Wekelo wa Dibuku wa l’Etshumanelo—Bonde Keso l’Ohomba Awɔ
1. L’etatelo tɛdikɔ takɔna takɔsama lo kɛnɛ kendana la Wekelo wa Dibuku wa l’Etshumanelo?
1 Lo 1895, elui wa wekelo w’Ambeki wa Bible, oko wakawelɛka Ɛmɛnyi wa Jehowa nshi shɔ, wakelɛka elui wa wekelo wa dibuku ɔnɛ: Cercles de l’aurore pour l’étude de la Bible, (Elui w’anto wakatshumanaka la yoosose dikambo dia wekelo wa Bible). Tɔvɔlimɛ ta dibuku L’Aurore du Millénium mbaki dihomɔ dia wekelo. L’ɔkɔngɔ diko nsanganya shɔ yakayelamɛka ɔnɛ: Cercles béréens pour l’étude de la Bible, (Elui w’ase Bɛrɔya dikambo dia wekelo wa Bible). (Etsha 17:11) Mbala la mbala olui wa tshitshɛ w’anto wakasanganaka lo luudu lɔmɔtshi la dikɔlɔ diakakokaka anto wa l’olui ɔsɔ pomana. Yoho shɔ mbakatatɛ ekongelo ka nsanganya ya Wekelo wa Dibuku wa l’Etshumanelo.
2. Ngande wakokaso mbisha lonya dia ‘keketshanya onto la onyande’ lo wekelo wa dibuku?
2 Ekeketshelo ndo Wɔtwɛlɔ: Lam’ele nɔmbamaka di’elui wa wekelo wa dibuku monga totshitshɛ, wanɛ wɔtɔ lɔkɔ wekɔ la diaaso di’efula dia mɛnya mbetawɔ kawɔ lo sɛkɛ lo mbishaka kɔmatɛrɛ. Etombelo wele la dikambo sɔ ele ‘sho keketshanyaka onto la onyande lo mbetawɔ.’—Romo 1:12.
3, 4. Ngande watokimanyiya ekongelo ka wekelo wa dibuku dia sho kotsha olimu aso?
3 Sɛdingola woho wetsha omendji wa wekelo wa dibuku koka tokimanyiya dia ‘nembetshiya ɔtɛkɛta w’akambo wa mɛtɛ dimɛna.’ (2 Tim. 2:15) Sɛdingola woho wakande epole ɔsɛkɛ l’avɛsa woshami lo wekelo. Naka kokaka lo ndjela dibuku diekama, kete nde mbeyaka mbika epole ɔsɛkɛ l’awui w’ohomba l’ekimanyielo k’ovuswelo wayondosala l’ekomelo lo kamba paka la Bible. Ɛnyɛlɔ kande ka dimɛna kokaka tokimanyiya dia ndowanya wetshelo l’olimu w’Akristo.—1 Kor. 11:1.
4 Lâdiko wa nɔmbɔla wekelo wa lomingu la lomingu, omendji wa wekelo wa dibuku mbishaka ɛnyɛlɔ l’olimu w’esambishelo. Lo kamba kâmɛ l’omendji w’olimu, nde salaka ekongelo k’ɔlɔlɔ dikambo di’olimu w’esambishelo. Nde nyangaka woho wa kimanyiya anto tshɛ wa l’olui woho wa vɔ kotsha ɔkɛndɛ awɔ w’Okristo wa sambisha lokumu l’ɔlɔlɔ ndo mbetɛ anto ambeki.—Mat. 28:19, 20; 1 Kor. 9:16.
5. Ekimanyielo kakɔna kalongola anto lo wekelo wa dibuku?
5 Omendji wa wekelo wa dibuku ndjashaka dikambo dia yônge ya lo nyuma y’onto tshɛ la l’olui ande. Nde mɛnyaka wahɔ ɔsɔ lo nsanganya ya l’etshumanelo ndo lo sambisha l’anto akina. Nde kambaka nto la tena diatshɔnde tembola anango l’akadiyɛnde lawakawɔ dia takeketsha lo nyuma. Anto tshɛ hawohombe mboka wɔma dia sawola l’omendji wa wekelo wa dibuku dia kondja ekimanyielo ka lo nyuma wonya tshɛ wewɔ l’ohomba w’ekimanyielo kɛsɔ.—Is. 32:1, 2.
6. (a) Ngande wakakeketshanaka anangɛso wa lo wedja ɛmɔtshi lo sanganaka lo tolui ta totshitshɛ t’anto? (b) Ngande wamboyokondja wahɔ wɛmɛ oma l’ekongelo ka wekelo wa dibuku?
6 Tokeketshanya Onto la Onyande: Lo wedja wambowoshimba olimu waki Nzambi, anangɛso l’akadiyɛso pomanaka mbala efula l’elui wa totshitshɛ. Ɔnangɛso ɔmɔtshi mbohɔka ate: “Kânga mbakashimbama olimu aso w’Okristo, takasalaka nsanganya yaso ya lomingu la lomingu lo tolui ta lam’asa anto 10 la 15 etena tshɛ kakatakondjaka diaaso. Nsanganya shɔ yakatoshaka wolo wa lo nyuma, oyadi lo wekelo aso wa Bible kana oma l’asawo wakatasawolaka oma l’ɔkɔngɔ wa wekelo. Takatanɛka akambo wakahomanaka laso ndo dui sɔ diakatokimanyiya dia mɛna dia sho tshɛ takalɔshaka ta diakɔ diamɛ.” (1 Pet. 5:9) Oko vɔ, nyɛsɔ tokeketshanake lo sukɛ ekongelo ka Wekelo wa Dibuku wa l’Etshumanelo.—Ef. 4:16.