimanyiya anto tshɛ wa l’olui woho wa vɔ mongaka l’ɔngɛnɔngɛnɔ tena tshɛ lam’asambishawɔ. (Ef. 4:11, 12) Dia kotsha oyango ɔsɔ, nde ndjadjɛka oyango wa sambisha l’oseka onto tshɛ la l’olui ande. Nde kambaka nto nde l’omendji w’olimu dia sala woho w’anto walanga ndjalowanya l’awui amɔtshi wendana l’olimu awɔ w’esambishelo kondja ekimanyielo oma le apandjudi waya tomanamana.
6 Oko Olami w’Ɛkɔkɔ wa Ngandji: Omendji wa wekelo wa dibuku ndjashaka le anto wele kema l’akoka wa sambisha efula l’ɔtɛ w’ekakatanu wele lawɔ. Nde ndjashikikɛka dia wanɛ wele la wekamu w’efula l’ɔtɛ wayawɔ esombe kana l’ɔtɛ wa hemɔ kana wele lo tshanda mɔtshi bu l’akoka wa sambisha nɛ dia wekɔ baka la hemɔ kana wakahomɔ. Anto asɔ mbeyaka kimɔ alapɔlɔ wele kânga la minitɛ 15 naka vɔ kema l’akoka wa kotsha wonya wa tango lo ngɔndɔ. (Kɔmite k’Olimu ka l’Etshumanelo mbashikikɛ anto akɔna wendana la yɛdikɔ shɔ. Nde ndjashaka nto le anto wa l’olui ande, wahayosambisha, ndo nde ndjâtshutshuyaka dia mbakimanyiya dia vɔ nyomotatɛ sambisha kamɛ l’ase etshumanelo.)—Luka 15:4-7.
7 Tekɔ la lowando l’efula lo woho wayasha emendji wa wekelo wa dibuku la ngandji tshɛ le anto! Woho wadjawɔ onto tshɛ yimba mbakimanyiyaka dia vɔ ‘tshɛ koma kamɛ lo mbetawɔ lo yɛdikɔ ya diema y’elolelo ka Kristo.’—Ef. 4:13.